МАКТАБДА ЗУЛФИЯХОНИМ ТАВАЛЛУД КУНИГА БАҒИШЛАБ ТАДБИР ЎТКАЗИЛДИ

Ўзбек халқининг севимли шоираси, таниқли жамоат арбоби, халқаро  тинчликни шеъриятида ўзига хос моҳирлик билан куйлаган, севги, вафо, садоқат куйчиси деб ном олган Зулфияхонимнинг ижоди ҳам, ҳаёти ҳам барча халқлар аёл-қизлари учун намуна бўла олади.

У 17 ёшида ёзган “Ҳаёт варақлари” номли биринчи шеърлар тўплами билан ўзбек адабий муҳитига ўзига хос салобат, иқтидор ва ўта камтар ўзбек аёли сифатида кириб келди. Шоиранинг илк китобидан бошлаб, кейинчалик нашр этилган турли жанрлардаги асарларини ўз  ичига олган барча шеърий тўпламларини барча севиб ўқийди, ўрганади.

Унинг вафотидан бери қанча йиллар ўтса-да, ҳамон “Бахтим шул, ўзбекнинг Зулфиясиман” деб ўзининг ашъорлари ила кўз ўнгимизда тобора юксакроқ бўй тиклайверади, ўқиганимиз сайин ўқигимиз, унинг маънавият чашмасидан қониб ичгимиз келаверади.

Шу боис унга талпиниш, унинг хотирасини ҳурмат-эҳтиром билан эсга олиш – ҳаёт тарзимиздан чуқур жой эгаллаган.

Туманимиздаги 14-сонли мактабда ҳам Зулфияхоним таваллуд топган кун муносабати билан “Вафо ва садоқат куйчиси” деб номланган маънавий-маърифий тадбир бўлиб ўтди.

Тадбирда мактабнинг она тили ва адабиёт фани ўқитувчиси Дилфуза Ғойибова Зулфия ҳаёти ва ижоди ҳақида маъруза қилди. У ўз сўзида Иккинчи жаҳон уруши йилларида “Уни Фарҳод дер эдилар”, “Ҳижрон кунларида” каби тўпламларидан жой олган шеърлари орқали турмуш ўртоғи, севган ёри, фарзанди урушга кетган аёлларга руҳий мадад бергани, дунё оналарини тинчлик учун бирлашишга чақирганини мисоллар билан тушунтириб берди.

Зулфия ижодидаги деярли ҳар бир асарда Ҳамид Олимжон образига бир ишора, унинг ижодий ҳаёт йўлини давом эттираётганидан фахрланиш ҳисси сезилиб туришни алоҳида таъкидлади.

Тадбир “Ёш тилшунос” тўгараги аъзоларининг Зулфия шеърларини ифодали ўқиши билан давом этди. Шунингдек, мактаб бадиий ҳаваскорлик тўгараги аъзолари ижросида “Амударём” қўшиғи билан бошланувчи мусиқий дастур намойиш этилди. Қўшиқ ва рақсларни 8-синф ўқувчилари Жавоҳир Мадраҳимов, Жондўст Жандеов, Гулбону Пирмоновалар маҳорат билан адо этдилар.

Шунингдек, мактабнинг бадиий ижод билан шуғулланаётган ҳаваскор қизлари Гулмира Рустамбоева, Садоқат Бозорбоева, Шаҳноза Иброҳимова, Умида Иброҳимова, Гулруҳ Мадраҳимовалар шоира Зулфияхонимга издош бўлишдек орзулари ифода этилган шеърларини ўқиб бердилар.

Халқаро “Нилуфар” мукофоти, Болгария Халқ Республикасининг биринчи даражали “Кирилл ва Мефодий” ордени, Жавоҳарлал Неру номидаги умумҳиндистон соврини, уч марта меҳнат Қизил Байроқ ордени соҳибаси, ҳассос шоира, вафо ва садоқат куйчиси Зулфияхонимга ҳавас қилмайдиган, асарларини севиб ўқимайдиган, унга ўхшашга интилмайдиган ўзбек қизи топилмаса керак. Зулфияхонимга бағишлаб ёзилган шеърлар ҳам буни ифодалаб турибди. “Ўзбекнинг Зулфияси” ана шундай катта эҳтиромларга, эъзозларга муносиб.

О.РАЖАБОВА.