Ёшларнинг ёт ғоялар таъсирига тушиб қолишларининг олдини олишга қаратилган тадбир ўтказилди

Бугунги кунда диний экстремизм ва терроризмнинг олдини олиш ва чек қўйиш ҳамда уларни молиялаштириш манба ва каналларига барҳам беришга қаратилган самарали чора-тадбирларни белгилаш, бу борада миллий ва халқаро даражада саъй-ҳаракатларни бирлаштириш давлат сиёсатининг энг муҳим йўналишларидан ҳисобланади.

2017-2021-йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифалардан келиб чиққан ҳолда, шунингдек, экстремизм ва терроризмга қарши курашиш чора-тадбирларини такомиллаштириш мақсадида имзоланган Ўзбекистон Республикаси Президентининг “2021 - 2026-йилларга мўлжалланган экстремизм ва терроризмга қарши курашиш бўйича Ўзбекистон Республикаси Миллий стратегиясини тасдиқлаш тўғрисида”ги фармони бу борадаги ишларни янги босқичга кўтаришда муҳим ҳужжат бўлиб хизмат қилмоқда.

Амударё тумани Халқ таълими бўлимига қарашли 38-сонли мактабда ёшларнинг исломга ёт ғоялар таъсирига тушиб қолишларининг олдини олиш, диний экстремизм ва терроризмга қарши курашиш масалаларига бағишланган тарғибот-тушунтириш тадбири ташкил этилди. Тадбирда туман Ички ишлар бўлими ходими Улуғбек Пўлатов мактаб ўқувчиларига ислом динига ёт бўлган ғоялар, уларнинг аянчли оқибатлари ва улардан сақланиш йўллари ҳақида кенг тушунчалар бериб ўтди.

Таъкидланганидек, ёшлар ҳар бир жамиятнинг энг ишонган ва муҳим қатлами ҳисобланади. Сабаби, мамлакат эртанги куни уларнинг қандай шахс бўлиб шаклланишлари ҳамда мақсадларига боғлиқ. Айнан шу сабабдан уларни зарарли ғоялар ва ёт фикрлардан ҳимоялаш долзарбдир.

Ҳозирда ёшлар онгига таъсир қилиб, улар қалбига ўз бузғунчи ғояларини сингдиришни ёки уларни тўғри йўлдан оздиришни мақсад қилган кучлар тобора ортиб бормоқда. Бу ҳолат оддий компьютер ўйинларидан тортиб интернет сайтлари, ижтимоий тармоқлар, мобил алоқа дастурларида ҳам очиқ кўзга ташланади. Юзаки қараганда, арзимас туюладиган бу ҳаракатлар вақт ўтгани сари жиддийлашиб, қатъийлашиб бораверади.

Айтиш керакки, мамлакатимизда диний бағрикенглик ва виждон эркинлигини таъминлашга, шунингдек, ёшларни террористик, экстремистик ва бошқа бузғунчи ғоялар таъсиридан самарали ҳимоя қилишга қаратилган жамиятда ижтимоий-маънавий муҳитни соғломлаштириш бўйича кенг кўламли чора-тадбирлар амалга оширилмоқда. Бу борада умумтаълим мактаблари ўқувчилари орасида ташкил этилаётган тарғибот ва тушунтириш тадбирларининг аҳамияти катта.

Тарғибот тадбирида ўқувчиларга сабабсиз дарс қолдирмасликлари, ўтилаётган ҳар бир дарсни қунт билан ўзлаштиришлари лозимлиги, мактабга ўз вақтида келиш ва кетиш зарурлиги, шунингдек, ҳар бир ўқувчи одоб-ахлоқ қоидаларига амал қилишлари, ҳар бир дақиқадан унумли фойдаланиб билим олишлари лозимлиги тушунтирилди.

Қолаверса, тинч, осуда, осойишта ҳаётимизга хавф солаётган иллатлар-диний экстремизм ва терроризмга қарши курашиш фақатгина ҳуқуқни муҳофаза қилувчи давлат органларинингина эмас, балки ҳар фуқаронинг жамият олдидаги асосий бурчи эканлиги таъкидланди.

Тадбир иштирокчиларига доимо огоҳ, атрофимиздаги инсонларга эътиборли бўлишлари лозимлиги, шу каби жиноий ҳодисаларга дуч келиб қолган тақдирда ИИБ ходимларига зудлик билан хабар бериш кераклиги айтиб ўтилди.

Йиғилиш сўнгида мавзу юзасидан иштирокчилар ўзларини қизиқтирган саволларига жавоблар олдилар.

Туман ҳокимлигининг Ахборот хизмати.