Давлат тест маркази директори Мажид Каримов амударёлик ёшлар билан учрашди

Ёш авлоднинг замонавий андозалар асосида таълим олиши ҳамда жамият ривожи учун билимли, етук мутахассисларни тайёрлаш бугунги куннинг энг муҳим ва долзарб вазифаси ҳисобланади. Мазкур йўналишда амалга оширилаётган туб ислоҳотлар, яратилаётган имкониятлар ёшларнинг илм-у фанга қизиқишларини, олий таълимда таҳсил олиб, танлаган йўналишлари бўйича касб эгаллашга бўлган иштиёқларини янада кучайтирмоқда.

Бу борадаги Президент Фармонлари, Қарорлари ва ҳудудларга ташрифлари доирасида берилган топшириқларнинг ижросини таъминлаш ҳамда Халқ қабулхоналарида бўлиб, Давлат тест маркази фаолиятига оид масалалар юзасидан фуқароларни шахсан қабул қилиш мақсадида шу йил 20-22 апрель кунлари оралиғида Давлат тест маркази директорининг Қорақалпоғистон Республикаси ва Хоразм вилоятига хизмат сафари ташкил этилиши белгиланган эди. Шунга кўра Қорақалпоғистон Республикасига Ўзбекистон Республикаси Вазирлар Маҳкамаси ҳузуридаги Давлат тест маркази директори, техника фанлари доктори Мажит Каримов ташриф буюриб,  қизил тоифага кирувчи умумтаълим мактаблари жойлашган маҳаллаларда мактаб битирувчилари, уларнинг ота-оналари, ўқитувчилар ва фуқаролар билан учрашувлар ўтказди.

21 апрель куни ушбу ташриф доирасида туманимизда ҳам Тўлқин овулидаги 33-сон умумтаълим мактабида Вазирлар Маҳкамаси ҳузуридаги Давлат тест маркази директори, техника фанлари доктори Мажит Каримов, Қорақалпоғистон Республикаси Вазирлар Кенгаши Раисининг ўринбосари Мурадбай Жуманов, Давлат тест марказининг Қорақалпоғистон Республикасидаги бўлими бошлиғи  Музаффар Абдуллаевлар иштирокида учрашув ташкил этилди. Учрашувда туман Халқ таълими бўлими масъуллари, мактаб директори, ўқитувчилари, битирувчи ёшлари ва уларнинг ота-оналари иштирок этдилар.

Ёшлар билан мулоқот, мурожаатларни шахсан кўриб чиқиш учун ташкил этилган йиғилишни Амударё тумани ҳокимининг  Ёшлар масалалари бўйича ўринбосари Маҳмуд Шерметов очди ва олиб борди.

Давлат тест маркази директори Мажит Каримов бу каби учрашувлар чекка ҳудудларда ҳам ўтказилаётгани, учрашувларда олий таълим муассасаларига ва профессионал таълим муассасаларига кириш тест синовларида кутилаётган ўзгариш ва янгиликлар билан таништирилаётгани хусусида сўзлаб, умумтаълим фанларидан миллий тест тизимининг жорий этилиши масалалари бўйича атрофлича маълумотлар бериб ўтди.

Сўнгги йилларда мамлакатимизда таълим-тарбия сифати ва самарадорлигини ошириш бўйича олиб борилаётган ишларга тўхталар экан, охирги йилларда кириш тест синовларида шаффофликни таъминлаш борасида амалга оширилган амалий ишлар тўғрисида батафсил сўз юритди.

Шунингдек, учрашувда Президентимизнинг 2020 йил 6 ноябрдаги “Ўзбекистоннинг янги тараққиёт даврида таълим-тарбия ва илм-фан соҳаларини ривожлантириш чора-тадбирлари тўғрисида”ги Фармони ҳамда “Таълим-тарбия тизимини янада такомиллаштиришга оид қўшимча чора-тадбирлар тўғрисида”ги Қарорининг мазмун-моҳияти, аҳамияти тўғрисида атрофлича маълумот берилди.

Ундан ташқари, Давлатимиз Раҳбарининг 2019 йил 14 майдаги “Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида”ги Қарори ҳамда Вазирлар Маҳкамасининг 2019 йил 13 майдаги “Олий таълим муассасаларига ўқишга қабул қилишда миллий ҳамда халқаро баҳолаш тизимлари сертификатларини татбиқ қилиш чора-тадбирлари тўғрисида”ги, 2020 йил 12 октябрдаги “Умумтаълим фанларини билиш даражасини баҳолашнинг миллий тест тизимини жорий қилиш тўғрисида”ги қарорлари, Ўзбекистон Республикаси таълим муассасаларига қабул қилиш бўйича Давлат комиссиясининг  2021 йил 7 мартдаги тегишли баёнида белгиланган вазифалар ҳам кенг тушунтирилди.

Мазкур қонун ҳужжатлари билан олий ва профессионал таълим муассасаларига ўқишга кириш учун имтиҳон топшираётган абитуриентларга бир қатор имконият ва имтиёзлар белгилангани, чет тили фанларидан миллий ва халқаро сертификатларнинг татбиқ этилганлиги, “Умумтаълим фанларини билиш даражасини баҳолашнинг миллий тест тизимини жорий қилиш тўғрисида”ги қарор асосида умумтаълим фанлари бўйича сертификатлаш жорий қилинаётганлиги юзасидан батафсил маълумот берилди.

Учрашув давомида ўқувчи ва ўқитувчилар томонидан белгиланган қабул квоталари, бериладиган имтиёзлар, олий ўқув юртига кириш учун бу йилги тест синовлари ўтказилиши тартиби кабилар бўйича берилган саволларга мавжуд меъёрий-ҳуқуқий ҳужжатлар асосида тўлиқ жавоблар қайтарилди. Шунингдек, Амударё туманидаги таълим муассасалари томонидан Давлат тест маркази билан доимий ишлаш йўлга қўйилиши белгилаб олинди.

Давлат тест маркази масъуллари томонидан ўтказилган мазкур учрашувда мактаб битирувчилари, ўқитувчилар ва ота-оналар бу йилги тест синовлари ҳақидаги керакли маълумотларга эга бўлдилар.

Озода Худойберганова.