Ёшларни ҳарбий-ватанпарварлик руҳида тарбиялаш мақсадида учрашув бўлиб ўтди

Мамлакатимизда ёшларни ҳарбий-ватанпарварлик руҳида тарбиялашга доир ишлар самарадорлигини ошириш ва фаоллаштиришга алоҳида эътибор қаратилмоқда. Бу борадаги таълим-тарбиявий ишларга мамлакатимиз фуқароларини, давлат ва нодавлат нотижорат ташкилотларини ҳамда фуқаролик жамиятининг бошқа институтларини янада фаол жалб этиш ва ёшлар онгига ватанпарварлик, мардлик туйғуларини сингдириш мақсадида 2018 йил 23 февралда Ўзбекистон Республикаси Вазирлар Маҳкамасининг "Ёшларни ҳарбий-ватанпарварлик руҳида тарбиялаш концепциясини тасдиқлаш тўғрисида”ги қарори қабул қилинган эди.

 Мазкур ҳужжатда ёшларни миллий ғоя ва Ватанга садоқат руҳида тарбиялаш, уларнинг қалби ва онгига Ватан ҳимояси шарафли ва муқаддас бурч эканини чуқур сингдириш, қадимий тарихимиз ва маданиятимиз, жонажон Ватанимизнинг мустақиллиги ва равнақи йўлида фидокорона курашган миллий қаҳрамонларимиз билан фахрланиш, уларга муносиб бўлиш туйғусини шакллантириш кабилар асосий вазифалар этиб белгиланган.

26 октябрь куни Амударё тумани Халқ таълими бўлимига қарашли 36-сонли мактабда ўтказилган ёшлар ва ҳарбийлар учрашуви  ёшларни ҳарбий-ватанпарварлик руҳида тарбиялаш мақсадига йўналтирилди.

Учрашувда Ўзбекистон Республикаси Давлат хавфсизлик хизмати чегара қўшинлари ходими подполковник Санжар Тошматов, Нукус ҳарбий прокурори ёрдамчиси, лейтенант Дилшод Абдуллаев, Ўзбекистон Республикаси Давлат хавфсизлик хизмати чегара қўшинлари ходими, I-даражали сержант Отабек Махмудовлар қатнашдилар. Ҳарбийлар мактаб ўқувчилари билан дилдан суҳбат қуриб, уларнинг мақсадлари, орзу-истаклари ҳамда қизиқишлари билан танишдилар.

Учрашувда ҳарбийлар ўқувчиларга ватанпарварлик туйғисининг асл моҳияти ҳақида, ҳар кимнинг Ватан олдидаги фарзандлик бурчи нималардан иборат эканлиги, ҳарбийликнинг бутун машаққатлари ҳамда масъулиятлари, мамлакатимизда ҳарбий хизмат соҳасида фаолият олиб бораётганларга қаратилган эътибор, яратилаётган имкониятлар ҳамда шарт-шароитлар ҳақида кенг турда маълумотлар бердилар.

Таъкидланганидек, ватанпарварлик инсоннинг ўз оиласига, авлод-аждодларининг ор-номусига чуқур эҳтироми, виждонига, бурчига ва ўз сўзига содиқлигидир. Агар инсон болалик чоғидан ўз халқига, унинг анъаналарига, тили ва маданиятига муҳаббат ҳамда ҳурмат руҳида тарбия қилинса, унда ватанпарварлик ҳисси юқори бўлади. Ватан ҳисси инсонга Ватанидан олисда бўлганида яққол сезилади.

Ҳар бир юртдошимиз, қайси соҳада хизмат қилишидан қатъи назар, Ватан олдидаги фарзанлик бурчини тўлиқ англаган ҳолда, ўзининг маънавий камолоти учун масъулиятни ҳис этиши, шахсий манфаатларини шу юрт, шу халқ манфаатлари билан уйғунлаштириб яшаши ва Ватан равнақи учун муносиб ҳисса қўшишга ҳаракат қилмоғи лозим. Президентимиз Шавкат Мирзиёев “Ватанпарварлик ҳар бир давлат ҳаётининг маънавий асоси ҳисобланади ва жамиятни ҳар томонлама ривожлантириш борасида энг муҳим сафарбар этувчи куч сифатида намоён бўлади”, деган сўзлари бугун ўз исботини топмоқда.

Учрашувда ёшлар ҳарбийларга соҳа юзасидан ўзларини қизиқтирган саволлар билан мурожаат қилдилар. Ҳарбийлар ҳар бир саволга ҳаётий мисоллар билан жавоб бердилар. Учрашув якунида ўқувчиларга турли бадиий ва илмий китоблар совға қилинди.

Ваҳобжон Давлетов, 36-сонли мактабнинг Физика фани ўқитучиси.