QILIChBOYDAGI 27-SONLI MAKTABGAChA TAʼLIM TAShKILOTI BOLAJONLARNING SEVIMLI MASKANI
Mamlakat kelajagi boʻlgan yoshlarni tarbiyalash, avvalo, bogʻcha va maktablardan boshlanadi. Shu bois, yurtimizda mazkur sohani yanada taraqqiy ettirish hamda farzandlarimiz uchun barcha sharoitlarni yaratish yoʻlida tizimli ishlar amalga oshirilmoqda.
Maktabgacha taʼlim sohasi uzluksiz taʼlim tizimining birlamchi boʻgʻini hisoblandi va har tomonlama sogʻlom va barkamol shaxsni tarbiyalab, maktabga tayyorlashda gʻoyat muhim ahamiyat kasb etadi. Shunga koʻra mamlakatimizda 2017-2021-yillarda maktabgacha taʼlim tizimini yanada rivojlantirish Dasturi doirasida maktabgacha taʼlim muassasalari faoliyatini tashkil etish, qurish, rekonstruktsiya qilish hamda mukammal taʼmirlash borasida muayyan ishlar amalga oshirilmoqda.
Qilichboy ovulidagi 27-sonli maktabgacha taʼlim tashkiloti binosi 1980-yilda qurilganligi sababli juda eskirgan, shu sababli 110 nafar oʻrniga 55 nafar kichkintoyga taʼlim-tarbiya ishlari olib borilayotgan edi. Prezidentimizning “2018-yilda maktabgacha taʼlim muassasalarini qurish, rekonstruktsiya qilish va kapital taʼmirlash manzilli dasturi toʻgʻrisida”gi Qarori asosida tuman hokimligi va tuman Maktabgacha taʼlim boʻlimi tashabbusi bilan ushbu tashkilotda ham qurilish-taʼmirlash ishlari boshlab yuborildi.
Tumandagi “Amudaryo maxsus qurilish” masʼuliyati cheklangan jamiyati tomonidan 3 mlrd. 138 mln.dan ziyod mablagʻ evaziga tashkilotning bino va inshootlari yangidan qurildi. Mazkur muassasa 125 nafar bolaga moʻljallab, qisqa vaqt ichida bunyod etildi. Oʻyin maydonchalari, oshxona, musiqa va sport zallari zamonaviy gilamlar, jihozlar bilan taʼminlandi. Kichkintoylar uchun har xil oʻyinchoqlar, mashgʻulotlar doir koʻrgazmali vositalar bilan bezatildi. Bundan ovul ahli, ayniqsa, ayol-qizlarning quvonchi nihoyatda cheksiz boʻldi va oʻz farzandlarining ushbu zamonaviy koʻrinishdagi tashkilotga muntazam qatnashlarini taʼminlashdi.
2019-yilning noyabr oyida foydalanishga topshirilgan tashkilotda ayni paytda 5 ta guruhda 125 nafar kichkintoy tarbiyalanmoqda. Zamonaviy koʻrinishga ega mazkur tashkilot tarbiyachilari malakali, shirinsoʻz. Muassasada 7 nafar oliy maʼlumotli, 3 nafar tugallanmagan oliy, 20 nafar oʻrta-maxsus maʼlumotli pedagog xodimlar faoliyat yuritmoqda. Kundalik mashgʻulotlardan tashqari rus, ingliz tili, shaxmat, shashka, rasm chizish, jismoniy tarbiya, musiqa va raqs toʻgaraklari, qizlarjon klublarida muntazam ravishda kichkintoylarga taʼlim-tarbiya berish ishlari olib borilmoqda. Bolajonlarga tashkilot rahbari Muhabbat Rahimova boshchiligida malakali tarbiyachilardan Nilufar Sadikova, Dilbar Hayitova, Oygul Artikova, Zuhra Yoʻldoshea, Dilrabo Bozorboyevalar tomonidan sifatli taʼlim-tarbiya berib kelinmoqda. Shuningdek, toʻgaraklarda musiqadan Ozod Rahimov, jismoniy tarbiyadan Mohira Ahmedova, raqs boʻyicha Munojot Sharifboyevalar mashgʻulotlarni qiziqarli tarzda oʻtkazib, kichkintoylarning qiziqishlarini oshirishmoqda.
Undan tashqari, tashkilotda oziq-ovqat mahsulotlarining sifatli, xavfsiz va sanitariya-gigiyena talablariga toʻliq rioya qilingan holda tayyorlanishiga jiddiy eʼtibor qaratilib kelinmoqda. Tarbiyalanuvchilarga belgilangan standartlarga muvofiq, sifatli, toʻyimli hamda foydali taom va yeguliklar tayyorlab berilmoqda.
Qilichboy ovulidagi mazkur 27-sonli maktabgacha taʼlim tashkilotidagi sharoitlar, yaʼni bolalarning oʻyin maydonchalari, ovqatlanish, yuvinish, dam olish xonalari barcha talablarga mos. Bu, albatta, kelajak egalari boʻlgan yosh avlodning sifatli boshlangʻich bilim olishlari, har tomonlama sogʻlom oʻsib-ulgʻayishiga xizmat qiladi.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
