“КАМАЛАК – 20 ЁШ” НОМЛИ АНЖУМАН ЎТКАЗИЛДИ

“Камалак” – болаларнинг севимли ташкилоти сифатида кўп йиллардан буён фаолият кўрсатиб келмоқда. Ташкилот томонидан жисмонан соғлом, маънан етук ва интеллектуал ривожланган, мустақил фикрлайдиган ёш авлодни шакллантириш, ёшларни ташқи таҳдидлар ва “оммавий маданият”нинг зарарли таъсиридан муҳофаза қилиш, ёшларнинг ҳуқуқ ва қонуний манфаатларини ҳимоя қилиш мақсадида ташкил этилаётган турли тадбирлар ўсиб келаётган ёшларни бирлаштиришда муҳим аҳамият касб этмоқда.

Жорий йилда “Камалак” болалар ташкилоти ташкил топганига 20 йил тўлди. Ҳар йили сана муносабати билан ташкилотнинг “Ватан, дўстлик ва бахтли болалик учун” шиори остидаги анжуманларини ўтказиш анъанага айланган.

5 июнь куни 12-сонли умумтаълим мактабида ҳам “Камалак – 20 ёш” номли ХХ анжуман ўтказилди. Анжуманни мактабнинг маънавий-маърифий ишлари бўйича директор ўринбосари Ҳаким  Сапарбоев очиб берди ва ташкилотнинг ташкил топганига 20 йил тўлгани билан мактаб ёшларини табриклади.

 Тадбирда сўзга чиққанлар ёш авлодни миллий ғоялар асосида Ватанига содиқ, комил фарзандлар этиб тарбиялаш, уларнинг ҳуқуқ-манфаатларини ифода этиш ва ҳимоя қилиш, истеъдоди ва қобилиятини рўёбга чиқариши ҳамда ривожлантириши учун шароитлар яратиб бериш ташкилотнинг асосий мақсади эканлигини таъкидлаб ўтишди.  Ёшлар етакчиси Нигора Саидмуродова ҳам ўз сўзида мактабда 10 ёшдан 14 ёшгача ёшлар аъзолик рўйхатидан ўтказилгани, 7 ёшдан 10 ёшгача бўлган ўқувчилар эса ташкилотнинг фаол аъзоси эканини айтиб ўтди. Ташкилот томонидан ташкил қилинган турли хил танловлар, тадбирлар ва спорт мусобақаларида мактаб ўқувчилари фаол иштирок этиб, ғолибликни қўлга киритиб келаётганини фахр билан тилга олди.  

Таъкидлаш жоизки, ташкилот томонидан истеъдодли ёшларни қўллаб-қувватлаш, уларнинг  ижодий ва интеллектуал салоҳиятини юксалтириш ҳамда  қобилиятларини тўғри ривожлантиришга доир кўплаб тадбирлар амалга оширилмоқда.   Ушбу мактабда  мана шундай имкониятлардан унумли фойдаланиб келаётган ёшлар айтишга арзигулик ютуқларни қўлга киритишмоқда. Жорий йилда  мактаб сардори Рухшона Умирбоева  “Йил  сардори” кўрик-танловининг туман босқичида 1-ўринни эгаллаб, Республика босқичида фаол иштирок этди. Ундан ташқари, 5-синф ўқувчиси Хурсандбек Умирбоев спортнинг ДЗЮДО  тури бўйича мусобақалар ғолиби, 4-синф ўқувчиси Дилшодбек Жалгашев эса Урганч шаҳрида 1 июнь – Халқаро болаларни ҳимоя қилиш кунига бағишлаб ўтказилган ДЗЮДО фестивалида 1-ўринни эгаллади. Ташкилотнинг фаол аъзоси, 1-синф ўқувчиси Достонбек Аминбоев ҳам Нукус шаҳрида ўтказилган “Ёшлар овози” фестивалида эстрада йўналиши бўйича фаол иштирок этиб, ўзининг иқтидорини, қобилиятини намойиш қилди.

 Анжуман давомида фидойилиги ва ташаббускорлиги билан ўрнак  бўлиб келаётган мактаб сардорлари ва фаол ёшларга ташаккурномалар тақдим этилди. Шунингдек, анжуманда иштирок этган фаоллар Ёшлар агентлиги туман  бўлими томонидан тақдирландилар.  

Шундан сўнг, мактаб ўқувчилари томонидан тайёрланган байрамона дастурлар йиғилганлар эътиборига ҳавола этилди. Байрамона ва кўтаринки руҳда ўтган анжуман ёшларда катта таассурот қолдирди.

Севара Исмоилова