Инглиз тили фани бўйича очиқ дарс ўтказилди
Бугунги кунда мамлакатимизда хорижий тилларни ўқитиш орқали ёш авлодни она Ватанга муҳаббат ва садоқат, қадимий ва бой меросимизга ифтихор туйғуси, миллий ва умуминсоний қадриятлар руҳида тарбиялашга алоҳида эътибор қаратилиб бу борада самарали ишлар қилинмоқда. Ёшларнинг чет тилларни мукаммал ўрганишлари, барча соҳаларда чет тилини билган ҳолда ўзларини намоён эта олишлари учун зарур шарт-шароитлар ва имкониятлар яратилиб, уларнинг хорижий тилда оғзаки ва ёзма нутқларини ривожлантиришга йўналтирилган тизимли ишлар ташкил этилмоқда.
Таълим муассасаларида таълим олувчиларнинг чет тилида фикр юритишлари, эркин нутқни амалга ошира олиш қобилиятларини ривожлантириш, интеллектуал фаолиятини шакллантириш, чет тилини тез ва осон ўрганишларига алоҳида эътибор қаратилиб, дарс жараёнлари ўқувчиларнинг мустақил изланишларига йўналтирилган ҳолда ташкил этилмоқда. Бу борада замонавий таълим методларидан самарали фойдаланган ҳолда ўтказилаётган очиқ дарслар муҳим аҳамият касб этмоқда.
Амударё тумани Халқ таълими бўлимига қарашли 30-сонли умумтаълим мактабида инглиз тили фани бўйича ўтказилган очиқ дарсда ўқувчиларнинг чет тили бўйича билимлари янада бойитилди. Мактабнинг 6-синф ўқувчилари учун ташкил этилган дарс машғулотида “What is in the fridge?” мавзусида ўқувчиларда янги билимлар ҳосил қилинди.
Мактабнинг инглиз тили фани ўқитувчиси Наргиза Қурбанбоева ушбу очиқ дарсга астойдил тайёргарлик кўргани дарс жараёнида яққол намоён бўлди. Очиқ дарсда туман Халқ таълими бўлими инспектор методисти Райҳон Якубова, инглиз тили фани методисти Фарида Шамсиддинова ҳамда мактабнинг турли фан ўқитувчилари иштирок этдилар ҳамда инглиз тили фани ўқитувчиси Наргиза Қурбанбоеванинг педогогик маҳорати билан танишдилар.
Очиқ дарс жараёнида дастлаб ўқувчилардан уйга берилган вазифалари сўралди, сўнгра электрон доска орқали янги мавзу юзасидан тушунчалар берилди. Ўқитувчи очиқ дарсда ҳам анъанавий ҳам замонавий таълим методларидан, инновацион педогогик технологиялардан, турли кўргазмали қуроллардан ҳамда тарқатма материаллардан фойдаланди.
Очиқ дарснинг ўқувчиларни кичик гуруҳларга ажратган ҳолда, ўйин технологияларидан фойдаланиб ташкил этилгани ўқувчиларнинг дарсга бўлган қизиқишларини янада ошириб, уларнинг машғулотда фаол иштирокини таъминлади.
Айтиш керакки, бугунги кунда мамалакатимизда чет тилларни ўқитишнинг сифатини ошириш ва янада самарали усулларини таълим жараёнига тадбиқ қилиш, чет тиллари бўйича илмий-тадқиқот ишларини янада ривожлантириш, илмий салоҳиятли мутахассисларни тайёрлаш таълим соҳасидаги долзарб масалаларидан бири ҳисобланади. Мамлакатимиз таълим тизимида илмий-назарий жиҳатдан асосланган, чет тилларни ўқитишда нутқий мулоқотга йўналтирилган янги педагогик технологияларни ёритувчи ва информацион технологиялар билан жиҳозланган дарсликлар, ўқув-қўлланмаларни яратиш ва ўқув жараёнига жорий этиб, хорижий тил таълимини янада такомиллаштириш миллий таълим дастурининг асосий мақсади ҳисобланади.
Ёшларга чет тилларини мукаммал тарзда ўргатишда ўқитувчиларга катта масъулият юклатилган бўлиб, улардан ўз устида мунтазам ишлаш, дарс жараёнларига ижодий ёндашиш, доимо билим, кўникма ва малакаларини ошириб бориш талаб этилади.
Туманимиздаги 30-сонли мактабда инглиз тили фани бўйича ташкил этилган очиқ дарсда ўқитувчи Наргиза Қурбанбоеванинг ўз касбига бўлган меҳри ҳамда ишига бўлган масъулияти билан очиқ дарсда иштирок этганларда илиқ таассурот қолдирди.
Чарос Арслонова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
