BOShLANGʻICh TAʼLIM FAN OYLIGI YaKUNIDA “OChIQ EShIKLAR KUNI” OʻTKAZILDI

Umumtaʼlim maktablari yuqori sinf oʻquvchilarining bilim asoslarini puxta egallash borasidagi koʻnikma va malakalari, oʻz oldilariga aniq maqsad qoʻygan holda qatʼiyat bilan intilish va izlanishlari, shuningdek, odob va axloqiy jihatdan maʼnan yetuk boʻlib voyaga  yetishishlari ularga ilk boshlangʻich taʼlim-tarbiya berish sifatiga, ayniqsa, boshlangʻich sinf oʻqituvchilarining  bilim va tajribasiga bogʻliq.

Shuning uchun ham soʻnggi yillarda mamlakatimiz xalq taʼlimi tizimida boshlangʻich taʼlim sifatini eng rivojlangan davlatlar tajribasi asosida isloh qilish, boshlangʻich sinflarda dars beruvchi oʻqituvchilar malakasini oshirish, yangi  pedtexnologiyalarni sohaga keng joriy etishga alohida eʼtibor qaratilmoqda.

Bunda boshlangʻich  sinflarda fan oyliklarini oʻtkazish orqali innovatsion tajriba almashuvlarni tashkil etish, oʻquvchilarning hamda boshlangʻich sinf oʻqituvchilarining bilimlarini  sinovdan oʻtkazish, yutuqlarini ragʻbatlantirib borish muhim ahamiyat kasb etmoqda. Bu borada Amudaryo tumanidagi umumtaʼlim maktablarida amalga  oshirilayotgan tadbirlar ham eʼtiborga munosib.

28-sentyabr kuni 40-sonli umumtaʼlim maktabida Oʻqituvchi va murabbiylar kuni munosabati bilan oʻtkazilgan “Ochiq eshiklar kuni” tadbiri sentyabr oyi davomida boʻlib oʻtgan boshlangʻich sinflar fan oyligi doirasida amalga oshirilgan barcha ishlarning umumlashtirilgan hisoboti boʻldi.

Boshlangʻich sinflar fan oyligi doirasida biri-biridan qiziqarli tadbirlar oʻtkazilib, bu tadbirlarda nafaqat oʻquvchilar, balki, oʻqituvchilarning ham bilimlari sinovdan oʻtkazildi.

Fan oyligi doirasida “Bilimdonlar bellashuvi”, “Oʻyla, izla, top” viktorina oʻyinlari, “Kimning xati chiroyli” diktantlar tanlovi, rasm chizish boʻyicha musobaqalar oʻtkazilib, har bir sinf oʻz devoriy gazetalarini chiqarishdi. Matematika, oʻqish, ingliz tili, ona tili, atrofimizdagi olam, tarbiya fanlaridan oʻtkazilgan ochiq darslarni maktabning malakali oʻqituvchilari kuzatib borishdi va “Eng yaxshi dars ishlanmasi”, “Eng bilimdon sinf”, “Eng yaxshi devoriy gazeta”, “Eng yaxshi koʻrgazmali qurol” yoʻnalishlari boʻyicha gʻoliblar aniqlandi.

“Ochiq eshiklar kuni” tadbiri davomida fan oyligi doirasida oʻtkazilgan barcha tadbirlar umumlashtirildi. Ushbu tadbirda 27-sonli hamda 16-sonli umumtaʼlim maktablarining boshlangʻich sinflar oʻqituvchilari ishtirok etdilar. Unda boshlangʻich sinflarda oʻquvchilarning bilim va koʻnikmalarini baholash, ularning qiziqishlari, alohida qobiliyatlari boʻyicha aniq yoʻnalish berish, iqtidorli oʻquvchilarni ragʻbatlantirish boʻyicha boshlangʻich sinf oʻqituvchilari oʻzaro tajriba almashdilar.

Shuningdek, fan oyligi doirasida oʻtkazilgan tadbirlar, ochiq darslar boʻyicha hisobotlar tinglandi va eng yaxshi oʻqituvchilar, eng bilimdon oʻquvchilar alohida eʼtirof etildi.

Tadbirda Boshlangʻich taʼlim uslubbirlashma yigʻilishi oʻtkazilib, boshlangʻich sinf oʻqituvchilarining yutuqlari ragʻbatlantirildi va kamchiliklar muhokama etildi.

Robiya YOʻLDOShEVA.