БЎЛҒУСИ ЎҚУВЧИЛАР УЧУН МАКТАБДА ДАРС МАШҒУЛОТИ ЎТИЛДИ

Мамлакатимизнинг келажаги бўлган болажонларни маънавий етук, жисмонан соғлом бўлиб вояга етишлари учун барча шароитлар яратилган. Таълим-тарбия жараёнига дунё миқёсидаги илғор тажрибалар жорий этилиб, уларнинг интеллектуал ривожланиши учун ғамхўрлик қилинмоқда.

Инсон камолотида таълим-тарбиянинг ҳал қилувчи омил эканлигини инобатга олган ҳолда мактабгача таълим ташкилотларига болажонлар қамровини ошириш, уларни мактаб таълимига сифатли тайёрлаш долзарб вазифага айланди. Кейинги йилларда мактабгача таълим ташкилотларида оиласи бағрида тарбияланаётган 6 ёшли болаларни мактаб таълимига тайёрлайдиган қисқа гуруҳлар фаолияти йўлга қўйилди. Бу саъй-ҳаракатларнинг бари жажжи ўғил-қизларни давр талабига монанд ақлли, зукко ва билимдон бўлиб вояга етказишдек эзгу мақсадларга хизмат қилади.

Яқинда Қиличбой овулида фаолият юритаётган 83-сонли мактабда болажонлар ҳаётида ўчмас таассурот қолдирган воқеа бўлди: одатда биз мактаб ёшига яқинлашган ўғил-қизларимизга мактаб ҳақида илк тушунчалар берамиз, мактабда яхши ўқисанг, одобли бўлсанг, обрўли инсон бўлиб етишасан, устозларинг ҳам сен билан фахрланадиган бўлади, дея уқтирамиз. Бироқ мактабни, таълим-тарбия жараёнини ўз кўзи билан кўрганчалик тасаввур бера олмаслигимиз тайин.

Шуни эътиборга олиб, 83-сонли мактабда 2020-2021 ўқув йилида 1-синфга янгидан қабул қилинадиган, айни кунда 6 ёшли бўлган болалар учун коррекцион ривожлантирувчи машғулот ўтказилди. Машғулотга овулнинг Қиличбой ва Олмазор аҳоли пунктларида истиқомат қилувчи мактабгача таълим ташкилотида тарбияланаётган 6 ёшли ўғил-қизлар ота-оналари билан бирга иштирок этдилар. Ўқитувчилар уларни илиқ қарши олиб, мактаб ҳаёти билан таништирдилар ва улар учун махсус тайёрланган синфхонага бошлаб бордилар. Ҳамма жойлашиб олгач, машғулот бошланиши эълон қилинди. Уни бошланғич синф ўқитувчиси Зубайда Кенжаева олиб борди. Унинг болажонлар билан ўзига хос, илиқ танишуви, уларга машғулот ўтаётганидан хурсандлигини билдиргани муаллим ва бўлғуси ўқувчилар орасида илиқ муносабат ўрнатилишига асос бўлди.

Машғулот бошланди. Болажонлар бир хил предметларни ажратиш, гуруҳларга ажратиш, гапнинг  тескарини айтиш каби топшириқларни ва шунингдек, болаларнинг тафаккурини ривожлантиришга хизмат қилувчи услублар асосида саволларга жавобларни айтиш каби топшириқларни бажардилар. Машғулотни  болажонлар жуда яхши ўзлаштирдилар. Зукко, ҳозиржавоб ўғил-қизлар фаоллиги учун мактаб маъмурияти томонидан рағбатлантирилгани, китоблар совға қилингани болаларда мактабга, устозларга ҳурмат ҳиссини шакллантирди.

Машғулотдан ота-оналар ҳам илиқ таассуротлар олишди.

Айни кунда фан тўгараклари, спорт тўгараклари ва касб-ҳунарга йўналтирувчи тўгараклар мунтазам фаолият кўрсатиб, ўқувчиларнинг интеллектуал салоҳиятини оширишга, чуқур билим эгаллашига хизмат қилаётган мазкур мактаб ота-оналарга ҳам, жажжи болажонларга ҳам жуда ёқди. Айниқса, мактабда ўқувчилар таълим олишлари учун яратилган шарт-шароитлар, шинам ва ёруғ синф хоналарини, деворлардаги баннер ва стендлар, кўргазмали қуроллар, замонавий технологиялар билан танишган бўлғуси ўқувчиларда таълим олишга бўлган иштиёқ янада кучайди.

Бунингдек ўзига хос тадбир болалар учун унутилмас таассуротларни ҳадя этди.

О.РАЖАБОВА.