Соҳибанинг ютуғи
Мустақиллик йилларида ёш авлодни ҳар жиҳатдан баркамол қилиб тарбиялаш ва вояга етказиш барчамизнинг асосий вазифамизга айланган. 55-сонли мактабнинг ўқитувчилар жамоаси ўз устида доимий ишлашга, замонавий педтехнологияларни ўзлаштиришга ва шу асосда ўқувчиларга билим беришга астойдил ҳаракат қилмоқдалар. Бу эса ўзининг натижасини бермоқда. Шу боис, ўқувчиларнинг фанларни ўзлаштириш даражаси ҳам юқори. Ҳозирги кунда мактабимизда 560га яқин ўқувчи таълим олмоқда. Мактабимизнинг ёш математика ва информатика фани ўқитувчиси Рустам Раҳматуллаев ўзининг тиришқоқлиги билан ўқитувчиларга ўрнак бўлиб келмоқда. Февраль ойида бўлиб ўтган информатика-математика фан ойликларида ўқувчилар бир-бирига буклетлар тайёрлашиб, байрам совғаси сифатида тақдим қилишди.
8-9-синфлар ўртасида "Ёш математиклар”, 5-6 синфлар ўртасида "Математика - ўйинларда”, "Ўйинлар-математикада” мавзуси бўйича ўқувчилар беллашган эдилар.
Мактаб ва туман босқичларида юқори натижаларга эришиб, Республика босқичига йўлланма олган қизимиз, 8-синф ўқувчиси Соҳиба Ражаббоева математика-информатика фанидан 24-25 март куни Нукус шаҳрида бўлиб ўтган "Билимлар беллашуви" Республика босқичида ҳам 1-ўринни эгаллади.
Мактаб директори Д.Ариков, ўқув ишлари бўйича директор ўринбосари Д.Ўрозбоева, маънавият ишлари бўйича директор ўринбосари Д.Ўрозбоев ва синф раҳбари Ш.Бердибоевалар Соҳибани ва унинг устози Рустам Раҳматуллаевни совға-саломлар билан кутиб олдилар.
Соҳибанинг ютуғидан мактабимизнинг барча ўқувчилари ибрат олиб, аълочи ва доно, билимдон бўлган бу қиздан ҳар томонлама ўрнак олишга интилишмоқда. Соҳиба Ражаббоеванинг ўзи эса шу кунларда математика-информатика фанини пухта ўзлаштириш мақсадида устози Р.Раҳматуллева билан изланишлар олиб бормоқда.
- Мақсадим – информатика фанини пухта ўрганиш, Ўзбекистон миқёсидаги билимлар беллашувида ғолиб бўлиш, - дейди Соҳиба.
Мактабимизда информатика ва математика фанларига қизиқувчи ўқувчилар кўпчиликни ташкил этади. Информатика фани ўқитувчиси Рустам Раҳматуллаев ҳар бир дарсни инновацион технологиялар асосида, қизиқарли савол-жавоблар ҳамда амалий ва назарий машғулотларнинг узвийлиги асосида олиб боради. Ўқувчиларнинг юқори натижаларга эришишининг яна бир сабаби, мактабда турли фан тўгаракларининг ҳамда билимлар бўйича ҳар хил танловларнинг ўз вақтида ва тўғри ташкил этилганлигидир. Шу кунларда мактабимизда "Моҳир қўллар”, "Зулфияхоним издошлари”, "Ёш кимёгарлар”, "Инглиз тилини ўрганамиз” каби тўгараклар фаолият кўрсатмоқда. Жонкуяр ўқитувчиларимиз ташаббуси билан "Тарихни биласизми?”, "Президент асарларини ўрганамиз”, "Ким чиройли ва бехато ёзади?” танловлари ҳам синфлараро ўтказилиб келинмоқда. Ўқувчиларимиз орасида ҳаваскор ижодкорлар ҳам бор. Уларнинг ижодий машқлари адабиёт ўқитувчилари томонидан таҳлил қилиб борилади.
Зуҳра АҲМЕДОВА,
шу мактабнинг кутубхона мудираси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
