BOLAJONLARNING SEVIMLI BOGʻChA OPASI

Mamlakatimizda maktabgacha taʼlim tizimini yanada takomillashtirish, sogʻlom, faol, toʻlaqonli, jamiyatga moslashgan bola shaxsini shakllantirishga eʼtibor kun sayin kuchaymoqda. Tizimda faoliyat yuritayotgan tashkilotlar maktabgacha yoshda boʻlgan bolalarning jismoniy, aqliy va maʼnaviy kamol topishiga, ularning taʼlim olishga boʻlgan huquqlarini, ularning  boshlangʻich taʼlimga tayyorligini taʼminlashga xizmat qiladi. Shuningdek, jajji  oʻgʻil-qizlar koʻnglida bir-biriga,  oilasiga, Vataniga mehr-muhabbat hissini shakllantirish, milliy odob-axloq qoidalarini singdirish ham juda muhim. Uzluksiz taʼlimning ilk bosqichidagi taʼlim-tarbiya norasida oʻgʻil-qizlarning kelajakda qanday inson boʻlib voyaga yetishida juda muhim rol oʻynaydi.

Mangʻit shahrida faoliyat yuritayotgan 40-sonli maktabgacha taʼlim tashkilotida bugungi kunda 6ta guruhda 180 nafar bolajonlar yayrab-quvnab ulgʻaymoqda. Har bir guruh uchun alohida-alohida mashgʻulotlar xonasi, ovqatlanish xonasi va dam olish xonasi bor. Bolajonlarga 16 nafar malakali pedagog-tarbiyachilar taʼlim-tarbiya berishmoqda.

Tashkilot binosining ostonasidan hatlagan kishi beixtiyor oʻzini bolalar dunyosiga kirib qolgandek his qiladi. Kichikkina supachadan joy olgan “Zumrad va Qimmat” ertagi qahramonlari-yu turli oʻyinchoqlar, bezaklar bilan bezatilgan xonalar, koridorlar ham beixtiyor bolalikning begʻam, betashvish va baxtiyor damlariga yetaklaydi kishi xayolini.

Mazkur tashkilotga 2007-yildan beri tajribali mutaxassis Sharifa Seitova rahbarlik qilib keladi. Tarbiyalanuvchi bolajonlarni nomma-nom taniydigan, har biri bilan xarakteriga mos muomala qiladigan mudira ishni qatʼiy tartib-intizom asosida boshqaradi. Tashkilot tarbiyachilari kasbiy faoliyatiga doir, sanʼat, sport turlari boʻyicha oʻkazilayotgan tanlovlar, musobaqalarda doimo faxrli oʻrinlarni egallashadi. Tarbiyalanuvchilar esa turli bayramlar munosabati bilan tashkillashtiriladigan sayillarda, kontsert dasturlarida munosib ishtirok etib, sanʼatini namoyish etishmoqda.

Dilfuza Yoʻldosheva ana shu tashkilotda 2015-yildan beri tarbiyachi lavozimida ishlab kelayotir. Sohadagi faoliyatiga esa 22-yil toʻldi. Oʻtgan davr mobaynida Dilfuza necha-necha guruh bolajonlarga tarbiyachilik qildi. Ularning oʻyinlariga qoʻshilib oʻynab, suhbatlariga quloq tutib, savollariga erinmay, batafsil javoblar berib, koʻngli  koʻngillariga tutashdi. Maktabga kuzatib qolgan vaqtlarida goʻyo oʻy-xayoli ular bilan ketardi. U ilk tarbiya bergan jajji oʻgʻil-qizlar hozir turli kasb egalari boʻlib, hayotda oʻz oʻrinlarini topishgan, uchrashib qolgan vaqtlarida ularning  bolalik damlarini qoʻmsab, “bogʻcha opa” deya soʻrashishlaridan zavqlanadi, kasbiga mehri, ixlosi yana ham ortadi.

Ehtimol, shundandir Dilfuza Yoʻldosheva oʻtgan davr mobaynida namunali tarbiyachi sifatida soha xodimlari orasida tanildi. “Yil tarbiyachisi”, shuningdek, sport, sanʼat boʻyicha maktabgacha taʼlim tashkilotlari xodimlari orasida oʻtkazilgan sinovlarda oʻz iqtidorini namoyish etib, faxrli oʻrinlarni egallab keldi.

Aslida tarbiyachi ishining mashaqqatini his qilmaymiz. Baʼzan oilamizdagi kichkintoylarni parvarishlashda qiynalib qolgan damlarda turli muhitda, turlicha tarbiya olayotgan 25-30 nafarcha bolani birdaniga atrofiga jipslab, taʼlim-tarbiya berish zahmatini his qilganday boʻlamiz.

– Bizning ishimizda eng muhimi har bir bolani tinglab, unga munosib javob bera olish, koʻngliga yoʻl topish, – deydi Dilfuza bu haqda kulib.

Butun bilimi, kuch-gʻayratini bolajonlar taʼlim-tarbiyasiga baxshida etayotgan Dilfuza Yoʻldosheva va sohaning barcha xodimlarini kasb bayrami bilan qutlab qolamiz.

Oygul RAJABOVA