ҲАММАМИЗГА СЕВИМЛИ ЗОЯХОНИМ ЭДИ...
Баъзан ҳаётда юз берадиган кутилмаган воқеа-ҳодисалар одамни карахт қилиб қўяди. Айниқса, ҳар куни биргаликда чақ-чақлашиб, қувонч-у ташвишингни баҳам кўриб, бир ҳаводан нафас олиб. Бир жамоада ишлашаётган ҳамкасбингдан ҳеч кутилмаганда айрилиб қолсанг жуда оғир ботаркан...
Аллоҳнинг иродаси, халқимиз бошига тушган синов бизнинг меҳнат жамоамизни ҳам четлаб ўтмади. Гулгул очилиб юргувчи, ниҳоятда самимий ва дилкаш. 38-сонли мактабимиз педагогика жамоасининг севимли дўсти, ўқувчиларининг азиз устози Зояхон Бобожоновани бемаврид ажал орамиздан жуда эрта олиб кетди. У жуда меҳрибон, шу билан бирга ўз фанининг билимдони, маънавий кучли аёл эди. 1993 йилда НДПИнинг ўзбек филиологияси факультетини тамомлаб, илк меҳнат фаолиятини 41-сонли мактабда она тили ва адабиёт фани ўқитувчиси сифатида бошлаган Зоя Бобожонова 1998-2002 йилларда 38-сонли умумтаълим мактабида қорақалпоқ тили ва адабиёти фани ўқитувчиси, 2002-2007 йилларда мактаб директорининг маънавий-маърифий ишлар бўйича ўринбосари, 2008-2012 йилларда Манғит Иқтисодиёт коллежи ўқитувчиси, 2012-2019 йилларда эса 38-сонли умумтаълим мактаби директорининг ўқув-тарбия ишлари бўйича ўринбосари вазифаларида фаолият юритиб, ёш авлодни ватанпарвар, мустақиллик ғояларига садоқатли, маънавий етук инсонлар қилиб тарбиялаш ишига муносиб ҳисса қўшди.
Биз – 38-сонли мактаб жамоаси уни Зояхоним, дея яхши кўрар эдик. Зояхоним ҳар қандай мақтовга, жамоа ҳурматига сазовор, яхши кўришимизга лойиқ инсон эди. Унинг ўзига хос дарс ўтиш тажрибаси, адабиёт дарсларида худди ёқимли мусиқа янглиғ жарангдор овозда шеър ўқишлари, чиройли табассум қилишлари, турли байрам саналари муносабати билан мактабимизда ўтказиладиган байрам тадбирларига бош-қош бўлиб юришлари, ҳамма эзгу ишлари ҳеч кутилмаганда хотирага айланди. Маккор коронавирус биздан Зояхонимдек дилкаш ҳамкасб дўстни, оиласидан меҳрибон она ва севимли рафиқани, яқинларидан фидойи жигарбандни тортиб олди. Илоҳим, Зояхонимнинг жойлари жаннатдан бўлсин, охиратларини Аллоҳ обод қилсин. Яқинларининг ажри улуғ, сабр-тоқатлари гўзал, фарзандларининг умрлари узоқ бўлсин.
Ҳақларига доимо дуода бўлгувчи 38-сонли умумтаълим мактаби меҳнат жамоаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
