ОИЛАДА ЯХШИ ТАРБИЯ ОЛГАН БОЛА ЖАМИЯТНИНГ УЛКАН ЮТУҒИДИР
Оила – тарбия маскани. Оилада тарбия қанчалик эрта бошланса, натижаси ҳам шунча барвақт кўзга ташланади. Оилада бола ота-онадан ибрат олган ҳолда шаклланади. Ота-она болага тарбия жараёнида нутқ маданияти, одамийлик хислатларини қунт билан сингдириб борса, келажакда у баркамол, соғлом, мустақил фикрловчи, энг асосийси, одобли шахс бўлиб етишади. Сабаби бола билим олиш, интилиш, Ватанини севиш, ардоқлаш, катталарни ҳурмат қилиш, муомала маданиятини ота-онадан ўрганади.
Ёш авлодга маънавий-ахлоқий, маданий тарбия беришнинг усул ва воситалари хилма-хил бўлиб, булар ичида эртаклардан фойдаланиш алоҳида ўрин тутади.
Эртаклар халқнинг кўнгил ойнаси бўлиб, уларда халқ орзу-умидлари, армонлари, эзгу ниятлари, ички кечинмалари ёрқин акс этади. Аслида эртаклар тарбиянинг бир қуролидир. Сабаби болалар эртакларга ишонади. Эртаклар таъсирида болалар қалбида умид, ишонч, эзгулик туйғулари куртак отади, дунёни англашга имкон яратилади. Ёш авлод онги айнан эртаклар таъсирида ватанпарварлик, меҳнатсеварлик каби туйғулардан озиқланади ва тасаввури бойийди. Оилада китоблар ўқилиб турилса, болада китобга бўлган меҳр уйғонади. Шуни таъкидлаш жоизки, бола тарбияси билан жиддий шуғулланган ота-оналарнинг фарзандлари таълим ташкилотида ўз имкониятларини машғулот жараёнида қийналмасдан кўрсата олади.
Эртакларни ўрганиш даврида болаларда ҳар хил фикрлар туғилиши мумкин. Эртакдаги айрим қаҳрамонлар болага ёқмаслиги ёки айримлари жуда маъқул кўриниши мумкин. Масалан «Бирлашган ўзар» эртаги охирида отанинг фарзандига қилган насиҳатлари орқали аҳиллик, бирдамлик, меҳнатсеварлик, ростгўйлик, яхши фазилат, ота-онанинг гапларига қулоқ солмаслик, ноаҳиллик эса ёмон одатлигини солиштиришга ўргатиш, яхши фазилатларнинг фойдаси, ёмон одатларнинг зарари қандай оқибатга олиб келиши ҳақида болаларнинг ўзларига хулоса чиқартириш жуда фойдали.
Шуни унутмаслик керакки, оилани идора этишда, фарзанд тарбиясида эр-хотин саботли, қатъиятли бўлишлари керак. Эр-хотин ўртасидаги ўзаро муҳаббат, ишонч, ҳамкорлик ва ҳам-фикрлик, самимийлик фарзанд учун намуна мактабидир.
Ота-онанинг тинч-тотувлиги ва ўзаро меҳр-муҳаббати бола учун ҳақиқий ибратдир. Яхши хусусиятларни ўз хулқларида мужассам этган ва бири-бирига монанд ота-она тарбиялаган фарзандлар гўзалликка иштиёқманд, руҳан тетик, жисман соғлом, бағри бутун, ҳаётга қизиқувчан, тинч-тотув, оилавий ҳаёт кечиришга тайёр инсонлар бўлиб вояга етади.
Набира ОразИмбетова, 10-сонли МТТ психологи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
