Davlat test markazi direktori Majid Karimov amudaryolik yoshlar bilan uchrashdi

Yosh avlodning zamonaviy andozalar asosida taʼlim olishi hamda jamiyat rivoji uchun bilimli, yetuk mutaxassislarni tayyorlash bugungi kunning eng muhim va dolzarb vazifasi hisoblanadi. Mazkur yoʻnalishda amalga oshirilayotgan tub islohotlar, yaratilayotgan imkoniyatlar yoshlarning ilm-u fanga qiziqishlarini, oliy taʼlimda tahsil olib, tanlagan yoʻnalishlari boʻyicha kasb egallashga boʻlgan ishtiyoqlarini yanada kuchaytirmoqda.

Bu boradagi Prezident Farmonlari, Qarorlari va hududlarga tashriflari doirasida berilgan topshiriqlarning ijrosini taʼminlash hamda Xalq qabulxonalarida boʻlib, Davlat test markazi faoliyatiga oid masalalar yuzasidan fuqarolarni shaxsan qabul qilish maqsadida shu yil 20-22-aprel kunlari oraligʻida Davlat test markazi direktorining Qoraqalpogʻiston Respublikasi va Xorazm viloyatiga xizmat safari tashkil etilishi belgilangan edi. Shunga koʻra Qoraqalpogʻiston Respublikasiga Oʻzbekiston Respublikasi Vazirlar Mahkamasi huzuridagi Davlat test markazi direktori, texnika fanlari doktori Majit Karimov tashrif buyurib,  qizil toifaga kiruvchi umumtaʼlim maktablari joylashgan mahallalarda maktab bitiruvchilari, ularning ota-onalari, oʻqituvchilar va fuqarolar bilan uchrashuvlar oʻtkazdi.

21-aprel kuni ushbu tashrif doirasida tumanimizda ham Toʻlqin ovulidagi 33-son umumtaʼlim maktabida Vazirlar Mahkamasi huzuridagi Davlat test markazi direktori, texnika fanlari doktori Majit Karimov, Qoraqalpogʻiston Respublikasi Vazirlar Kengashi Raisining oʻrinbosari Muradbay Jumanov, Davlat test markazining Qoraqalpogʻiston Respublikasidagi boʻlimi boshligʻi  Muzaffar Abdullayevlar ishtirokida uchrashuv tashkil etildi. Uchrashuvda tuman Xalq taʼlimi boʻlimi masʼullari, maktab direktori, oʻqituvchilari, bitiruvchi yoshlari va ularning ota-onalari ishtirok etdilar.

Yoshlar bilan muloqot, murojaatlarni shaxsan koʻrib chiqish uchun tashkil etilgan yigʻilishni Amudaryo tumani hokimining  Yoshlar masalalari boʻyicha oʻrinbosari Mahmud Shermetov ochdi va olib bordi.

Davlat test markazi direktori Majit Karimov bu kabi uchrashuvlar chekka hududlarda ham oʻtkazilayotgani, uchrashuvlarda oliy taʼlim muassasalariga va professional taʼlim muassasalariga kirish test sinovlarida kutilayotgan oʻzgarish va yangiliklar bilan tanishtirilayotgani xususida soʻzlab, umumtaʼlim fanlaridan milliy test tizimining joriy etilishi masalalari boʻyicha atroflicha maʼlumotlar berib oʻtdi.

Soʻnggi yillarda mamlakatimizda taʼlim-tarbiya sifati va samaradorligini oshirish boʻyicha olib borilayotgan ishlarga toʻxtalar ekan, oxirgi yillarda kirish test sinovlarida shaffoflikni taʼminlash borasida amalga oshirilgan amaliy ishlar toʻgʻrisida batafsil soʻz yuritdi.

Shuningdek, uchrashuvda Prezidentimizning 2020-yil 6-noyabrdagi “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida”gi Farmoni hamda “Taʼlim-tarbiya tizimini yanada takomillashtirishga oid qoʻshimcha chora-tadbirlar toʻgʻrisida”gi Qarorining mazmun-mohiyati, ahamiyati toʻgʻrisida atroflicha maʼlumot berildi.

Undan tashqari, Davlatimiz Rahbarining 2019-yil 14-maydagi “Oliy taʼlim muassasalariga test sinovlari orqali qabul qilish tizimini takomillashtirish boʻyicha qoʻshimcha chora-tadbirlar toʻgʻrisida”gi Qarori hamda Vazirlar Mahkamasining 2019-yil 13-maydagi “Oliy taʼlim muassasalariga oʻqishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari toʻgʻrisida”gi, 2020-yil 12-oktyabrdagi “Umumtaʼlim fanlarini bilish darajasini baholashning milliy test tizimini joriy qilish toʻgʻrisida”gi qarorlari, Oʻzbekiston Respublikasi taʼlim muassasalariga qabul qilish boʻyicha Davlat komissiyasining  2021-yil 7-martdagi tegishli bayonida belgilangan vazifalar ham keng tushuntirildi.

Mazkur qonun hujjatlari bilan oliy va professional taʼlim muassasalariga oʻqishga kirish uchun imtihon topshirayotgan abituriyentlarga bir qator imkoniyat va imtiyozlar belgilangani, chet tili fanlaridan milliy va xalqaro sertifikatlarning tatbiq etilganligi, “Umumtaʼlim fanlarini bilish darajasini baholashning milliy test tizimini joriy qilish toʻgʻrisida”gi qaror asosida umumtaʼlim fanlari boʻyicha sertifikatlash joriy qilinayotganligi yuzasidan batafsil maʼlumot berildi.

Uchrashuv davomida oʻquvchi va oʻqituvchilar tomonidan belgilangan qabul kvotalari, beriladigan imtiyozlar, oliy oʻquv yurtiga kirish uchun bu yilgi test sinovlari oʻtkazilishi tartibi kabilar boʻyicha berilgan savollarga mavjud meʼyoriy-huquqiy hujjatlar asosida toʻliq javoblar qaytarildi. Shuningdek, Amudaryo tumanidagi taʼlim muassasalari tomonidan Davlat test markazi bilan doimiy ishlash yoʻlga qoʻyilishi belgilab olindi.

Davlat test markazi masʼullari tomonidan oʻtkazilgan mazkur uchrashuvda maktab bitiruvchilari, oʻqituvchilar va ota-onalar bu yilgi test sinovlari haqidagi kerakli maʼlumotlarga ega boʻldilar.

Ozoda Xudoyberganova.