ҚИЛИЧБОЙДАГИ 27-СОНЛИ МАКТАБГАЧА ТАЪЛИМ ТАШКИЛОТИ БОЛАЖОНЛАРНИНГ СЕВИМЛИ МАСКАНИ
Мамлакат келажаги бўлган ёшларни тарбиялаш, аввало, боғча ва мактаблардан бошланади. Шу боис, юртимизда мазкур соҳани янада тараққий эттириш ҳамда фарзандларимиз учун барча шароитларни яратиш йўлида тизимли ишлар амалга оширилмоқда.
Мактабгача таълим соҳаси узлуксиз таълим тизимининг бирламчи бўғини ҳисобланди ва ҳар томонлама соғлом ва баркамол шахсни тарбиялаб, мактабга тайёрлашда ғоят муҳим аҳамият касб этади. Шунга кўра мамлакатимизда 2017-2021 йилларда мактабгача таълим тизимини янада ривожлантириш Дастури доирасида мактабгача таълим муассасалари фаолиятини ташкил этиш, қуриш, реконструкция қилиш ҳамда мукаммал таъмирлаш борасида муайян ишлар амалга оширилмоқда.
Қиличбой овулидаги 27-сонли мактабгача таълим ташкилоти биноси 1980 йилда қурилганлиги сабабли жуда эскирган, шу сабабли 110 нафар ўрнига 55 нафар кичкинтойга таълим-тарбия ишлари олиб борилаётган эди. Президентимизнинг “2018 йилда мактабгача таълим муассасаларини қуриш, реконструкция қилиш ва капитал таъмирлаш манзилли дастури тўғрисида”ги Қарори асосида туман ҳокимлиги ва туман Мактабгача таълим бўлими ташаббуси билан ушбу ташкилотда ҳам қурилиш-таъмирлаш ишлари бошлаб юборилди.
Тумандаги “Амударё махсус қурилиш” масъулияти чекланган жамияти томонидан 3 млрд. 138 млн.дан зиёд маблағ эвазига ташкилотнинг бино ва иншоотлари янгидан қурилди. Мазкур муассаса 125 нафар болага мўлжаллаб, қисқа вақт ичида бунёд этилди. Ўйин майдончалари, ошхона, мусиқа ва спорт заллари замонавий гиламлар, жиҳозлар билан таъминланди. Кичкинтойлар учун ҳар хил ўйинчоқлар, машғулотлар доир кўргазмали воситалар билан безатилди. Бундан овул аҳли, айниқса, аёл-қизларнинг қувончи ниҳоятда чексиз бўлди ва ўз фарзандларининг ушбу замонавий кўринишдаги ташкилотга мунтазам қатнашларини таъминлашди.
2019 йилнинг ноябрь ойида фойдаланишга топширилган ташкилотда айни пайтда 5 та гуруҳда 125 нафар кичкинтой тарбияланмоқда. Замонавий кўринишга эга мазкур ташкилот тарбиячилари малакали, ширинсўз. Муассасада 7 нафар олий маълумотли, 3 нафар тугалланмаган олий, 20 нафар ўрта-махсус маълумотли педагог ходимлар фаолият юритмоқда. Кундалик машғулотлардан ташқари рус, инглиз тили, шахмат, шашка, расм чизиш, жисмоний тарбия, мусиқа ва рақс тўгараклари, қизларжон клубларида мунтазам равишда кичкинтойларга таълим-тарбия бериш ишлари олиб борилмоқда. Болажонларга ташкилот раҳбари Муҳаббат Раҳимова бошчилигида малакали тарбиячилардан Нилуфар Садикова, Дилбар Ҳайитова, Ойгул Артикова, Зуҳра Йўлдошеа, Дилрабо Бозорбоевалар томонидан сифатли таълим-тарбия бериб келинмоқда. Шунингдек, тўгаракларда мусиқадан Озод Раҳимов, жисмоний тарбиядан Моҳира Аҳмедова, рақс бўйича Муножот Шарифбоевалар машғулотларни қизиқарли тарзда ўтказиб, кичкинтойларнинг қизиқишларини оширишмоқда.
Ундан ташқари, ташкилотда озиқ-овқат маҳсулотларининг сифатли, хавфсиз ва санитария-гигиена талабларига тўлиқ риоя қилинган ҳолда тайёрланишига жиддий эътибор қаратилиб келинмоқда. Тарбияланувчиларга белгиланган стандартларга мувофиқ, сифатли, тўйимли ҳамда фойдали таом ва егуликлар тайёрлаб берилмоқда.
Қиличбой овулидаги мазкур 27-сонли мактабгача таълим ташкилотидаги шароитлар, яъни болаларнинг ўйин майдончалари, овқатланиш, ювиниш, дам олиш хоналари барча талабларга мос. Бу, албатта, келажак эгалари бўлган ёш авлоднинг сифатли бошланғич билим олишлари, ҳар томонлама соғлом ўсиб-улғайишига хизмат қилади.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
