МАКТАБДА «ҚОРАҚАЛПОҚ МИЛЛИЙ КИЙИМЛАРИ» МАВЗУСИДА ОЧИҚ ДАРС ЎТКАЗИЛДИ
«Мактаб вояга етаётган авлод тафаккурини шакллантириш устахонасидир. Агар келажакни қўлдан чиқаришни истамасанг, мактабни қўлда маҳкам тутмоғинг керак», деган эди машҳурлардан бири.
Ҳар бир инсоннинг шаклланишида, ҳаётда ўз ўрнини топишида мактаб таълимининг ўрнини ҳеч нарсага қиёслаб бўлмайди. Бугунги кунда таълим тизимига, ўқитувчиларнинг жамиятдаги нуфузини, мавқеини оширишга, уларни ижтимоий қўллаб-қувватлашга қаратилаётган улкан эътибор замирида ҳам тарбия сифатини оширишдек улкан мақсад мужассам.
Туманимизнинг чекка ҳудуди Уйшин маҳалласида жойлашган 47-сонли умумий ўрта таълим мактабида ҳам ўқувчи-ёшларга фан асосларини чуқур сингдириш, илм-маърифатли қилиб вояга етказишга астойдил ҳаракат қилишмоқда. Ўқитувчилар ўз дарс машғулотлари инновацион технологиялар асосида қизиқарли тарзда ташкил қилишиб, ўқувчиларнинг пухта ўзлаштиришларига эришмоқдалар.
Яқинда мактабнинг қорақалпоқ тили фани ўқитувчиси Садоқат Авазмуродованинг 5-«В» синфида дарс тақдим режасига асосан ташкил этган «Қорақалпоқ миллий қийимлари» мавзусидаги очиқ дарси дарс кузатувчилари бўлган мактаб маъмурияти, ўқитувчилар томонидан юқори баҳоланди.
Очиқ дарсда аввало ўқитувчи ўқувчиларга дарс мавзусини эслатди ва доскага ёзиб қўйди: «Қорақалпоқ миллий кийимлари». Мавзу юзасидан қилган маърузасида қорақалпоқ заминининг тарихи жуда бой эканлигини, мамлакатимизда истиқомат қилувчи халқлар орасида озчиликни ташкил этса-да, ўз миллий анъаналарини, урф-одатларини сақлаб келаётгани, халқи, тарихи каби бу қадриятлари ҳам жуда бой ва ҳаётбахш эканлиги хусусида гапирди. Таъкидланишича, қорақалпоқ халқининг миллий маданияти, жозибали санъати, мумтоз адабиёти ва фольклорида бу яққол кўриниб туради. Ана шундай маънавиятли халқнинг миллий кийимлари ҳам ўзига хос. Уларнинг турмуш тарзига эътибор берилса, бу борада бошқа халқларда учрамайдиган ўзига хос кўпгина жиҳатларни кўриш мумкин. Хусусан, кийинишида ёши, касби, аҳволи, йигитларнинг уйланган ё бўйдоқлиги, қизларнинг ҳам турмушга чиққани ё чиқмагани ифодаланган. Улар пахта, ипак, жундан тўқилган газламалардан, қўй-эчки терисидан ишланган кийимлар кийган. Эркаклар устларига пўстин, чопон, чакмон ва бошига дўппи, малақай, чўгирма каби бош кийимлар кийган. Қорақалпоқ қизлари кичкиналигидан касб-ҳунарга ўргатилган, кийимларига нақшлар билан пардозлар берган, билакузук тақиш урф бўлган, узатилган қиз саукеле бош кийимини кийган.
Шуниси эътиборлики, ўқитувчи синфни дарс мавзусига хос безатиб, қорақалпоқ миллий кийимлари кўргазмасини ташкил этди ва очиқ дарсининг мақсад ва мазмунини, мавзунинг аҳамиятини ўқувчилар онгига сингдиришга ҳаракат қилди.
Ўқитувчи ушбу либосларнинг ҳар бирини алоҳида таърифлаб бериши ўқувчиларда улкан таассуротлар қолдирди. Шунингдек, ўқувчилар ҳам бу борада ўз фикрларини билдириб, қорақалпоқ миллий кийимлари ҳақида кўпгина билимларга эга эканлигини намойиш қилдилар ва шеърлар ижро этдилар.
Очиқ дарс кузатувчиларга ва ўқувчиларга жуда манзур бўлди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
