Туманимизда “Кексалар ҳафталиги” доирасидаги тадбирлар юқори савияда ўтказилди

Бутун мамлакатимиз бўйлаб жорий йилнинг 4-10 октябрь кунлари ўтказилган “Кексалар ҳафталиги” доирасида қатор тадбирлар ташкил этилди. Нуронийларнинг ҳолидан хабар олиниб, уларни маънавий ва жисмоний қўллаб-қувватлаш, ҳурмат-эҳтиром кўрсатиш ва эъзозлаш бўйича қатор чора-тадбирлар амалга оширилди. Ушбу ҳафталикни муносиб ўтказиш ва юқори савияда ташкил этиш бўйича чора-тадбирлар режаси ишлаб чиқилиб, карантин қоидаларига риоя қилган ҳолда амалга оширилишини таъминлашга алоҳида эътибор қаратилди.

Амударё туманида ҳам “Кексалар ҳафталиги” доирасида ҳар бир маҳаллада нуронийлар, шу жумладан, якка-ёлғиз кексаларни жалб этган ҳолда маънавий-маърифий тадбирлар, турли танловлар ва хайрия тадбирлари ўтказилди. Жумладан, 9 октябрь куни Уйшин маҳалласи маданият уйида “Янги Ўзбекистонни барпо этишда нуронийларнинг ўрни” ҳамда “Дийдор ширин” мавзуларида давра суҳбатлари ҳамда ҳудуддаги отахонлар ва онахонлар учун “Эҳтиром, эъзоз, эътибор” номли байрам тадбири ташкил этилди.

Тадбирида сўзга чиққан туман Маҳалла ва оилани қўллаб-қувватлаш бўлими бошлиғи ўринбосари, “Нуронийлар” жамоатчилик кенгаши раиси Баҳодир Болтабаев, раис ўринбосари Бекман Аллабергановлар ёши улуғ кишиларни ушбу ҳафталик муносабати ўтказилаётган байрам билан табрикладилар ҳамда мазкур “Кексалар ҳафталиги”нинг ташкил этилиши юртимизда нуронийлар ҳамда кексаларни эъзозлашга, уларни ардоқлашга қаратилган чексиз ҳурмат ҳамда эътиборнинг ёрқин ифодаси эканлигини таъкидладилар.

Байрам тадбирида хонандалар ижросида куйланган ажойиб куй-қўшиқлар тадбирга янада кўтаринки руҳ бағишлади. Тадбирда маҳаллада жойлашган умумтаълим мактаблари ўқувчилари фаол иштирок этиб, 47-сонли мактаб ўқувчилари томонидан намойиш этилган саҳна кўринишлари, ўқилган шеър ва ғазаллар меҳмонлар кўнглида ажойиб таассурот қолдирди.

Тадбир давомида туман ҳокими ўринбосари, Маҳалла ва оилани қўллаб-қувватлаш бўлими бошлиғи Алишер Юлдашев томонидан нуроний отахон ҳамда онахонларга эсдалик совғалари улашилди. Юқори кайфиятда ўтган байрам тадбири сўнгида нуронийлар тадбир ташкилотчиларига раҳмат айтиб дуо қилдилар.

Ҳафталик мобайнидаги шундай тадбирлардан бири 9 октябрь куни тумандаги Чойкўл овулида ҳам бўлиб ўтди. Овулда жойлашган “Бахт” номли тўйхонада “Бир пиёла чой устида ширин суҳбатлар”, “Дийдор ширин” мавзуларида давра суҳбатлари, “Эҳтиром, эъзоз, эътибор” номли байрам тадбири ташкил этилиб, байрам дастурхони ёзилди.

Тадбирда иштирок этаётган мутасаддилар овулдаги нуроний отахон ва онахонларни ҳафталик доирасида ташкил этилаётган байрам муносабати билан табрикладилар, уларга узоқ умр, сиҳат-саломатлик ва тинчлик-осойишталик тиладилар.  Чойкўл овул фуқаролар йиғини раиси, фаоллари, ҳудуддаги фермерлар ҳамда тадбиркорлар ташаббуси билан ташкил этилган тадбирда 40 нафардан ортиқ кекса авлод вакиллари иштирок этдилар. Тадбирда 22-сонли мактаб ўқувчилари томонидан қизиқарли саҳна кўринишлари намойиш этилиб, хонандалар ажойиб куй-қўшиқлар ижро этдилар.

Тадбирдан сўнг туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова ҳудудда истиқомат қилувчи 104 ёшни қарши олган онахон Хадича момо Беканова ҳолидан хабар олди ҳамда момони байрам билан табриклади.

Суҳбат чоғида Хадича момо ўзнинг шу ёшгача бўлган умри давомидаги яхши-ёмон кунлари, бошидан ўтказган кечинмалари билан бўлишди. Сўнгра масъулларга миннатдорчилик билдириб, дуолар қилди.

Чарос Арслонова.