ФАН ОЙЛИГИ ДОИРАСИДАГИ ТАДБИРЛАР ЎҚУВЧИЛАРНИНГ ЧЕТ ТИЛИГА ҚИЗИҚИШЛАРИНИ ЯНАДА ОШИРДИ

Келажагимиз эгалари бўлган ёш авлоднинг ҳар томонлама етук, баркамол, юксак маънавиятли, ватанпарвар шахслар бўлиб етишиши йўлида амалга оширилаётган саъй-ҳаракатларда уларга таълим-тарбия бераётган педагог ходимларнинг етарли билим ва маҳоратга эга бўлиши муҳим аҳамият касб этади. Шу боисдан ҳам умумий ўрта таълим муассасалари ўқитувчиларининг касб маҳоратини тобора ошира бориш, таълим-тарбия жараёнининг замонавий талаблар даражасида бўлишини таъминлаш, уларнинг ижодий изланишларини қўллаб-қувватлаш долзарб вазифалардан ҳисобланади.
Мамлакатимиз умумий ўрта таълим муассасаларида ўқув йилининг ҳар бир ойи маълум фанлар ойлиги сифатида белгилангани ҳам фан ўқитувчиларининг ўқувчи-ёшларга ўз фанини қай даражада ўргата олганини, дарс ўтишдаги маҳоратини синовдан ўтказишга хизмат қилади.

Туманимиздаги 1-сонли мактабда ҳам ноябрь – чет тиллар фан ойлиги  доирасида ўқитувчилар маҳоратини, билимини, ўқувчиларнинг чет тилларни қай даражада ўзлаштирганликларини яққол намоён этган кўплаб тадбирлар ўтказилди. Аввал чет тиллар услуб бирлашмасининг ойлик мобайнида амалга оширадиган ишларининг режалари ишлаб чиқилиб, маъқулланди. Режага мувофиқ ҳар бир ўқитувчига вазифалар топширилди. Шу асосда  қизиқарли ўйинлар, савол-жавоб кечалари, викториналар ташкил этилиб, очиқ дарслар ўтказилди.

Ушбу тадбирларда мактабнинг чет тиллар услуб бирлашмаси ўқитувчилари ҳам иштирок этишиб, ўқитувчининг маҳоратини, ўқувчилар диққатини тадбирга жалб эта олишига, қизиқтира олишига холисона баҳо бердилар. Интерактив усулда ўтказилган ҳар бир тадбирда ўқувчиларнинг фаол иштироки таъминланди ва чет тилларни мукаммал  ўрганишга қизиқишлари ошди. Хусусан, 1-“А” синфда Ирода Сафарбоева, 9-“А” синфда Муҳаббат Худойберганова, 6-“В” синфда Зивар Отажонова, 6-“А” синфда Барно Муродова, 7-“В” синфда Мавлуда Усмонова, 10-“Б” синфда Фариза Ражабовалар очиқ дарс тарзида ташкиллаштирган ўқув машғулотларида янги педагогик технологиялардан, интерактив ўйинлардан фойдаланилди ва ўқувчиларнинг фаоллиги оширилди. Ўтказилган очиқ дарслар ўқувчиларга жуда манзур бўлди. Шунингдек, педагогларнинг ҳамкасблари, мактаб маъмурияти томонидан яхши баҳоланди.

Шунингдек, рус тили фани ўқитувчиси Шарифажон Абдолованинг очиқ дарси инновацион педтехнологиялар асосида қизиқарли ўтди. Унда мактаб раҳбарлари, фан ўқитувчилари, ўқувчилар ота-оналари вакиллари ҳам иштирок этдилар ва ўқитувчининг касб маҳоратини эътироф этдилар. Рус тили  фани ўқитувчилари Инобат Тожибоева, Дилором Йўлдошева, Муҳаббат Эшимбетова, Матлуба Эшимбетова ва Нодира Отамуродовалар ҳам ойлик доирасида очиқ дарс ўтказдилар.

Тадбир охирида услуббирлашма аъзолари томонидан дарсларнинг ютуқ ва камчиликлари муҳокама этилди. Бу, албатта, келгусида чет тилларни ўқитиш сифати ва самарасига ижобий таъсир кўрсатади. Эътиборли жиҳати – ойлик доирасидаги барча тадбирлар ўқувчилар фаоллигини, чет тилларга бўлган қизиқишларини оширди. Ўқувчиларнинг билимлари янада бойитилди ва ўқитувчиларга ижодий кўтаринки кайфият бахш этди.

Ойгул Ражабова.