ТУМАН ҲОКИМИ ҚИПЧОҚ ОВУЛИ АҲОЛИСИ БИЛАН САЙЁР УЧРАШУВ ЎТКАЗДИ

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаркатлар стратегиясида, мамлакатимиз Президенти Ш.Мирзиёевнинг 2020 йил 29 декабрдаги Олий Мажлисга қилган Мурожаатномасида, “Ёшларни қўллаб-қувватлаш ва аҳоли саломатлигини мустаҳкамлаш йили” Давлат дастурида аҳолининг турмуш сифатини ошириш, “Темир дафтар”га киритилган аёллар ва ёшлар манфаатларини ҳимоя қилиш, иш билан бандлигини таъминлаш борасидаги белгиланган вазифалар ижросини таъминлаш мақсадида шу йилнинг 11 март куни туман ҳокими, 1-сектор раҳбари Султонбой Йўлдашев, Президентнинг туманимиздаги Халқ қабулхонаси мудири Эркин Ражабов билан биргаликда 1-сектор ҳудудидаги Қипчоқ овул фуқаролар йиғинида аҳоли билан сайёр учрашув ўтказилди.

Учрашувда 1-сектор ишчи гуруҳи, сектор ҳудудидаги Қипчоқ овули ҳамда Қипчоқ шаҳарчасида истиқомат қилувчи “Аёллар дафтари”, “Ёшлар дафтари”га киритилган аёллар, ёшлар ҳамда “Темир дафтар”га киритилган ёрдамга муҳтож оилалар вакилларидан ташқари, тумандаги корхона, ташкилот, муассасалар раҳбарлари, тижорат банкларнинг туман филиаллари бошқарувчилари иштирок этдилар.

Учрашувда дастлаб туман ҳокими Султонбой Йўлдашев ҳудуддаги “Темир дафтар”, “Аёллар дафтари”, “Ёшлар дафтари”га киритилган фуқароларга кўрсатилаётган ғамхўрликлар, уларнинг меҳнатга лаёқатлиларининг иш билан бандлигини таъминлаш орқали оиласини муҳтожликдан чиқариш юзасидан олиб борилаётган саъй-ҳаракатлар ҳақида, хусусий тадбиркорлик фаолияти билан шуғулланиш истагида бўлган ёшларни тадбиркорликка ўқитиш, касб-ҳунарга ўқитиш туфайли иш билан бандлигини таъминлашга эътибор қаратилаётгани ҳақида гапирди. Боиси оила қачонки, доимий даромадга эга бўлса, моддий етишмовчиликдан шундагина халос бўлади. Бу борада ёшларнинг ўзларининг интилишлари, ҳаракатлари асосий ўрин тутади. Чунки ҳар қандай фаолият муқаддимаси ҳам одамга қийинчиликлар туғдириши мумкин. Муҳими, одам ўз аҳдидан қайтмаслиги керак. Бу борада секторлар ишчи гуруҳлари мурожаат қилувчиларга маслаҳатлар, амалий ёрдамлар беришга доимо шай.

Учрашувда иштирок этган 60 нафардан ортиқ фуқароларнинг 27 та таклиф ва мурожаатлари тингланди. Уларнинг 4 таси “Ҳар бир ёшга – 1 гектар ер” лойиҳаси доирасида деҳқончилик қилиш учун ер майдони ажратиб бериш, 4 таси тадбиркорлик фаолиятини ташкил этиш учун имтиёзли фоизларда кредит олиш, 2 таси уй-жой қуриш учун ер майдони ажратиб бериш, 2 таси иш билан бандлигини таъминлаш сўралган мурожаатлардир. Шунингдек, 15 таси бошқада маслалар юзасидан.

Ушбу мурожаатларнинг 7 таси жойида ҳал қилинди, 3 тасига амалдаги қонунлар доирасида тегишли тушунтиришлар берилди, қолган мурожаатларни ҳал қилиш юзасидан корхона, ташкилот, муассасалар раҳбарларига топшириқлар берилди ва ижроси назоратга олинди.

Аҳоли ҳаёти сифатини ошириш мақсадида юзма-юз мулоқот тарзида ўтказилган учрашув иштирокчилари туман раҳбарининг мурожаатларига эътибор бериб, ижобий ҳал қилганлигидан жуда миннатдор бўлдилар.

О.РАЖАБОВА.