DEPUTAT ShUHRAT MATKARIMOV HAQIQIY YuRT FIDOYISI

Bugungi kunda mamlakatimizda qonun ustuvorligini taʼminlash, aholi bilan tizimli ravishda ishlash, ularning kundalik muammolarini hal etishda amaliy yordam berish, barcha islohotlar negizida xalq manfaatlari ustunligi tamoyili asosida ish olib borishda Xalq deputatlari viloyat, tuman va shahar Kengashlari deputatlarining oʻrni va ahamiyati tobora ortib bormoqda.
Shuhrat Matkarimov Xalq deputatlari Amudaryo tuman Kengashi deputati etib saylangan davrdan buyon oʻzi saylangan Toʻlqin saylov okrugi hududidagi aholining turmush tarzini yaxshilash borasida har tomonlama amaliy yordamlar koʻrsatib kelmoqda.
Shuhrat Matkarimov oʻzi tashkil etgan “Toʻlqinli Ismoil chorvador” naslli fermer xoʻjaligi rahbari boʻlib ishlaydi. U tumanda qishloq xoʻjaligi sohasini rivojlantirishda salmoqli hissa qoʻshib kelayotgan tadbirkorlardan biri hisoblanadi. Ayni paytda 124 gektar yer maydoniga ega boʻlgan mazkur fermer xoʻjaligi 2009-yilda tashkil etilgan. Kredit mablagʻlari hisobidan 150 nafar golshtin zotli sigirlar olib kelinib, chorvachilik faoliyati rivojlantirilgan. Hozirda chorvachilik xoʻjaligida 110 bosh naslli qoramollar yetishtirilib, aholiga qulay narxlarda yetkazib berilmoqda.
Shuningdek, Shuhrat Matkarimov chorvachilik faoliyatidan tashqari, paxtachilk hamda gʻallachilik bilan ham shugʻullanib keladi. Bu tarmoqlarda olib borilayotgan samarali ishlari natijasida har yili gʻalladan 60-70 tsentner, paxtadan 40-45 tsentnerdan hosil olinmoqda.

Deputatlik faoliyati mobaynida Shuhrat Matkarimov Toʻlqin saylov okrugi hududida yashovchi aholini qiynab kelayotgan muammolarni oʻrganishga, ularni bartaraf qilishga, xalqni rozi qilishga astoydil harakat qilib kelmoqda.
Deputat Qipchoq arna kanalining Toma aholi punktidagi koʻprikni taʼmirlashga, ovuldagi 3 ta aholi punktidan oʻtuvchi 3 km. uzunlikdagi yoʻlga va “Kallali bobo” qabristoniga boruvchi yoʻlga tosh yotqizish ishlarini amalga oshirishda tashabbuskorlik hamda amaliy yordam koʻrsatdi. Ovuldagi kam taʼminlangan oilalardan birining uy-joyini taʼmirlab, ushbu oilaga 13 bosh echki olib berdi, 2 nafar boquvchisi yoʻq talabalarning kontrakt pullarini toʻladi. Shuhrat Matkarimov 11 ta ehtiyojmand oilaga uy-joyini taʼmirlash uchun qurilish materiallari olib berib, 2 ta kam taʼminlangan oilaning imoratini shiferlashda homiylik yordamlarini koʻrsatdi.
Shuningdek, deputat ovul yoshlarining sifatli taʼlim-tarbiya olishlari uchun hududdagi maktablardagi sharoitlarni yaxshilashga alohida eʼtibor qaratib kelmoqda. Xususan, 32-sonli maktab oʻquvchilari uchun sunʼiy qoplamali mini futbol maydonchasini qurib, maktab atrofini obodonlashtirdi. Bogʻ yaratish uchun yer maydonlarini tekislatib berdi. Maktabga har xil badiiy kitoblar sovgʻa qildi.
Qolaversa, 28-sonli maktab oʻquvchilarining maktabga qatnovi uchun kichik koʻprik qurilishida, Toma aholi punktidagi aholi uchun alohida transformator oʻrnatilishida homiylik qildi. Band boʻlmagan yoshlardan 5 nafarini ish bilan taʼminlash hamda ularning daromad topishlari uchun 16 bosh qoramollar olib berdi. Shu bilan birga, Shuhrat Matkarimov 2020-yilda Toʻlqin ovuliga 17 km. uzunlikdagi optik tolali aloqa tarmogʻini tortish uchun qazish ishlarida 40 mln. soʻm homiylik yordamini koʻrsatdi.
Taʼkidlash kerakki, Shuhrat Matkarimov pandemiya davrida ovuldagi kam taʼminlangan, ehtiyojmand fuqarolarga har tomonlama yordam koʻrsatib kelmoqda. Ovuldagi yordamga muhtoj boʻlgan oilalarga 60 qop un, 80 qop bugʻdoy, 70 kg. oʻsimlik yogʻini xayriya sifatida tarqatdi hamda ulugʻ ayyomlar arafasida, bayramlarda kam taʼminlangan oilalarga un, goʻsht va boshqa oziq-ovqat mahsulotlarini sovgʻa sifatida muntazam ravishda tarqatadi.
Shuhrat Matkarimov yashash tarzi, deputatlik va tadbirkorlik faoliyatida amalga oshirgan ishlarining samaradorligi hamda insoniy fazilatlarining yuksakligi jihatdan undan har tomonlama oʻrnak va ibrat olish lozim boʻlgan, oʻzgalarga namuna sifatida koʻrsatsa arziydigan, tom maʼnodagi, xalq dardi bilan yashaydigan yurt fidoyisi, desak, also mubolagʻa boʻlmaydi.

Charos Arslonova.