ChEGARA HUDUD AHOLISI BILAN UChRAShUV OʻTKAZILDI

Amir Temur nomli ovul fuqarolar yigʻini tumanimizning qoʻshni Turkmaniston davlati chegarasiga yaqin hududida joylashgan. Ushbu ovulda aholi bilan uchrashuvlar oʻtkazilib,  masʼullar tomonidan chegaraga yaqin joylarda yashash tartib-qoidalari haqida muntazam ravishda tushuntirishlar berib boriladi.

4-iyun kuni tashkil etilgan navbatdagi uchrashuv Amir Temur nomli ovul fuqarolar yigʻinining maʼmuriy binosida boʻlib oʻtdi.  Uchrashuv munosabati bilan tashkil etilgan yigʻilishda fuqarolar yigʻini raisi Oybek Yusupov,   9202 «D» harbiy qism masʼullari,  hudud profilaktika inspektori, fuqarolar yigʻini xodimlari, chegara hududidagi fermer xoʻjaligi ishchilari, ovchilar, imomlar va mahalla faollari qatnashishdi.                                                 

Yigʻilishda masʼullar tomonidan “Oʻzbekiston Respublikasi Davlat Chegarasi toʻgʻrisida”gi Qonunga rioya qilish, diniy ekstremizm va terrorizmga qarshi kurashish, davlat chegarasida oʻrnatilgan muhandislik toʻsiqlari va inshootlariga yetkazilgan zarar boʻyicha fuqarolarning javobgarligi, toʻsiqlarga yaqin joyda chorva mollarini boqmaslik, ruhiy kasal va spirtli ichkilikga ruju qoʻygan fuqarolarni nazoratga olish   kabilar toʻgʻrisida soʻz yuritildi. Shuningdek, Oʻzbekiston Respublikasi Davlat Chegarasi Qonuni, chegara oldi hududlarida jamoat xavfsizligini taʼminlash, Davlat chegarasi daxlsizligini saqlash maqsadida olib borilayotgan tadbirlarda fuqarolarning oʻzini-oʻzi boshqarish organlari, jamoatchilik asosidagi chegara posbonlari, jamoat tashkilotlari hamda chegara hududida yashovchi fuqarolar chegarachilar bilan hamkorlikda harakat qilishlari kerakligi, hududda yashovchi ruhiy kasal va spirtli ichimlikga ruju qoʻygan fuqarolarni qarindoshlari va qoʻni-qoʻshnilari nazoratsiz qoldirmasligi kerakligi  aytib oʻtildi.

Uchrashuvda chegara oldi hududlarida istiqomat qiluvchi aholi oʻrtasida jamiyat, dunyoviy va diniy qarashlar zidligi yuzaga kelishining oldini olish, nosogʻlom diniy gʻoyalar taʼsiriga tushib qolgan oilalar bilan alohida ishlash, ularning hayotda oʻz oʻrinlarini topishlariga koʻmaklashish boʻyicha hamkorlikdagi ishlarni tashkil etish lozimligi ham taʼkidlandi. Masʼullar tomonidan chegara hududida yashovchi mahalliy aholiga Davlat chegarasi toʻgʻrisidagi Qonunning mazmun-mohiyati batafsil tushuntirildi va ushbu Qonunning 1-, 15-, 18-, 20-moddalari oʻqib eshittirildi.

Davlat chegara chizigʻidan 500 metr oraliqda chorva mollarini boqmaslik, hududga yaqin joydagi fermer xoʻjaliklari yerlarida ishlovchi ishchilarning roʻyxatlarini profilaktika inspektoriga taqdim qilish kerakligi, chegara oldi hududida yashovchi fuqarolar belgilangan tartib-qoidalarga qatʼiy rioya qilishlari shartligi alohida aytib oʻtildi. Chegara hududida oʻzboshimchalik bilan chorva mollarini boqish yoki qarovsiz qoldirish holatlari huquqbuzarlik sanalishi taʼkidlanib, bu boʻyicha belgilangan jazo choralari maʼlum qilindi. Shu oʻrinda hududda yashovchi fuqarolar tomonidan chegara rejimi qonunbuzarliklari davom etayotgani, bunday holatlarning oldini olishga barcha birdek harakat qilishi kerakligi, masʼul ekanligi taʼkidlandi.

Yigʻilishda ishtirok etgan fuqarolar masʼullarga oʻzlarini qiziqtirgan savollar bilan murojaat qildilar va toʻliq javoblar oldilar. Shuningdek, fikr-mulohazalar, takliflar ham bildirib oʻtdilar.

Yigʻilish yakunida barcha taklif va mulohazalar qizgʻin muhokama qilinib, huquqbuzarliklar, koʻngilsiz hodisalarning oldini olishga doir vazifalar belgilab  olindi.

O. Xudoyberganova.