Xalq deputatlari Amudaryo tuman Kengashining 22-sessiyasi toʻgʻrisida axborot

Joriy yilning 28-iyul kuni Xalq deputatlari Amudaryo tuman Kengashining navbatdagi 22-sessiyasi boʻlib oʻtdi. Sessiya majlisiga Xalq deputatlari Amudaryo tuman Kengashi raisi Alisher Yoʻldashev raislik qildi.

Sessiya avvalida tuman hokimining birinchi oʻrinbosari Faxriddin Yusupov Amudaryo tumani mahalliy byudjetining 2026-yilning 1-choragidagi ijrosi boʻyicha tuman hokimining taqdimnomasi bilan tanishtirdi. Qayd qilinganidek, 2026-yilning 1-choragi davomida Amudaryo tumani mahalliy byudjetning daromadlar rejasi jami 32,3 milliard soʻm qilib belgilangan boʻlib ushbu reja jami 36,9 milliard soʻmga, ortigʻi bilan bajarilgan. Hisobot davrida maxalliy byudjetdan jami 44,3 milliard soʻmdan ortiq mablagʻlar sarflangan.

Shundan keyin 2026-yil 1-yanvar holatiga aniqlangan erkin qoldiq mablagʻlari hisobidan mahalliy byudjetdan mablagʻ ajratish masalasi koʻrib chiqildi. Sessiya qarori bilan jami 42,26 million soʻm miqdoridagi mablagʻ belgilangan maqsadlar uchun yoʻnaltirildi.

Shundan soʻng, tumanda qonun ustuvorligini taʼminlash hamda mahallalarda xavfsiz muhitni yaratish borasida tuman prokurorining axboroti tinglandi. Hisobot davrida qonunlar ijrosi yuzasidan oʻtkazilgan 79 ta nazorat tadbirlarida 700 dan ortiq qonun buzilish holatlari aniqlangan va qoʻpol qonunbuzarliklar yuzasidan 22 ta jinoyat ishi qoʻzgʻatilgan. Shu bilan birga, tuman hududida 84 ta jinoyat sodir etilgani, oldini olish mumkin boʻlgan jinoyatlar 18,6 foizga oshgani keskin tanqid ostiga olindi.

Mahallalarda kriminogen vaziyatni yaxshilash maqsadida koʻcha va savdo markazlariga 23 ta yuzni tanib oluvchi kameralar oʻrnatilgan. Yolgʻiz keksalar qarovisiz qolmasligi uchun 61 ta xonadonga salkam 28 million soʻmlik “Tashvish” tugmalari oʻrnatilib, probatsiya hisobida turgan 15 nafar mahkum qayta kasbga oʻqitilgan. Oilaviy nizolarning oldini olish doirasida xatlov oʻtkazilib, 116 ta notinch oilaning 53 tasi yarashtirilgan.

Sessiyada huquqbuzarliklarning oldini olish va ularning profilaktikasi holati, shuningdek, jamoat xavfsizligi haqidagi masala yuzasidan Ichki ishlar boʻlimi boshligʻi oʻrinbosari, jamoat xavfsizligi xizmati boshligʻi Sharapat Joldosboyev hisobot berdi. Hisobotda huquqbuzarlik sodir etishga moyil yoki undan jabrlanish ehtimoli yuqori boʻlgan 4702 nafar shaxslar aniqlanib, maxsus elektron axborot tizimiga kiritilgani, profilaktika inspektoriga 1894 nafar, hokim yordamchisiga 667 nafar, xotin qizlar faoliga 722 nafar, yoshlar yetakchilariga 543 nafar, ijtimoiy xodimga 652 nafar, soliq inspektoriga 224 nafar profilaktika obʼektlari boʻyicha xulosalar yuborilgani qayd qilindi.

Sessiyada tumanda favqulodda vaziyatlarning oldini olish boʻyicha amalga oshirilgan ishlar ham muhokama qilindi. Tuman Favqulodda vaziyatlar boʻlimi boshligʻi Zafar Ahmedov bergan maʼlumotlarga koʻra, joriy yilning 2-choragida tumanda 13 ta yongʻin sodir boʻlib, umumiy zarar miqdori 1,5 milliard soʻmdan oshgan. Yongʻin xavfsizligi qoidalarini buzgan shaxslarga nisbatan 447 ta holatda salkam 361 million soʻm jarima qoʻllanilgan va 44 ta obʼektning faoliyati vaqtinchalik toʻxtatilgan. Aholi xavfsizligini taʼminlash maqsadida favqulodda vaziyatlardan muhofaza qilish oyligi doirasida mahalla va tashkilotlarda 129 ta seminar oʻtkazilib, ularga 1107 nafar fuqaro jalb qilingan.

Sessiyada deputatlar tomonidan 2026-yilgi vegetatsiya davri uchun suv olish limitlari va 2026-2027-yillarda koʻp kvartirali uylar atrofida qurilishi rejalashtirilgan infratuzilma obʼektlarining yangi parametrlari tasdiqlandi. Bundan tashqari, Kengash vakolatiga kiruvchi boshqa masalalar ham muhokama qilindi va har bir masala yuzasidan Xalq deputatlari tuman Kengashining tegishli qarorlari qabul qilindi.