ХАЛҚ ДЕПУТАТЛАРИ АМУДАРЁ ТУМАН КЕНГАШИНИНГ 30-СЕССИЯСИ ТЎҒРИСИДА АХБОРОТ

2021 йил 26 март куни Амударё тумани ҳокимлигининг мажлислар залида Халқ депутатлари Амударё туман Кенгашининг 30-сессияси бўлиб ўтди.

Сессия мажлисида сектор раҳбарлари, туман ҳокими ўринбосарлари, ҳокимлик масъул ходимлари, ҳуқуқ-тартибот органлари, бўлимлар раҳбарлари ҳамда оммавий ахборот воситалари вакиллари иштирок этдилар. Сессияга туман ҳокими Султонбой Йўлдашев раислик қилди.

Кун тартибига ҳавола қилинган биринчи масала, яъни судлар томонидан фуқаролар ҳуқуқлари ва эркинликларини, корхоналар, муассасалар ва ташкилотларнинг ҳуқуқлари ҳамда қонун билан қўриқланадиган манфаатларини ҳимоя қилиш ҳамда одил судловни амалга оширишга доир  2021 йилнинг январь-февраль ойларидаги фаолияти тўғрисида Жиноят ишлари бўйича Амударё туман суди раиси Султонмурод Давлетмуродовнинг ахбороти тингланди.

2021 йилнинг январь-февраль ойлари давомида Жиноят ишлари бўйича Амударё туман судига жами 23 шахсга нисбатан 20 та жиноят иши, жами 279 шахсга нисбатан 231 та маъмурий ишлар келиб тушган ва кўриб чиқилган.

Сессия кун тартибига қўйилган Ўзбекистон Республикаси Президентининг 2020 йил 18 декабрдаги “Ҳудудларда муҳандислик-коммуникация инфратузилмасини янада ривожлантириш чора-тадбирлари тўғрисида”ги Қарори ижроси ҳақидаги иккинчи масала юзасидан туман ҳокими ўринбосари Жасур Наримов ахборот бериб ўтди.

Ахборотда таъкидланганидек, жорий йилда туманимизнинг 16 та овул ва маҳаллалари ҳудудидаги умумий қиймати 7 млрд 800 млн сўмлик 49 км узунликдаги электр тармоқларини тортиш, 14 та трансформатор пунктларининг ҳолатини яхшилаш, 1 минг 105 та электр симёғочларини янгилаш режалаштирилган.

Газ таъминотини яхшилаш мақсадида 2,2 км газ тармоқларини реконструкция қилиш, 1 та газ тақсимлаш пунктини мукаммал таъмирлаш, 230 та газ тақсимлаш пунктларини тафтиш қилиш, 35 км газ қувурларини зичликка синаш, 15,8 км ер ости газ қувурларининг ҳолатини текшириш ва 5 км газ тармоқларини бўёқ қилиш ишларини амалга ошириш режалаштирилган.

Сессия кун тартибидаги навбатдаги масала, яъни “Табиий газ назорати ва ҳисобининг автоматлаштирилган тизимини жорий этиш” лойиҳасини амалга ошириш борасида олиб борилаётган ишлар тўғрисида “Амударётумангаз” газ таъминоти бўлими бошлиғи Жасур Ерметов ҳисоботи тингланди.

Ҳисоботда қайд этилганидек, туман бўйича 13210 та хонадонга замонавий газ ҳисоблаш ускуналарини ўрнатиш режалаштирилган бўлиб, ҳозирги кунгача 582 та хонадонга “ақлли” ҳисоблагичларни ўрнатиш ишлари якунига етказилган.

Кун тартибига киритилган “Туманда сув ресурсларини бошқариш, сув хўжалиги объектларининг техник ҳолатини яхшилаш, шунингдек сув тежовчи суғориш технологияларини жорий этиш ҳолати тўғрисида”ги масала юзасидан туман Ирригация бўлими бошлиғи Жамол Ражабов ҳисобот берди.

Ҳисоботда таъкидланганидек, 2021 йилда шўр ювиш даври учун ажратилган сув лимити сув истеъмолчиларига ўн кунликлар бўйича тақсимланиб, сув истеъмолчилари уюшмаси билан сувдан фойдаланиш бўйича шартномалар тўлиқ тузилган. Ирригация бўлими ва сув истеъмолчилари уюшмаси ўртасида 328 та сувнинг доимий ҳисоб-китоб журналлари ташкил этилган. 2021 йилги шўр ювиш даври учун туман бўйича 157,5 млн куб метр сув лимити белгиланган бўлиб, амалда 121,3 млн. куб метр сув истеъмолчиларга етказиб берилди. Ушбу олинган сув миқдори билан 24 минг 142 гектар майдон суғорилган бўлиб, сувдан фойдаланиш коэффициенти 0,91 ни ташкил қилмоқда.

Шундан сўнг, Амударё тумани Халқ таълими бўлимига қарашли мактабларда бўш турган директор лавозимларига ўтказилган танлов якунлари бўйича   номзодларга келишим бериш масаласи кўриб чиқилди.

Маълумки, 2020 йил 6 ноябрда Ўзбекистон Республикаси Президентининг “Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида”ги Фармони қабул қилинган эди. Фармоннинг 11-бандига мувофиқ 2021 йил 1 январдан бошлаб, умумтаълим муассасалари директорларини лавозимга тайинлаш ҳамда иш берувчининг ташаббусига кўра лавозимидан озод этишнинг Қорақалпоғистон Республикаси Халқ таълими вазирлиги, вилоятлар бошқармалари ва Тошкент шаҳар бош бошқармаси томонидан тегишли халқ депутатлари туман Кенгашлари билан келишилган ҳолда амалга ошириш тартиби жорий этилган.

Сессияда тумандаги 9-, 18- ва 25-сонли мактабларда директор лавозими вакант ҳисобланиб, Қорақалпоғистон Республикаси халқ таълими вазирлиги томонидан ушбу вакант директор лавозимлари учун эълон берилганлиги, танловда иштирок этиш учун талабгорлар ариза билан мурожаат этганлиги, номзодларнинг ҳужжатлари, уларнинг белгиланган малака талабларига мослиги ўрганиб чиқилганлиги ҳамда бир неча номзодлар туман Кенгаши сессиясига кўриб чиқиш учун тавсия этилганлиги маълум қилинди.

Мактаб директори лавозимига номзодлар келгуси 3 йил ичида мактабда таълим сифатини яхшилаш бўйича ўзларининг дастурларини депутатлар эътиборига ҳавола қилди. Тақдимотлардан кейин депутатлар яширин овоз бериш орқали энг муносиб номзодларни танладилар.

Яширин овоз бериш натижаларига кўра “Қизилчоли” маҳалласидаги 9-сонли умумтаълим мактаби директори лавозимига Якубов Шухрат Қурбонбоевич, Амир Темур овулидаги 25-сонли умумтаълим мактаби директори лавозимига Джаббаров Аманмурод Гаипович ва “Қипчоқ” овулидаги 18-сонли умумтаълим мактаби директори лавозимига Раджапов Ибрагим Арзимбетовичлар номзоди муносиб деб топилди.

Сессия кун тартибига киритилган барча масалалар атрофлича кўриб чиқилди. Кўрилган масалалар юзасидан тегишли қарорлар қабул қилинди.

Туман ҳокимлигининг ахборот хизмати.