Бошланғич синфларда очиқ дарс ўтказилди
Фан ойлиги таълим муассасаларидаги ўқув-тарбия жараёнининг замонавий талаблар даражасида бўлишини таъминлаш билан бир қаторда, фан ўқитувчиларининг педагогик маҳоратини ошириш, уларнинг ижодий изланишлари ва меҳнатларини рўёбга чиқаришга хизмат қилади. Шу сабабли ҳам таълим тизимида фан ойликлари жорий қилинган. Мамлакатимиздаги барча таълим масканларида бўлгани каби туманимиздаги таълим муассасаларида ҳам фан ойликлари юқори савияда ташкил қилиниб келмоқда.
Таълим масканларида фан ойликлари доирасида турли хил тадбирлар, кўргазмалар, мусобақа, беллашувлар билан бир қаторда очиқ дарслар ҳам ташкил этилади. Aна шундай очиқ дарслардан бири февраль – математика ва информатика фани ойлиги доирасида туманимиздаги 16-сонли ихтисослаштирилган давлат умумтаълим мактабида ҳам бўлиб ўтди. Юқори савияда ўтказилган очиқ дарсни мактабнинг бошланғич синф ўқитувчиси 4-“В” синф раҳбари Aзиза Тўраева ташкил қилди. “Касрлар ҳақида тушунча” мавзусидаги очиқ дарсда замонавий педогогик технологияларидан, янги методлардан фойдаланилди.
Дарс жараёнининг кичик гуруҳларга ажратилган ҳолда олиб борилгани ўқувчилар ўртасида ўзаро рақобатни кучайтирди. Ўқувчилар ўз жамоаларининг юқори кўрсаткичларни қўлга киритиши учун астойдил ҳаракат қилдилар. Очиқ дарсда “Ким билағон? ким чаққон?”, “Музлади”, “Саёҳатчи билимдон” методларини қўллаш орқали ўқувчиларнинг фанга бўлган қизиқишлари янада ортди ҳамда дарс жараёнига фаол иштироки таъминланди.
Очиқ дарснинг қай даражада ташкил қилинганини кузатиш, ўқитувчининг педагогик маҳоратини баҳолаш, синф ўқувчиларининг дарс жараёнига, фанга бўлган муносабатини ўрганиш ҳамда ўзаро тажриба алмашиниш мақсадида илмий ишлар бўйича директор ўринбосари Гулзор Пирмонова, мактаб ўқитувчиларидан Дилфуза Хидирбоева, Матлуба Раҳимова, Барно Йўлдошевалар очиқ дарсда иштирок қилишди.
Бу орқали устозлар ўз ҳамкасби, маҳоратли ўқитувчи, мактабнинг бошланғич синфлар услуб-бирлашмаси раҳбари Aзиза Тўраеванинг иш тажрибаси ва билим салоҳиятини яқиндан ўрганишди.
Шу ўринда таъкидлаш керакки, фан ойлиги давомида мактабнинг педагогик жамоаси фаоллиги, маҳоратли кадрлар билан таъминланганлиги, математика фани хонасининг зарур кўргазмали-дидактик материаллар билан жиҳозланиши, ота-оналар билан мактабнинг ҳамкорлигини жонлантириш, уларни фандаги янгиликлар, таълим тизимидаги ўзгаришлар, ўқувчиларнинг ўзлаштириш ва билим самарадорлиги кўрсаткичлари билан таништириш кабиларга қаратилган самарали ишлар амалга оширилди.
Дарс мобайнида устоз ҳамда ўқувчиларнинг очиқ дарсга астойдил тайёргарлик кўришгани, уларнинг математика фанига бўлган меҳри ҳамда қизиқишлари ҳавас қилгудек даражада бўлди.
Хусусан, очиқ дарсда фойдаланилган методлар дарснинг янада жонланишига хизмат қилди. Aйниқса, “Саёҳатчи билимдонлар” методи орқали барча ўқувчиларнинг эътибори ҳамда диққати жалб қилинди. Ўқувчилар ушбу метод орқали математик мисоллар ва масалаларнинг жавобини топиш билан “поезд чипталари”ни қўлга киритишиб, юртимизнинг тарихий шаҳарларига “саёҳат” қилдилар.
Дарс жараёнида фаол иштирок этган ўқувчилар рағбатлантирилди. Очиқ дарс барча ўқувчиларда математика фанига бўлган қизиқишларининг янада ошишига хизмат қилди.
Чарос Aрслонова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
