ПРЕЗИДЕНТИМИЗ ЁШЛАРНИ “ЎЗБЕКИСТОННИНГ ЭНГ КАТТА БОЙЛИГИ, БЕБАҲО ХАЗИНАСИ”, ДЕБ АТАДИЛАР

Ўзбекистон Республикаси Президенти иштирокида 2020 йил
25 декабрь кунги мамлакат ёшлари билан видеоселектор тарзида ўтказилган “Ўзбекистон ёшлари” форуми Республикамизда илк маротаба ташкил қилинган нуфузли анжуман сифатида ёшлар ҳаётида чуқур из қолдирди. Айниқса, Президентимизнинг: “Мен ҳар гал ёшларимиз билан учрашганимда, сизларнинг ғайрат-шижоатингиздан куч-қувват оламан, кўнглим тоғдай кўтарилади. Ҳар бирингиз жонажон Ватанимиз ва халқимизга сидқидилдан хизмат қилиш орзуси билан ёниб яшаётганингизни яхши биламан. Сизларни Ўзбекистоннинг энг катта бойлиги, бебаҳо хазинаси сифатида юксак қадрлайман”, - деган сўзлари биз ёшларни руҳлантириб юборди.

2020 йил 29 декабрь куни эса Олий Мажлисга ва халқимизга йўллаган Мурожаатномасида 2021 йилга мамлакатимизда “Ёшларни қўллаб-қувватлаш ва аҳоли саломатлигини мустаҳкамлаш йили”, деб ном беришни таклиф этганларида бизга янада масьулият ва катта ишонч билдирилаётганини чин дилдан ҳис этдим.

2021 йилда мамлакатимизда 10 та Президент мактаби, кимё-биология, математика, ахборот технологияларига ихтисослашган 197 та мактаб ўз фаолиятини бошлашининг ўзи ёшлар учун жуда катта имконият эшиклари очилаётганидан далолатдир. Бунинг амалий ижросини туманимизда ўз фаолиятини бошлаш арафасида турган иқтидорли ёшлар мактаби мисолида ҳам яққол кўриш мумкин.

Бундан ташқари, ёшлар тадбиркорлиги ва бандлигини таъминлаш учун 100 миллион доллар маблағ ажратилиши кўзда тутилаётгани янада қувонарли. Хусусан, “Ҳар бир тадбиркор – ёшларга мададкор” тамойили асосида кўнгилли тадбиркорларни жалб этган ҳолда, 1 нафар тадбиркорга 1 нафардан ишсиз ёшларни бириктириш ташаббуси амалга оширилади. “Ҳунарли киши хор бўлмас”, ғояси асосида ҳунарманд-усталар қўлида ишсиз ёшларга касб-ҳунар ўргатиш мақсадида ҳудудларда устоз-шогирд анъанаси мутлақо янги кўринишда ташкил этилади. Бунда, уч ой муддатда устоз-шогирд анъанасига жалб этиладиган ҳунарманд-усталарни Бандликка кўмаклашиш жамғармасидан моддий рағбатлантириш тизимини жорий этиш режалаштиришмоқда. Ушбу режага кўра, туманимизда ҳам “Ёшлар кичик саноат зоналари” ташкил этилади.

2021 йилда касб-ҳунар ва тадбиркорликка ўқиб, сертификат олган ёшларга имтиёзли фоизларда микрокредитлар ажратилади. Бундай кредитларни 3 йил имтиёзли даври билан 7 йил муддатга бериш, банк томонидан ушбу мақсадлар учун  2021 йилда 45 миллион долларлик микрокредитлар ажратиш кўзда тутилган.

Президентимиз ўз Мурожаатномасида ёшларни қувонтирадиган яна бир ғояни илгари сурдилар. Яъни, ҳар бир туман ва шаҳардан камида 5 нафардан ёшларни маданият ва санъат олийгоҳларида маҳаллий бюджет ҳисобидан ўқитиш бўйича дастур ишлаб чиқилиб, амалга оширилади. 2021 йилдан бошлаб ҳар йили ҳар бир туман ва шаҳар ҳокимлари томонидан 10-15 нафар истеъдодли ёшларни саралаб, уларни ҳар томонлама тарбиялаш ва мунтазам рағбатлантириш тизими йўлга қўйилади.

Ёшларнинг халқаро “IТ” сертификатларини олиш харажатларининг
50 фоизгача бўлган қисмини бюджетдан қоплаб бериш тартиби ишлаб чиқилиб, жорий этилади. “Бир миллион дастурчи” лойиҳаси доирасида 2021-2022 йилларда 300 минг нафар ёшларни компьютер дастурлаш асосларига бепул ўқитилади. “Камалак юлдузлари”, “Йилнинг энг фаол ёшлар етакчиси”, “Йил сардори”, “Талабалар фестивали”, “Интеллектуал ўйинлар” ҳафталиги, “Йил талабаси” сингари кўрик-танлов ва мусобақалар ташкил этилади. Олий таълим муассасаларига кириш имтиҳонларида энг юқори балл тўплаган 200 нафар ёшлар учун “Президент гранти” жорий этилади.

Икки ва ундан ортиқ фарзанди олий ўқув юртида шартнома асосида ўқиётган оилаларга имтиёзли таълим кредити бериш тартиби жорий қилиниб, бунда, кредитни ўқиш даври тугаб, ёшлар ишга жойлашгандан сўнг қайтариш назарда тутилган.

 Осиё ўйинлари дастурига киритилган спорт турлари бўйича туман, шаҳар, вилоят ва республика чемпионатлари, “Ҳоким кубоги” мусобақалари ташкил этилади. Ҳар бир ҳудуд ва соҳа кесимида “Ватанпарвар” ташкилоти базасида ёшлар меҳнат бозорида эҳтиёж юқори бўлган касбларга ўқитилади. Алишер Навоий, Бердақ, Ибройим Юсупов, Кунхўжа, Ажиниёз Қосибой ўғли, Тўлепберген Қаипбергенов каби улуғ адиблар хотирасига Нукус шаҳрида “Адиблар ҳиёбони” барпо этилади.

Буларнинг барчаси ёшларни ҳар томонлама қўллаб-қувватлаш, қобилият ва иқтидорларини намоён этишлари, жисмонан етук, маънан баркамол инсон сифатида шаклланишлари учун зарур шарт-шароитлар яратиш, ёшларни ҳар томонлама тарбиялаш, ютуқларини рағбатлантириб бориш орқали, Президентимиз таъбири билан айтганда, ҳар  бир ёшни “Ўзбекистоннинг энг катта бойлиги, бебаҳо хазинаси”га айлантиришга қаратилган. Демак,  Президентимизнинг юксак ишончига муносиб яшаш, ўқиш, меҳнат қилиш, она Ватан тараққиётига ўз ҳиссамизни қўшиш ҳар биримизнинг зиммамиздаги бурчимиздир.

Жасур ДАВЛЕТОВ, Ёшлар ишлари Агентлиги туман бўлими бошлиғи.