OILADA YaXShI TARBIYa OLGAN BOLA JAMIYaTNING ULKAN YuTUGʻIDIR
Oila – tarbiya maskani. Oilada tarbiya qanchalik erta boshlansa, natijasi ham shuncha barvaqt koʻzga tashlanadi. Oilada bola ota-onadan ibrat olgan holda shakllanadi. Ota-ona bolaga tarbiya jarayonida nutq madaniyati, odamiylik xislatlarini qunt bilan singdirib borsa, kelajakda u barkamol, sogʻlom, mustaqil fikrlovchi, eng asosiysi, odobli shaxs boʻlib yetishadi. Sababi bola bilim olish, intilish, Vatanini sevish, ardoqlash, kattalarni hurmat qilish, muomala madaniyatini ota-onadan oʻrganadi.
Yosh avlodga maʼnaviy-axloqiy, madaniy tarbiya berishning usul va vositalari xilma-xil boʻlib, bular ichida ertaklardan foydalanish alohida oʻrin tutadi.
Ertaklar xalqning koʻngil oynasi boʻlib, ularda xalq orzu-umidlari, armonlari, ezgu niyatlari, ichki kechinmalari yorqin aks etadi. Aslida ertaklar tarbiyaning bir qurolidir. Sababi bolalar ertaklarga ishonadi. Ertaklar taʼsirida bolalar qalbida umid, ishonch, ezgulik tuygʻulari kurtak otadi, dunyoni anglashga imkon yaratiladi. Yosh avlod ongi aynan ertaklar taʼsirida vatanparvarlik, mehnatsevarlik kabi tuygʻulardan oziqlanadi va tasavvuri boyiydi. Oilada kitoblar oʻqilib turilsa, bolada kitobga boʻlgan mehr uygʻonadi. Shuni taʼkidlash joizki, bola tarbiyasi bilan jiddiy shugʻullangan ota-onalarning farzandlari taʼlim tashkilotida oʻz imkoniyatlarini mashgʻulot jarayonida qiynalmasdan koʻrsata oladi.
Ertaklarni oʻrganish davrida bolalarda har xil fikrlar tugʻilishi mumkin. Ertakdagi ayrim qahramonlar bolaga yoqmasligi yoki ayrimlari juda maʼqul koʻrinishi mumkin. Masalan «Birlashgan oʻzar» ertagi oxirida otaning farzandiga qilgan nasihatlari orqali ahillik, birdamlik, mehnatsevarlik, rostgoʻylik, yaxshi fazilat, ota-onaning gaplariga quloq solmaslik, noahillik esa yomon odatligini solishtirishga oʻrgatish, yaxshi fazilatlarning foydasi, yomon odatlarning zarari qanday oqibatga olib kelishi haqida bolalarning oʻzlariga xulosa chiqartirish juda foydali.
Shuni unutmaslik kerakki, oilani idora etishda, farzand tarbiyasida er-xotin sabotli, qatʼiyatli boʻlishlari kerak. Er-xotin oʻrtasidagi oʻzaro muhabbat, ishonch, hamkorlik va ham-fikrlik, samimiylik farzand uchun namuna maktabidir.
Ota-onaning tinch-totuvligi va oʻzaro mehr-muhabbati bola uchun haqiqiy ibratdir. Yaxshi xususiyatlarni oʻz xulqlarida mujassam etgan va biri-biriga monand ota-ona tarbiyalagan farzandlar goʻzallikka ishtiyoqmand, ruhan tetik, jisman sogʻlom, bagʻri butun, hayotga qiziquvchan, tinch-totuv, oilaviy hayot kechirishga tayyor insonlar boʻlib voyaga yetadi.
Nabira OrazImbetova, 10-sonli MTT psixologi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
