ЭНДИ ЎҚУВЧИ ЭРИШГАН НАТИЖА KUNDАLIK.СOM САЙТИДА ШУ ЗАҲОТИ АКС ЭТАДИ
Янги ўқув йилидан Вазирлик тизимида жуда катта ўзгаришлар бўлмоқда. Хусусан, ўқитувчилар юритадиган ҳужжатлар сони қисқармоқда, 1-2-синфларда тажриба-синов тариқасида Миллий ўқув дастурига кўра, янги баҳолаш тизими жорий этилиши кутилмоқда. Авваллари ўқитувчилар юритадиган ҳужжатлар сони 3 та бўлса, эндиликда фақат битта журнал юритиш белгиланди. Бу биз ўқитувчилар учун қўшимча бўш вақтни ўқувчилар билимини оширишга қаратиш имконини беради.
Айни пайтда бизнинг 55-сонли умумий ўрта таълим мактаби 2020-2021 янги ўқув йилига шай ҳолатга келтирилди. Мактабимиз тўлиқ таъмирланди. Мазкур ўқув йилида мактабимизга 84 нафар ўқувчилар 1-синфга қабул қилинади.
Янги ўқув йилидан тумандаги намунали 4 та мактаб қатори, бизнинг 55-сонли мактабимиз ҳам kundalik.com, яъни янги электрон баҳолаш тизимига ўтмоқда.
Бу тизим орқали биз қоғоз журнал ва қоғоз кундалик каби ортиқча қоғозбозликлардан бутунлай воз кечмоқдамиз. Бу тизимнинг афзаллик тарафлари шундаки, ўқувчи олган ҳар бир баҳо электрон журналга қўйилади ва ота-она kundalik.com сайти орқали шу заҳоти фарзандининг ўқиши ва хулқи ҳақида тезкор ва тўлиқ маълумот билан таъминланади. Ўқитувчилар қўшимча журнал тўлдиришлар, ҳисобот, давомат ҳисоботи каби бир қанча қоғозбозлик ишларидан қутулишади. Шу билан бирга ўқитувчиларнинг замонавий ахборот технология воситаларидан фойдаланиш кўникмаси ҳам ошиб боради. Қисқаси, мен янги ўқув йилини жуда орзиқиб кутмоқдаман, янги баҳолаш тизимининг афзалликлари, мазмун ва моҳияти қай даражада юқорилигини ўз педагогик фаолиятим орқали намоён этиш ниятидаман.
Фурсатдан фойдаланиб, барча ҳамкасбларимни, устоз-у шогирдларимни, мактаб остонасига ёрқин орзулар билан илк қадам қўяётган жажжи болажонларни янги ўқув йили ва энг улуғ, энг азиз байрамимиз – мустақиллик айёми билан чин дилдан муборакбод этаман.
Гулжаҳон ТЎРАЕВА, 55-сонли мактабнинг бошланғич синф ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
