ВАРИАТИВ ЎҚУВ-РЕЖА АСОСИДАГИ МАШҒУЛОТЛАР ТАЪЛИМ САМАРАСИНИ ОШИРАДИ

Ёш авлодни юртга муносиб, жамият келажагига дахлдор, комил инсонлар қилиб тарбиялаш бугунги кундаги долзарб вазифа саналади. Шу боис, таълим-тарбия тизими тубдан ислоҳ қилиниб, соҳада муҳим ўзгаришлар, кенг қамровли ва самарали чора-тадбирлар амалга оширилмоқда.

Тумандаги 36-сонли умумий ўрта таълим мактабида ҳам мазкур ўқув йилидан бошлаб, 10-11-синфлар ўқувчилари учун вариатив ўқув-режа асосида дарслар ташкил этилди. Кимё-биология фанидан ташкил этилган вариатив ўқув-режа асосидаги машғулотлар мактабдаги тажрибали, маҳоратли, Ўзбекистон ва Қорақалпоғистон халқ таълими аълочиси, талабчан ўқитувчи Райҳон Қаландарова томонидан олиб борилмоқда.

Мазкур мактаб туманимизда 1974 йилда фаолият бошлаган бўлиб, барча даврларда ўқувчиларга кўплаб тажрибали, юксак савияли устоз-ўқитувчилар таълим беришган. Ушбу мактабдан етишиб чиққан билимли, иқтидорли инсонлар турли жабҳаларда хизмат қилиб, жамият тараққиётига ҳисса қўшиб келишмоқда.

Айни пайтда 560 ўринга мўлжалланган таълим масканида 30 та синфда 824 нафар ўқувчи таълим-тарбия олмоқда. Уларга 72 нафар педагог-ўқитувчилар янги педагогик технологиялар асосида таълим беришмоқда. Педагогларнинг 1 нафари олий тоифали, 7 нафари 1-тоифали, 22 нафари 2-тоифали, 42 нафари эса мутахассис ўқитувчилардир. Ўқувчиларнинг бўш вақтларини мазмунли ташкил этиш, унумли фойдаланишларини таъминлаш мақсадида 8 та фан, 4 та спорт, 2 та ижтимоий-маданий тўгараклар фаолияти йўлга қўйилган. Шунингдек, ўқувчи-ёшлар барча имкониятларга эга футбол, баскетбол ва волейбол майдончалари ҳамда ёпиқ спорт залида спорт билан шуғулланишади. Мактаб ахборот коммуникация воситалари билан ҳам жиҳозланган.

Ўтган ўқув йилида мактабнинг 8-синф ўқувчиси Б.Атамуродов  спортнинг   стол тенниси тури бўйича ўтказилган мусобақада туманда 1-ўринни эгаллади. Кимё фанидан фанлар  олимпиадасининг туман босқичида  мактабнинг 10-синф ўқувчиси  Н.Ёдгорова 1-ўрин ғолиби бўлди. Она тили ва адабиёт фани бўйича фанлар олимпиадасининг туман босқичида қатнашган 10-синф ўқувчиси  М.Ўрозимбетова 3-ўринни қўлга киритди. Шунингдек, 11-синф ўқувчиси Т.Файзуллаев инглиз тили фани бўйича  фанлар олимпиадасининг туман босқичида  3-ўринни эгаллади.

2019-2021 ўқув йилида мактаб битирувчиларини олий таълимга қамраб олиш кўрсаткичи 18 фоизни ташкил қилган бўлса, мазкур ўқув йилида 26 фоизга етказилди. Мактабда жорий ўқув йилида ўқувчиларнинг қизиқишларига кўра ташкил этилаётган вариатив ўқув-режа асосидаги машғулотлар орқали таълим олувчиларнинг билимлари янада бойитилиб, бу борадаги кўрсаткични юқори кўтариш мақсад қилинган. Машғулотларда ўқувчиларга таълим бераётган Р.Қаландарова нафақат 36-сонли умумтаълим мактабида, балки туман миқёсида намунали, билимдон ўқитувчи сифатида ҳурмат-эътиборга эга. У таълим соҳасидаги самарали  меҳнатлари ва намунали педагогик фаолияти учун 2005 йилда “Қорақалпоғистон Республикаси халқ таълими аълочиси” ҳамда 2019 йилда “Ўзбекистон Республикаси халқ таълими аълочиси”  кўкрак нишонлари билан тақдирланган. Тажрибали педагог 2018-2019 ўқув йилида “Йилнинг энг яхши фан ўқитувчиси” кўрик-танловида қатнашиб, туман ва Қорақалпоғистон Республикаси босқичларида фахрли 1-ўринни эгаллади ва Ўзбекистон босқичида муваффақиятли иштирок этди.

Жорий йилда Р.Қаландарованинг яна бир ўқувчиси Нукус шаҳрида ўқувчи-ёшлар ўртасида ўтказилган табиий фанлар бўйича олимпиаданинг Қорақалпоғистон босқичида муваффақиятли иштирок этиб, энг юқори баллни қўлга киритди. Устозидан чуқур билим олган мактабнинг 9-синф ўқувчиси С.Нажмиддинова мазкур олимпиаданинг 1-ўрин ғолиби сифатида Фарғона шаҳрида ўтказиладиган мамлакат босқичида қатнашиш бахтига мушарраф бўлди.

Тажрибали, билимдон ва маҳоратли ўқитувчидан таълим олган ўқувчилар, албатта, эртага чуқур билимли, тафаккури кенг ва комил инсонлар бўлиб улғаяди. Улуғ аждодларимизга муносиб тарзда камол топган ёшлар Ватанимизни тараққиёт сари етаклаб, буюк келажак яратади.

Саҳифани О.Худойберганова тайёрлади.