БОШЛАНҒИЧ ТАЪЛИМ ФАН ОЙЛИГИ ЯКУНИДА “ОЧИҚ ЭШИКЛАР КУНИ” ЎТКАЗИЛДИ
Умумтаълим мактаблари юқори синф ўқувчиларининг билим асосларини пухта эгаллаш борасидаги кўникма ва малакалари, ўз олдиларига аниқ мақсад қўйган ҳолда қатъият билан интилиш ва изланишлари, шунингдек, одоб ва ахлоқий жиҳатдан маънан етук бўлиб вояга етишишлари уларга илк бошланғич таълим-тарбия бериш сифатига, айниқса, бошланғич синф ўқитувчиларининг билим ва тажрибасига боғлиқ.
Шунинг учун ҳам сўнгги йилларда мамлакатимиз халқ таълими тизимида бошланғич таълим сифатини энг ривожланган давлатлар тажрибаси асосида ислоҳ қилиш, бошланғич синфларда дарс берувчи ўқитувчилар малакасини ошириш, янги педтехнологияларни соҳага кенг жорий этишга алоҳида эътибор қаратилмоқда.
Бунда бошланғич синфларда фан ойликларини ўтказиш орқали инновацион тажриба алмашувларни ташкил этиш, ўқувчиларнинг ҳамда бошланғич синф ўқитувчиларининг билимларини синовдан ўтказиш, ютуқларини рағбатлантириб бориш муҳим аҳамият касб этмоқда. Бу борада Амударё туманидаги умумтаълим мактабларида амалга оширилаётган тадбирлар ҳам эътиборга муносиб.
28 сентябрь куни 40-сонли умумтаълим мактабида Ўқитувчи ва мураббийлар куни муносабати билан ўтказилган “Очиқ эшиклар куни” тадбири сентябрь ойи давомида бўлиб ўтган бошланғич синфлар фан ойлиги доирасида амалга оширилган барча ишларнинг умумлаштирилган ҳисоботи бўлди.
Бошланғич синфлар фан ойлиги доирасида бири-биридан қизиқарли тадбирлар ўтказилиб, бу тадбирларда нафақат ўқувчилар, балки, ўқитувчиларнинг ҳам билимлари синовдан ўтказилди.
Фан ойлиги доирасида “Билимдонлар беллашуви”, “Ўйла, изла, топ” викторина ўйинлари, “Кимнинг хати чиройли” диктантлар танлови, расм чизиш бўйича мусобақалар ўтказилиб, ҳар бир синф ўз деворий газеталарини чиқаришди. Математика, ўқиш, инглиз тили, она тили, атрофимиздаги олам, тарбия фанларидан ўтказилган очиқ дарсларни мактабнинг малакали ўқитувчилари кузатиб боришди ва “Энг яхши дарс ишланмаси”, “Энг билимдон синф”, “Энг яхши деворий газета”, “Энг яхши кўргазмали қурол” йўналишлари бўйича ғолиблар аниқланди.
“Очиқ эшиклар куни” тадбири давомида фан ойлиги доирасида ўтказилган барча тадбирлар умумлаштирилди. Ушбу тадбирда 27-сонли ҳамда 16-сонли умумтаълим мактабларининг бошланғич синфлар ўқитувчилари иштирок этдилар. Унда бошланғич синфларда ўқувчиларнинг билим ва кўникмаларини баҳолаш, уларнинг қизиқишлари, алоҳида қобилиятлари бўйича аниқ йўналиш бериш, иқтидорли ўқувчиларни рағбатлантириш бўйича бошланғич синф ўқитувчилари ўзаро тажриба алмашдилар.
Шунингдек, фан ойлиги доирасида ўтказилган тадбирлар, очиқ дарслар бўйича ҳисоботлар тингланди ва энг яхши ўқитувчилар, энг билимдон ўқувчилар алоҳида эътироф этилди.
Тадбирда Бошланғич таълим услуббирлашма йиғилиши ўтказилиб, бошланғич синф ўқитувчиларининг ютуқлари рағбатлантирилди ва камчиликлар муҳокама этилди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
