Yoshlarning yot gʻoyalar taʼsiriga tushib qolishlarining oldini olishga qaratilgan tadbir oʻtkazildi

Bugungi kunda diniy ekstremizm va terrorizmning oldini olish va chek qoʻyish hamda ularni moliyalashtirish manba va kanallariga barham berishga qaratilgan samarali chora-tadbirlarni belgilash, bu borada milliy va xalqaro darajada saʼy-harakatlarni birlashtirish davlat siyosatining eng muhim yoʻnalishlaridan hisoblanadi.

2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalardan kelib chiqqan holda, shuningdek, ekstremizm va terrorizmga qarshi kurashish chora-tadbirlarini takomillashtirish maqsadida imzolangan Oʻzbekiston Respublikasi Prezidentining “2021 - 2026-yillarga moʻljallangan ekstremizm va terrorizmga qarshi kurashish boʻyicha Oʻzbekiston Respublikasi Milliy strategiyasini tasdiqlash toʻgʻrisida”gi farmoni bu boradagi ishlarni yangi bosqichga koʻtarishda muhim hujjat boʻlib xizmat qilmoqda.

Amudaryo tumani Xalq taʼlimi boʻlimiga qarashli 38-sonli maktabda yoshlarning islomga yot gʻoyalar taʼsiriga tushib qolishlarining oldini olish, diniy ekstremizm va terrorizmga qarshi kurashish masalalariga bagʻishlangan targʻibot-tushuntirish tadbiri tashkil etildi. Tadbirda tuman Ichki ishlar boʻlimi xodimi Ulugʻbek Poʻlatov maktab oʻquvchilariga islom diniga yot boʻlgan gʻoyalar, ularning ayanchli oqibatlari va ulardan saqlanish yoʻllari haqida keng tushunchalar berib oʻtdi.

Taʼkidlanganidek, yoshlar har bir jamiyatning eng ishongan va muhim qatlami hisoblanadi. Sababi, mamlakat ertangi kuni ularning qanday shaxs boʻlib shakllanishlari hamda maqsadlariga bogʻliq. Aynan shu sababdan ularni zararli gʻoyalar va yot fikrlardan himoyalash dolzarbdir.

Hozirda yoshlar ongiga taʼsir qilib, ular qalbiga oʻz buzgʻunchi gʻoyalarini singdirishni yoki ularni toʻgʻri yoʻldan ozdirishni maqsad qilgan kuchlar tobora ortib bormoqda. Bu holat oddiy kompyuter oʻyinlaridan tortib internet saytlari, ijtimoiy tarmoqlar, mobil aloqa dasturlarida ham ochiq koʻzga tashlanadi. Yuzaki qaraganda, arzimas tuyuladigan bu harakatlar vaqt oʻtgani sari jiddiylashib, qatʼiylashib boraveradi.

Aytish kerakki, mamlakatimizda diniy bagʻrikenglik va vijdon erkinligini taʼminlashga, shuningdek, yoshlarni terroristik, ekstremistik va boshqa buzgʻunchi gʻoyalar taʼsiridan samarali himoya qilishga qaratilgan jamiyatda ijtimoiy-maʼnaviy muhitni sogʻlomlashtirish boʻyicha keng koʻlamli chora-tadbirlar amalga oshirilmoqda. Bu borada umumtaʼlim maktablari oʻquvchilari orasida tashkil etilayotgan targʻibot va tushuntirish tadbirlarining ahamiyati katta.

Targʻibot tadbirida oʻquvchilarga sababsiz dars qoldirmasliklari, oʻtilayotgan har bir darsni qunt bilan oʻzlashtirishlari lozimligi, maktabga oʻz vaqtida kelish va ketish zarurligi, shuningdek, har bir oʻquvchi odob-axloq qoidalariga amal qilishlari, har bir daqiqadan unumli foydalanib bilim olishlari lozimligi tushuntirildi.

Qolaversa, tinch, osuda, osoyishta hayotimizga xavf solayotgan illatlar-diniy ekstremizm va terrorizmga qarshi kurashish faqatgina huquqni muhofaza qiluvchi davlat organlariningina emas, balki har fuqaroning jamiyat oldidagi asosiy burchi ekanligi taʼkidlandi.

Tadbir ishtirokchilariga doimo ogoh, atrofimizdagi insonlarga eʼtiborli boʻlishlari lozimligi, shu kabi jinoiy hodisalarga duch kelib qolgan taqdirda IIB xodimlariga zudlik bilan xabar berish kerakligi aytib oʻtildi.

Yigʻilish soʻngida mavzu yuzasidan ishtirokchilar oʻzlarini qiziqtirgan savollariga javoblar oldilar.

Tuman hokimligining Axborot xizmati.