“БУВИЖОНИМ КИЙГАН ЛИБОСЛАР” ТАДБИРИДА МИЛЛИЙ ЛИБОСЛАР НАМОЙИШ ЭТИЛДИ

Ҳар йили жаҳон бўйлаб 11 октябрь  — “Халқаро қизлар куни” турли давлатларда қизларнинг камситилиши, уларнинг ижтимоий муаммоларига эътибор қаратиш мақсадида нишонланиб келинмоқда. Ҳар йили ушбу ўзига хос сана муносабати билан бутун дунёда гендер тенглиги, эрта никоҳ, таълим олишдаги тенгсизлик, меҳнат муносабатлари, замонавий касб-ҳунарларни эгаллашдаги нотенглик каби қизлар ҳаётида учрайдиган глобал муаммоларга жамоатчилик нигоҳи қаратилади, миллий ва халқаро даражадаги илмий анжуманлар, форумлар, учрашувлар ташкил этилади.

Мамлакатимиздаги каби анъанавий тарзда мазкур санага бағишлаб, туманимизда ҳам иқтидорли ҳамда уюшмаган қизларни ҳар томонлама қўллаб-қувватлаш, уларнинг ижтимоий-сиёсий фаоллигини оширишга қаратилган маърифий-маданий тадбирлар ўтказилди.

13 октябрь куни 10-сонли умумтаълим мактабида Халқаро қизлар куни муносабати билан “Бувижоним кийган либослар” деб номланган тадбир ўтказилиб, қадим аждодларимиздан мерос бўлиб келаётган миллий либосларимиз намойиш этилди. Мактабнинг хотин-қизлар бошланғич ташкилоти раиси Умида Ўрозимбетова, маънавий-маърифий ишлар бўйича директор ўринбосари Гулмирза Бозорбоев, ижодий-маданий ишлар тарғиботчиси Нигора Еримбетова, ёшлар етакчиси Марал Агабоевалар томонидан ташкил этилган тадбирда мактаб ўқувчилари ва ўқитувчилари иштирок этдилар.

Тадбир давомида либос ҳар бир халқ миллий маданиятини, миллий қадриятларини ўзида акс эттирувчи энг муҳим белги эканлиги тўғрисида сўз юритилиб, “Кийиниш маданияти”, “Мутаассиблик ва ёт ғоялар таъсирига тушиб қолмаслик”, “Миллий урф-одатлар ва анъаналар”, “Қиз бола одоби”, “Саришталик уй – фаришталик уй” мавзуларида маърузалар қилинди. Шунингдек, туманимиз ҳудудида истиқомат қилувчи 4 миллатга хос бўлган бувилар, оналар кийган миллий либослар, қизларнинг уй, мактаб, меҳмондорчиликда ва байрамда кийиладиган замонавий кийимлари кўргазмалари намойиш этилди. Либослардаги миллийлик, айниқса, атлас, адрас, беқасам сингари матолардан тикилган миллий кийимларнинг кўркам ва хушбичимлиги, ўзига хослиги барчага жуда манзур бўлди.

Тадбирда ушбу сананинг нишонланиши сабабларига ҳам кенг тўхталиб ўтилди. Бирлашган Миллатлар Ташкилоти ташаббуси билан 2012 йилдан бошлаб, ҳар йилнинг 11 октябрида нишонлана бошлангани, халқаро ташкилотлар ва аъзо давлатларга ушбу санани кенг нишонлаш, бутун дунё бўйлаб қизларнинг ҳаёт тарзи, ҳуқуқ ва эркинликлари, улар дуч келадиган ижтимоий муаммолар, яшаш шароитлари билан боғлиқ ҳолатларни тадқиқ этиш тавсия этилгани айтилди.

Шунингдек, дунёда 15–19 ёш оралиғидаги ҳар тўрт нафар қиздан бири ишлаш, ўқиш ва касбий тайёргарлик имкониятига эга эмаслиги тилга олиниб,  сўнгги йилларда амалга оширилган кенг қамровли ислоҳотлар натижасида Ўзбекистон Республикасида жамият ҳаёти ва фаолиятининг барча соҳаларида хотин-қизлар ва эркаклар учун тенг ҳуқуқ ҳамда имкониятларни таъминлаш масалалари бўйича мустаҳкам ҳуқуқий асослар яратилгани эътироф этилди.

Қизлар юксак фаоллик билан қатнашиб, ўзларининг миллий қадриятларимизга, момоларимизнинг умрбоқий удум ва анъаналарига муҳаббатларини, ҳурматларини билдиришди. Либослар намойишидан сўнг, “Узун сочлар жилоси” танлови ҳам ўтказилди. Танловда қизлар миллий соч ўримларини, турмакларини кўрсатиб, уларнинг қизларга алоҳида кўрк бағишлашини намойиш этишди.

Ўсиб келаётган ёш авлод, ўқувчи-қизлар қалбига миллий либослар ифтихорини сингдириш, “мода” ортидан қувиб, маънавиятимизга зид кийиниш “маданияти”нинг салбий таъсиридан сақлаш мақсадида ўтказилган тадбирда иштирок этган қизлар ташкилотчилар томонидан рағбатлантирилди.

О.Худойберганова.