ТИЛ БАЙРАМИ МУНОСАБАТИ БИЛАН 76-СОНЛИ МАКТАБДА ТАДБИР ЎТКАЗИЛДИ
Ўзбек тилига 1989 йил 21 октябрда давлат тили мақоми берилди. Бу халқимизнинг миллий мустақилликка эришиш йўлидаги муҳим қадамлардан бири бўлди ва она тилимизнинг бор гўзаллиги, жозибасини тўла намоён этиш билан бирга, уни илмий асосда ривожлантириш борасида ҳам кенг имкониятлар яратилди. Шундан буён ҳар йили сана муносабати билан турли тадбирлар ўтказилиб кенг миқёсда нишонлаш анъанага айланди. 2020 йилдан бошлаб эса ўзбек тилига эътиборни янада кучайтириш мақсадида Президентимиз томонидан “Ўзбек тили байрами кунини белгилаш тўғрисида”ги Қонун имзоланиб, 21 октябрь – Ўзбек тили байрами куни этиб белгиланди.
18 октябрь куни 76-сонли мактабда она тили ва қорақалпоқ тили фанлари ойлиги ҳамда тилимизга давлат тили мақоми берилганига 32 йил тўлиши муносабати билан катта тадбир ўтказилди. Тадбир доирасида дастлаб очиқ дарслар ташкил этилди. Очиқ дарсларни ҳозирги замон талаблари асосида ташкил этишга алоҳида эътибор берилди ва машғулотларда илғор усуллар ва замонавий ахборот коммуникация технологияларидан самарали фойдаланилди.
Ўқувчиларга тил – миллат кўзгуси эканлиги, уни мукаммал ўрганиш орқали она тилига меҳр-муҳаббат мустаҳкамланиши тушунтирилиб, она тилимизнинг беқиёс имкониятлари, унинг бойлиги ва софлигини сақлаш, равнақи йўлида амалга оширилаётган амалий саъй-ҳаракатлар тўғрисида маърузалар қилинди.
Дарслар давомида фан ўқитувчилари юртимизда давлат тилига бўлган эътибор ҳар қачонгидан ҳам кучайганини, бугун она тилимизни улуғлаш, унинг бой хазинаси, таровати ва нафосатини ёш авлодга етказиш мақсадида юртимизда атоқли шоир ва адибларимиз номларидаги ижод мактаблари ташкил этилгани тўғрисида сўз юритишди. Шунингдек, Муҳаммад Ризо Огаҳий, Исҳоқхон Ибрат, Абдулла Қодирий, Ҳамид Олимжон ва Зулфия, Эркин Воҳидов, Абдулла Орипов, Ибройим Юсупов, Ҳалима Худойбердиева, Муҳаммад Юсуф номидаги ижод мактабларида сабоқ олган ёшлар ўзбек тили ва адабиёти, бадиий ижод сирларини чуқур ўрганишлари учун барча шароитлар яратилаётганини таъкидлаб ўтишди.
Она тилига эътиборни, меҳр-муҳаббатни кучайтириш, она тили миллат маънавиятининг кўзгуси эканини эътироф этиш, ёзма саводхонлигини ошириш мақсадида ўқувчиларга очиқ дарслар мобайнида баён ва иншолар ҳам ёздирилди. Дарслар давомида ўқувчилар ҳам фаол иштирок этиб, билимдонликларини кўрсатишди.
Очиқ дарслардан сўнг, адабий-мусиқий кеча ўтказилди. Ўқувчи-ёшлар ижросидаги саҳна кўринишлари, куй-қўшиқлар билан давом этган тадбир она тили, адабиёт ва маънавият байрамига айланди. Ватанимизни, она тилимизни тараннум этувчи шеърлар, куй ва қўшиқларни мактабнинг 5-синфдан 8-синфгача бўлган ўқувчилари ижро этишди. Улар ижросида мумтоз адабиётимиз намояндалари бўлган Алишер Навоий, Абдулла Авлоний, Чўлпон, Увайсий, Зебунисо, Зулфия, Муҳаммад Юсуф ва бошқа атоқли ижодкорлар қаламига мансуб шеърлар, асарларидан парчалар ҳам тингланди. Тадбир асносида ҳар бир ўқувчи қалбидаги она тилига бўлган чексиз меҳр-муҳаббатини, фахру ифтихорини намоён этишга ҳаракат қилди.
Тил байрами муносабати билан, шунингдек, ёшлар қалбида она тилимизга муҳаббат, миллий ва жаҳон адабиётини теран нигоҳ билан ўқишга қизиқиш уйғотиш, китобхонлик маданиятини ошириш мақсадида ўтказилган мазкур тадбир барчага бирдек жуда манзур бўлди.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
