ҚОРАҚАЛПОҒИСТОН РЕСПУБЛИКАСИ КОНСТИТУЦИЯСИНИНГ 28 ЙИЛЛИГИ МУНОСАБАТИ БИЛАН ОЧИҚ ДАРС ЎТКАЗИЛДИ
Умумтаълим мактабларининг бошланғич синфларида ўтказиладиган очиқ дарс-машғулотлари нафақат ўқувчиларнинг янги мавзу бўйича билим ва кўникмаларини, балки ўқитувчининг ҳам маҳоратини ошириш имконини беради. Чунки, ўқитувчи очиқ дарсга тайёргарлик жараёнида замонавий технологиялардан фойдаланиб, дарс мавзусининг ўқувчиларга тушунарли бўлиши учун бор маҳоратини ишга солади, слайдлар орқали мавзуни тўла очишга ҳаракат қилади ва савол-жавоблар услубидан фойдаланиб, дарсни мукаммаллаштиради. Қўшимча адабиётлардан фойдаланган ҳолда ўз тажрибасини ҳам бойитади.
Жорий йилнинг 9 апрель санасида 38-сонли мактабнинг 3 “А” синфида тажбирали ўқитувчи Раъно Авазмуродова томонидан Қорақалпоғистон Республикаси Конституцияси қабул қилинганининг 28 йиллиги муносабати билан “Конституция – менинг бахтим” мавзусида очиқ дарс-машғулоти ўтказилди. 35 йиллик педагогик тажрибага эга бўлган тажрибали бошланғич синф ўқитувчиси Раъно Авазмуродова мактаб педагогика жамоасининггина эмас, балки туман ХТБга қарашли умумтаълим мактабларининг бошланғич синфлар ўқитувчилари орасида ҳам ўзига хос обрўга эга педагоглардан саналади. У ҳар бир дарсини ўқувчиларда креатив фаолликни ошириш, боланинг дунёқарашини шакллантиришда замон тараққиётига мутаносиб усуллардан фойдаланган ҳолда ўқувчиларни ёшлигиданоқ жамиятдаги ижобий ўзгаришларга ўз шахсий муносабатини билдира олиш, эркин фикрлаш руҳида тарбиялашга ҳаракат қилади.
“Конституция - менинг бахтим” мавзусидаги очиқ дарсда 27 нафар ўқувчи, 38-сонли мактаб раҳбарлари ва ўқитувчилар иштирок этишди. Ушбу мавзуда ташкиллаштирилган очиқ дарснинг мақсади ва ундан кутиладиган натижалар, аввало, ўқувчиларнинг ўзлари туғилиб-ўсган муқаддас замин ҳақидаги тушунчаларини янада бойитиш, Қорақалпоғистон Республикасининг мамлакат иқтисодий, ижтимоий, маънавий-маданий ҳаётида тутган ўрни ва аҳамияти, шунингдек, давлат мадҳияси, давлат рамзлари, Қорақалпоғистон Республикасининг Асосий Қонуни – Конституциясида белгилаб қўйилган ҳуқуқ ва бурчлар хусусида ўқувчиларга кенг тушунтиришлар бериш орқали улар қалбида ватанпарварлик, халқпарварлик, миллатлараро тотувлик туйғуларини янада мустаҳкамлаш ҳамда ҳуқуқий билимларини оширишга қаратилгани билан муҳим аҳамиятга эгадир.
Дарс жараёнида ўқитувчи Ўзбекистон ичра суверен Республика – Қорақалпоғистон Республикаси Конституциясининг мазмун-моҳияти, унинг ҳар бир моддасининг халқимиз ҳаётида тутган ўрни хусусида слайдлар орқали ўқувчиларга батафсил маълумотлар берди. Шундан сўнг “Конституция – менинг бахтим” мавзусида ўқувчиларнинг креатив фикрлаш қобилиятини синовдан ўтказиш мақсадида Қорақалпоғистоннинг ўз давлат мадҳияси, давлат рамзлари юзасидан ўқувчиларга саволлар берди. “Давлат мадҳиясининг муаллифи ким?”, “Мадҳиянинг мазмун-моҳияти, ғояси ҳақида нималарни биласиз?”, “Давлат рамзлари нимани ифодалайди?” каби саволларга ўқувчилар ўз жавобларини, содда ва тушунарли қилиб ифодалаб бердилар.
Дарснинг “Конституция билимдонларини аниқлаймиз” деб номланган қисми янада қизиқарли таассуротларга бой бўлди. Бунда ўқувчилар гуруҳларга бўлинган ҳолда конституция боблари ва моддалари бўйича бир-бирларига саволлар бериб, синфдош синфдошнинг билимини синовдан ўтказиш имконияти яратилди. Болалар ҳар бир модданинг халқимиз ҳаётида тутган ўрни ҳақида маълумотлар беришиб, савол-жавоблар асносида бири-биридан ўргандилар ва бири-бирига ўргатдилар. Ҳар бир савол жавобсиз қолмаганидан аён бўлдики, очиқ дарс ўз олдига қўйган режа ва мақсадни тўла-тўкис адо этди.
Дарс-машғулот жараёнида ўқувчилар ўқитувчи билан биргаликда Конституция моддаларининг инсон ҳаётида тутган ўрнини ҳаётий мисоллар тариқасида ифодалашга ҳаракат қилдилар ва Қорақалпоғистон Республикаси Конституциясининг аҳамиятини тўла англаб етдилар.
Очиқ дарс таҳлилида мактаб директори Баҳром Болтабоев, ўқув ишлари бўйича мактаб директорининг ўринбосари Ойбек Бобожоновлар Р.Авазмуродова томонидан ташкиллаштирилган мазкур дарс-машғулотини кенг оммалаштириш, мактабнинг барча бошланғич синфларида ҳам айнан ана шундай мавзуда очиқ дарслар ташкил этиш юзасидан ўз фикрларини билдирдилар. Шу билан бирга Раъно Авазмуродованинг дарс ўтиш маҳоратига, интилувчан ва ташаббускорлигига юқори баҳо бердилар. Дарс таҳлилига бағишланган қисқа фикр алмашув жараёнида очиқ дарсни кузатиб борган мактаб ўқитувчилари ҳам Р.Авазмуродованинг муваффақиятли дарс ўтганини таъкидладилар.
Шунингдек, пандемия шароитида фарзандларининг дарс-машғулотларини тўлиқ ўзлаштиришларида фидойилик кўрсатгани, онлайн дарсларни узлуксиз ташкил этгани учун бир гуруҳ ота-оналар Р.Авазмуродовага миннатдорчилик билдирдилар.
Р.ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
