ФАН ОЙЛИГИ ДОИРАСИДАГИ ТАДБИРЛАР ЎҚУВЧИЛАРНИНГ ҚИЗИҚИШИНИ ОРТТИРМОҚДА

Декабрь – умумтаълим мактабларида тарбия, тарих, ҳуқуқ фан ойлиги доирасидаги бири-биридан қизиқарли тадбирларга бой ўтди.

Амударё туманидаги 23-сонли умумтаълим мактабида ҳам декабрь ойи тарбия, тарих, ҳуқуқ фанлари услубирлашмаси аъзолари томонидан ишлаб чиқилган режавий-жадвал асосидаги очиқ дарслар, савол-жавоб кечалари, синфлараро беллашувлар, заковат баҳсларига бойлиги билан муҳим аҳамиятга эга бўлди.

Айниқса, тарих ва ҳуқуқ фан ойлиги доирасидаги тадбирлар ўқувчиларнинг фаол иштироки билан ўтганидан, ҳатто ота-оналар ҳам мамнун бўлишди. Тарих ва ҳуқуқ фанлари услубирлашмасида фаолият олиб бораётган Муҳаббат Раҳимбоева, Орифжон Юсупов ва Шарофат Раҳимбоевалар томонидан учта синфда очиқ дарслар ўтказилди. «Тарихимиз – маънавиятимиз кўзгуси», «Биз тарихни ўрганамиз» мавзуларида савол-жавоб кечалари, заковат баҳслари ўтказилди. Фан ойлиги доирасида ўтказилган барча тадбирлар ойлик якунида умумлаштирилди. Ўқувчилар фаоллигини ошириш, уларнинг фан ойлиги давомида эгаллаган билим ва кўникмаларини янада мустаҳкамлаш мақсадида Янги йил байрами арафасида 7-синфлар ўқувчилари иштирокидаги фан ойлигининг якуний босқичи учун режалаштирилган «Жайҳун» ва «Асрлар садоси» гуруҳлари ўртасида синфлараро беллашув ўтказилди.

Қизғин баҳслар, заковатни чархловчи савол-жавобларга бой ўтган тадбирда мактаб директори Бобожон Яхшимов иштирок этиб, услуббирлашма аъзолари томонидан тарих ва ҳуқуқ фан ойлиги муваффақиятли ташкил этилганини мамнуният билан эътироф этди. Шу билан бирга 7-синфлар ўртасида ўтказилаётган заковат баҳсларида «Жайҳун» ва «Асрлар садоси» жамоаларига катта ютуқлар тилади.

Тадбирда  «Жайҳун» ва «Асрлар садоси» жамоалари ўзларининг тарих ва ҳуқуқ фанларидан билимдонликларини намойиш этишди. Турли мавзуларда, шунингдек Ватанимиз тарихи, дунё ва дин тарихига оид саволларга аниқ ва пухта жавоб бердилар. Шунингдек, ҳар иккала жамоа фан ойлиги доирасида ўзлари ёзган рефератлар, тайёрлаган тарихий альбомларини ҳам намойиш этдилар. Тадбир якунида фаол ўқувчилар мактаб маъмурияти томонидан тақдирландилар.

Шунингдек, ушбу мактабнинг 3-«А» синфида ўқиш фанидан очиқ дарс ўтказилди. Мавзу «Янги йил ва янги йил билан боғлиқ анъаналар» деб номланди. Ушбу очиқ дарсни ўтказишдан мақсад, пандемия шароитида ўқувчиларнинг жамоа бўлиб байрамни нишонлашларининг олдини олиш, янги йил оилавий байрамлар сирасига киришини, айниқса, ҳозирги пандемия шароити билан боғлиқ Соғлиқни сақлаш вазирлиги томонидан  эълон қилинган чекловларга амал қилган ҳолда байрамни ҳар бир ўқувчи ота-оналари билан кутиб олиш зарурлигини тушунтиришдан иборат эди.

Шундан сўнг, ўқувчиларнинг тушунчаларини янада бойитиш мақсадида «Қиш ойларида болалар қандай ўйинлар ўйнайди?» «Янги йил байрамини қачон ва қаерда ўтказамиз?» каби саволлар бўйича ўқувчиларнинг нутқи синовдан ўтказилди. Улар ушбу саволларга ҳам фаоллик билан жавоб бердилар.

Шуни алоҳида эътироф этиш керакки, мактабда бошланғич синфларда  уч нафар ўқитувчи фаолият юритади. Улар ўз фаолиятлари давомида ўзаро тажриба алмашиш, синфлараро беллашувлар, фанлар бўйича савол-жавоб кечалари ўтказиш борасида доимий ҳамкорлик қилишади. Бу эса ўқувчиларнинг бири-биридан қолишмай, ўзаро мусобақа тарзида билим олишларида муҳим аҳамият касб этмоқда.

Робия ЙЎЛДОШЕВА.