FAN OYLIGI DOIRASIDAGI TADBIRLAR OʻQUVChILARNING ChET TILIGA QIZIQIShLARINI YaNADA OShIRDI

Kelajagimiz egalari boʻlgan yosh avlodning har tomonlama yetuk, barkamol, yuksak maʼnaviyatli, vatanparvar shaxslar boʻlib yetishishi yoʻlida amalga oshirilayotgan saʼy-harakatlarda ularga taʼlim-tarbiya berayotgan pedagog xodimlarning yetarli bilim va mahoratga ega boʻlishi muhim ahamiyat kasb etadi. Shu boisdan ham umumiy oʻrta taʼlim muassasalari oʻqituvchilarining kasb mahoratini tobora oshira borish, taʼlim-tarbiya jarayonining zamonaviy talablar darajasida boʻlishini taʼminlash, ularning ijodiy izlanishlarini qoʻllab-quvvatlash dolzarb vazifalardan hisoblanadi.
Mamlakatimiz umumiy oʻrta taʼlim muassasalarida oʻquv yilining har bir oyi maʼlum fanlar oyligi sifatida belgilangani ham fan oʻqituvchilarining oʻquvchi-yoshlarga oʻz fanini qay darajada oʻrgata olganini, dars oʻtishdagi mahoratini sinovdan oʻtkazishga xizmat qiladi.

Tumanimizdagi 1-sonli maktabda ham noyabr – chet tillar fan oyligi  doirasida oʻqituvchilar mahoratini, bilimini, oʻquvchilarning chet tillarni qay darajada oʻzlashtirganliklarini yaqqol namoyon etgan koʻplab tadbirlar oʻtkazildi. Avval chet tillar uslub birlashmasining oylik mobaynida amalga oshiradigan ishlarining rejalari ishlab chiqilib, maʼqullandi. Rejaga muvofiq har bir oʻqituvchiga vazifalar topshirildi. Shu asosda  qiziqarli oʻyinlar, savol-javob kechalari, viktorinalar tashkil etilib, ochiq darslar oʻtkazildi.

Ushbu tadbirlarda maktabning chet tillar uslub birlashmasi oʻqituvchilari ham ishtirok etishib, oʻqituvchining mahoratini, oʻquvchilar diqqatini tadbirga jalb eta olishiga, qiziqtira olishiga xolisona baho berdilar. Interaktiv usulda oʻtkazilgan har bir tadbirda oʻquvchilarning faol ishtiroki taʼminlandi va chet tillarni mukammal  oʻrganishga qiziqishlari oshdi. Xususan, 1-“A” sinfda Iroda Safarboyeva, 9-“A” sinfda Muhabbat Xudoyberganova, 6-“V” sinfda Zivar Otajonova, 6-“A” sinfda Barno Murodova, 7-“V” sinfda Mavluda Usmonova, 10-“B” sinfda Fariza Rajabovalar ochiq dars tarzida tashkillashtirgan oʻquv mashgʻulotlarida yangi pedagogik texnologiyalardan, interaktiv oʻyinlardan foydalanildi va oʻquvchilarning faolligi oshirildi. Oʻtkazilgan ochiq darslar oʻquvchilarga juda manzur boʻldi. Shuningdek, pedagoglarning hamkasblari, maktab maʼmuriyati tomonidan yaxshi baholandi.

Shuningdek, rus tili fani oʻqituvchisi Sharifajon Abdolovaning ochiq darsi innovatsion pedtexnologiyalar asosida qiziqarli oʻtdi. Unda maktab rahbarlari, fan oʻqituvchilari, oʻquvchilar ota-onalari vakillari ham ishtirok etdilar va oʻqituvchining kasb mahoratini eʼtirof etdilar. Rus tili  fani oʻqituvchilari Inobat Tojiboyeva, Dilorom Yoʻldosheva, Muhabbat Eshimbetova, Matluba Eshimbetova va Nodira Otamurodovalar ham oylik doirasida ochiq dars oʻtkazdilar.

Tadbir oxirida uslubbirlashma aʼzolari tomonidan darslarning yutuq va kamchiliklari muhokama etildi. Bu, albatta, kelgusida chet tillarni oʻqitish sifati va samarasiga ijobiy taʼsir koʻrsatadi. Eʼtiborli jihati – oylik doirasidagi barcha tadbirlar oʻquvchilar faolligini, chet tillarga boʻlgan qiziqishlarini oshirdi. Oʻquvchilarning bilimlari yanada boyitildi va oʻqituvchilarga ijodiy koʻtarinki kayfiyat baxsh etdi.

Oygul Rajabova.