БОЛАЖОНЛАРНИНГ СЕВИМЛИ БОҒЧА ОПАСИ

Мамлакатимизда мактабгача таълим тизимини янада такомиллаштириш, соғлом, фаол, тўлақонли, жамиятга мослашган бола шахсини шакллантиришга эътибор кун сайин кучаймоқда. Тизимда фаолият юритаётган ташкилотлар мактабгача ёшда бўлган болаларнинг жисмоний, ақлий ва маънавий камол топишига, уларнинг таълим олишга бўлган ҳуқуқларини, уларнинг  бошланғич таълимга тайёрлигини таъминлашга хизмат қилади. Шунингдек, жажжи  ўғил-қизлар кўнглида бир-бирига,  оиласига, Ватанига меҳр-муҳаббат ҳиссини шакллантириш, миллий одоб-ахлоқ қоидаларини сингдириш ҳам жуда муҳим. Узлуксиз таълимнинг илк босқичидаги таълим-тарбия норасида ўғил-қизларнинг келажакда қандай инсон бўлиб вояга етишида жуда муҳим роль ўйнайди.

Манғит шаҳрида фаолият юритаётган 40-сонли мактабгача таълим ташкилотида бугунги кунда 6та гуруҳда 180 нафар болажонлар яйраб-қувнаб улғаймоқда. Ҳар бир гуруҳ учун алоҳида-алоҳида машғулотлар хонаси, овқатланиш хонаси ва дам олиш хонаси бор. Болажонларга 16 нафар малакали педагог-тарбиячилар таълим-тарбия беришмоқда.

Ташкилот биносининг остонасидан ҳатлаган киши беихтиёр ўзини болалар дунёсига кириб қолгандек ҳис қилади. Кичиккина супачадан жой олган “Зумрад ва Қиммат” эртаги қаҳрамонлари-ю турли ўйинчоқлар, безаклар билан безатилган хоналар, коридорлар ҳам беихтиёр болаликнинг беғам, беташвиш ва бахтиёр дамларига етаклайди киши хаёлини.

Мазкур ташкилотга 2007 йилдан бери тажрибали мутахассис Шарифа Сеитова раҳбарлик қилиб келади. Тарбияланувчи болажонларни номма-ном танийдиган, ҳар бири билан характерига мос муомала қиладиган мудира ишни қатъий тартиб-интизом асосида бошқаради. Ташкилот тарбиячилари касбий фаолиятига доир, санъат, спорт турлари бўйича ўказилаётган танловлар, мусобақаларда доимо фахрли ўринларни эгаллашади. Тарбияланувчилар эса турли байрамлар муносабати билан ташкиллаштириладиган сайилларда, концерт дастурларида муносиб иштирок этиб, санъатини намойиш этишмоқда.

Дилфуза Йўлдошева ана шу ташкилотда 2015 йилдан бери тарбиячи лавозимида ишлаб келаётир. Соҳадаги фаолиятига эса 22 йил тўлди. Ўтган давр мобайнида Дилфуза неча-неча гуруҳ болажонларга тарбиячилик қилди. Уларнинг ўйинларига қўшилиб ўйнаб, суҳбатларига қулоқ тутиб, саволларига эринмай, батафсил жавоблар бериб, кўнгли  кўнгилларига туташди. Мактабга кузатиб қолган вақтларида гўё ўй-хаёли улар билан кетарди. У илк тарбия берган жажжи ўғил-қизлар ҳозир турли касб эгалари бўлиб, ҳаётда ўз ўринларини топишган, учрашиб қолган вақтларида уларнинг  болалик дамларини қўмсаб, “боғча опа” дея сўрашишларидан завқланади, касбига меҳри, ихлоси яна ҳам ортади.

Эҳтимол, шундандир Дилфуза Йўлдошева ўтган давр мобайнида намунали тарбиячи сифатида соҳа ходимлари орасида танилди. “Йил тарбиячиси”, шунингдек, спорт, санъат бўйича мактабгача таълим ташкилотлари ходимлари орасида ўтказилган синовларда ўз иқтидорини намойиш этиб, фахрли ўринларни эгаллаб келди.

Аслида тарбиячи ишининг машаққатини ҳис қилмаймиз. Баъзан оиламиздаги кичкинтойларни парваришлашда қийналиб қолган дамларда турли муҳитда, турлича тарбия олаётган 25-30 нафарча болани бирданига атрофига жипслаб, таълим-тарбия бериш заҳматини ҳис қилгандай бўламиз.

– Бизнинг ишимизда энг муҳими ҳар бир болани тинглаб, унга муносиб жавоб бера олиш, кўнглига йўл топиш, – дейди Дилфуза бу ҳақда кулиб.

Бутун билими, куч-ғайратини болажонлар таълим-тарбиясига бахшида этаётган Дилфуза Йўлдошева ва соҳанинг барча ходимларини касб байрами билан қутлаб қоламиз.

Ойгул РАЖАБОВА