ЧЕГАРА ҲУДУД АҲОЛИСИ БИЛАН УЧРАШУВ ЎТКАЗИЛДИ
Амир Темур номли овул фуқаролар йиғини туманимизнинг қўшни Туркманистон давлати чегарасига яқин ҳудудида жойлашган. Ушбу овулда аҳоли билан учрашувлар ўтказилиб, масъуллар томонидан чегарага яқин жойларда яшаш тартиб-қоидалари ҳақида мунтазам равишда тушунтиришлар бериб борилади.
4 июнь куни ташкил этилган навбатдаги учрашув Амир Темур номли овул фуқаролар йиғинининг маъмурий биносида бўлиб ўтди. Учрашув муносабати билан ташкил этилган йиғилишда фуқаролар йиғини раиси Ойбек Юсупов, 9202 «D» ҳарбий қисм масъуллари, ҳудуд профилактика инспектори, фуқаролар йиғини ходимлари, чегара ҳудудидаги фермер хўжалиги ишчилари, овчилар, имомлар ва маҳалла фаоллари қатнашишди.
Йиғилишда масъуллар томонидан “Ўзбекистон Республикаси Давлат Чегараси тўғрисида”ги Қонунга риоя қилиш, диний экстремизм ва терроризмга қарши курашиш, давлат чегарасида ўрнатилган муҳандислик тўсиқлари ва иншоотларига етказилган зарар бўйича фуқароларнинг жавобгарлиги, тўсиқларга яқин жойда чорва молларини боқмаслик, руҳий касал ва спиртли ичкиликга ружу қўйган фуқароларни назоратга олиш кабилар тўғрисида сўз юритилди. Шунингдек, Ўзбекистон Республикаси Давлат Чегараси Қонуни, чегара олди ҳудудларида жамоат хавфсизлигини таъминлаш, Давлат чегараси дахлсизлигини сақлаш мақсадида олиб борилаётган тадбирларда фуқароларнинг ўзини-ўзи бошқариш органлари, жамоатчилик асосидаги чегара посбонлари, жамоат ташкилотлари ҳамда чегара ҳудудида яшовчи фуқаролар чегарачилар билан ҳамкорликда ҳаракат қилишлари кераклиги, ҳудудда яшовчи руҳий касал ва спиртли ичимликга ружу қўйган фуқароларни қариндошлари ва қўни-қўшнилари назоратсиз қолдирмаслиги кераклиги айтиб ўтилди.
Учрашувда чегара олди ҳудудларида истиқомат қилувчи аҳоли ўртасида жамият, дунёвий ва диний қарашлар зидлиги юзага келишининг олдини олиш, носоғлом диний ғоялар таъсирига тушиб қолган оилалар билан алоҳида ишлаш, уларнинг ҳаётда ўз ўринларини топишларига кўмаклашиш бўйича ҳамкорликдаги ишларни ташкил этиш лозимлиги ҳам таъкидланди. Масъуллар томонидан чегара ҳудудида яшовчи маҳаллий аҳолига Давлат чегараси тўғрисидаги Қонуннинг мазмун-моҳияти батафсил тушунтирилди ва ушбу Қонуннинг 1-, 15-, 18-, 20-моддалари ўқиб эшиттирилди.
Давлат чегара чизиғидан 500 метр оралиқда чорва молларини боқмаслик, ҳудудга яқин жойдаги фермер хўжаликлари ерларида ишловчи ишчиларнинг рўйхатларини профилактика инспекторига тақдим қилиш кераклиги, чегара олди ҳудудида яшовчи фуқаролар белгиланган тартиб-қоидаларга қатъий риоя қилишлари шартлиги алоҳида айтиб ўтилди. Чегара ҳудудида ўзбошимчалик билан чорва молларини боқиш ёки қаровсиз қолдириш ҳолатлари ҳуқуқбузарлик саналиши таъкидланиб, бу бўйича белгиланган жазо чоралари маълум қилинди. Шу ўринда ҳудудда яшовчи фуқаролар томонидан чегара режими қонунбузарликлари давом этаётгани, бундай ҳолатларнинг олдини олишга барча бирдек ҳаракат қилиши кераклиги, масъул эканлиги таъкидланди.
Йиғилишда иштирок этган фуқаролар масъулларга ўзларини қизиқтирган саволлар билан мурожаат қилдилар ва тўлиқ жавоблар олдилар. Шунингдек, фикр-мулоҳазалар, таклифлар ҳам билдириб ўтдилар.
Йиғилиш якунида барча таклиф ва мулоҳазалар қизғин муҳокама қилиниб, ҳуқуқбузарликлар, кўнгилсиз ҳодисаларнинг олдини олишга доир вазифалар белгилаб олинди.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
