ДЕПУТАТ ШУҲРАТ МАТКАРИМОВ ҲАҚИҚИЙ ЮРТ ФИДОЙИСИ

Бугунги кунда мамлакатимизда қонун устуворлигини таъминлаш, аҳоли билан тизимли равишда ишлаш, уларнинг кундалик муаммоларини ҳал этишда амалий ёрдам бериш, барча ислоҳотлар негизида халқ манфаатлари устунлиги тамойили асосида иш олиб боришда Халқ депутатлари вилоят, туман ва шаҳар Кенгашлари депутатларининг ўрни ва аҳамияти тобора ортиб бормоқда.
Шуҳрат Маткаримов Халқ депутатлари Амударё туман Кенгаши депутати этиб сайланган даврдан буён ўзи сайланган Тўлқин сайлов округи ҳудудидаги аҳолининг турмуш тарзини яхшилаш борасида ҳар томонлама амалий ёрдамлар кўрсатиб келмоқда.
Шуҳрат Маткаримов ўзи ташкил этган “Тўлқинли Исмоил чорвадор” наслли фермер хўжалиги раҳбари бўлиб ишлайди. У туманда қишлоқ хўжалиги соҳасини ривожлантиришда салмоқли ҳисса қўшиб келаётган тадбиркорлардан бири ҳисобланади. Айни пайтда 124 гектар ер майдонига эга бўлган мазкур фермер хўжалиги 2009 йилда ташкил этилган. Кредит маблағлари ҳисобидан 150 нафар голштин зотли сигирлар олиб келиниб, чорвачилик фаолияти ривожлантирилган. Ҳозирда чорвачилик хўжалигида 110 бош наслли қорамоллар етиштирилиб, аҳолига қулай нархларда етказиб берилмоқда.
Шунингдек, Шуҳрат Маткаримов чорвачилик фаолиятидан ташқари, пахтачилк ҳамда ғаллачилик билан ҳам шуғулланиб келади. Бу тармоқларда олиб борилаётган самарали ишлари натижасида ҳар йили ғалладан 60-70 центнер, пахтадан 40-45 центнердан ҳосил олинмоқда.

Депутатлик фаолияти мобайнида Шуҳрат Маткаримов Тўлқин сайлов округи ҳудудида яшовчи аҳолини қийнаб келаётган муаммоларни ўрганишга, уларни бартараф қилишга, халқни рози қилишга астойдил ҳаракат қилиб келмоқда.
Депутат Қипчоқ арна каналининг Тома аҳоли пунктидаги кўприкни таъмирлашга, овулдаги 3 та аҳоли пунктидан ўтувчи 3 км. узунликдаги йўлга ва “Каллали бобо” қабристонига борувчи йўлга тош ётқизиш ишларини амалга оширишда ташаббускорлик ҳамда амалий ёрдам кўрсатди. Овулдаги кам таъминланган оилалардан бирининг уй-жойини таъмирлаб, ушбу оилага 13 бош эчки олиб берди, 2 нафар боқувчиси йўқ талабаларнинг контракт пулларини тўлади. Шуҳрат Маткаримов 11 та эҳтиёжманд оилага уй-жойини таъмирлаш учун қурилиш материаллари олиб бериб, 2 та кам таъминланган оиланинг иморатини шиферлашда ҳомийлик ёрдамларини кўрсатди.
Шунингдек, депутат овул ёшларининг сифатли таълим-тарбия олишлари учун ҳудуддаги мактаблардаги шароитларни яхшилашга алоҳида эътибор қаратиб келмоқда. Хусусан, 32-сонли мактаб ўқувчилари учун сунъий қопламали мини футбол майдончасини қуриб, мактаб атрофини ободонлаштирди. Боғ яратиш учун ер майдонларини текислатиб берди. Мактабга ҳар хил бадиий китоблар совға қилди.
Қолаверса, 28-сонли мактаб ўқувчиларининг мактабга қатнови учун кичик кўприк қурилишида, Тома аҳоли пунктидаги аҳоли учун алоҳида трансформатор ўрнатилишида ҳомийлик қилди. Банд бўлмаган ёшлардан 5 нафарини иш билан таъминлаш ҳамда уларнинг даромад топишлари учун 16 бош қорамоллар олиб берди. Шу билан бирга, Шуҳрат Маткаримов 2020 йилда Тўлқин овулига 17 км. узунликдаги оптик толали алоқа тармоғини тортиш учун қазиш ишларида 40 млн. сўм ҳомийлик ёрдамини кўрсатди.
Таъкидлаш керакки, Шуҳрат Маткаримов пандемия даврида овулдаги кам таъминланган, эҳтиёжманд фуқароларга ҳар томонлама ёрдам кўрсатиб келмоқда. Овулдаги ёрдамга муҳтож бўлган оилаларга 60 қоп ун, 80 қоп буғдой, 70 кг. ўсимлик ёғини хайрия сифатида тарқатди ҳамда улуғ айёмлар арафасида, байрамларда кам таъминланган оилаларга ун, гўшт ва бошқа озиқ-овқат маҳсулотларини совға сифатида мунтазам равишда тарқатади.
Шуҳрат Маткаримов яшаш тарзи, депутатлик ва тадбиркорлик фаолиятида амалга оширган ишларининг самарадорлиги ҳамда инсоний фазилатларининг юксаклиги жиҳатдан ундан ҳар томонлама ўрнак ва ибрат олиш лозим бўлган, ўзгаларга намуна сифатида кўрсатса арзийдиган, том маънодаги, халқ дарди билан яшайдиган юрт фидойиси, десак, алсо муболаға бўлмайди.

Чарос Арслонова.