BOʻLGʻUSI OʻQUVChILAR UChUN MAKTABDA DARS MAShGʻULOTI OʻTILDI

Mamlakatimizning kelajagi boʻlgan bolajonlarni maʼnaviy yetuk, jismonan sogʻlom boʻlib voyaga yetishlari uchun barcha sharoitlar yaratilgan. Taʼlim-tarbiya jarayoniga dunyo miqyosidagi ilgʻor tajribalar joriy etilib, ularning intellektual rivojlanishi uchun gʻamxoʻrlik qilinmoqda.

Inson kamolotida taʼlim-tarbiyaning hal qiluvchi omil ekanligini inobatga olgan holda maktabgacha taʼlim tashkilotlariga bolajonlar qamrovini oshirish, ularni maktab taʼlimiga sifatli tayyorlash dolzarb vazifaga aylandi. Keyingi yillarda maktabgacha taʼlim tashkilotlarida oilasi bagʻrida tarbiyalanayotgan 6 yoshli bolalarni maktab taʼlimiga tayyorlaydigan qisqa guruhlar faoliyati yoʻlga qoʻyildi. Bu saʼy-harakatlarning bari jajji oʻgʻil-qizlarni davr talabiga monand aqlli, zukko va bilimdon boʻlib voyaga yetkazishdek ezgu maqsadlarga xizmat qiladi.

Yaqinda Qilichboy ovulida faoliyat yuritayotgan 83-sonli maktabda bolajonlar hayotida oʻchmas taassurot qoldirgan voqea boʻldi: odatda biz maktab yoshiga yaqinlashgan oʻgʻil-qizlarimizga maktab haqida ilk tushunchalar beramiz, maktabda yaxshi oʻqisang, odobli boʻlsang, obroʻli inson boʻlib yetishasan, ustozlaring ham sen bilan faxrlanadigan boʻladi, deya uqtiramiz. Biroq maktabni, taʼlim-tarbiya jarayonini oʻz koʻzi bilan koʻrganchalik tasavvur bera olmasligimiz tayin.

Shuni eʼtiborga olib, 83-sonli maktabda 2020-2021 oʻquv yilida 1-sinfga yangidan qabul qilinadigan, ayni kunda 6 yoshli boʻlgan bolalar uchun korrektsion rivojlantiruvchi mashgʻulot oʻtkazildi. Mashgʻulotga ovulning Qilichboy va Olmazor aholi punktlarida istiqomat qiluvchi maktabgacha taʼlim tashkilotida tarbiyalanayotgan 6 yoshli oʻgʻil-qizlar ota-onalari bilan birga ishtirok etdilar. Oʻqituvchilar ularni iliq qarshi olib, maktab hayoti bilan tanishtirdilar va ular uchun maxsus tayyorlangan sinfxonaga boshlab bordilar. Hamma joylashib olgach, mashgʻulot boshlanishi eʼlon qilindi. Uni boshlangʻich sinf oʻqituvchisi Zubayda Kenjayeva olib bordi. Uning bolajonlar bilan oʻziga xos, iliq tanishuvi, ularga mashgʻulot oʻtayotganidan xursandligini bildirgani muallim va boʻlgʻusi oʻquvchilar orasida iliq munosabat oʻrnatilishiga asos boʻldi.

Mashgʻulot boshlandi. Bolajonlar bir xil predmetlarni ajratish, guruhlarga ajratish, gapning  teskarini aytish kabi topshiriqlarni va shuningdek, bolalarning tafakkurini rivojlantirishga xizmat qiluvchi uslublar asosida savollarga javoblarni aytish kabi topshiriqlarni bajardilar. Mashgʻulotni  bolajonlar juda yaxshi oʻzlashtirdilar. Zukko, hozirjavob oʻgʻil-qizlar faolligi uchun maktab maʼmuriyati tomonidan ragʻbatlantirilgani, kitoblar sovgʻa qilingani bolalarda maktabga, ustozlarga hurmat hissini shakllantirdi.

Mashgʻulotdan ota-onalar ham iliq taassurotlar olishdi.

Ayni kunda fan toʻgaraklari, sport toʻgaraklari va kasb-hunarga yoʻnaltiruvchi toʻgaraklar muntazam faoliyat koʻrsatib, oʻquvchilarning intellektual salohiyatini oshirishga, chuqur bilim egallashiga xizmat qilayotgan mazkur maktab ota-onalarga ham, jajji bolajonlarga ham juda yoqdi. Ayniqsa, maktabda oʻquvchilar taʼlim olishlari uchun yaratilgan shart-sharoitlar, shinam va yorugʻ sinf xonalarini, devorlardagi banner va stendlar, koʻrgazmali qurollar, zamonaviy texnologiyalar bilan tanishgan boʻlgʻusi oʻquvchilarda taʼlim olishga boʻlgan ishtiyoq yanada kuchaydi.

Buningdek oʻziga xos tadbir bolalar uchun unutilmas taassurotlarni hadya etdi.

O.RAJABOVA.