Yoshlarni harbiy-vatanparvarlik ruhida tarbiyalash maqsadida uchrashuv boʻlib oʻtdi

Mamlakatimizda yoshlarni harbiy-vatanparvarlik ruhida tarbiyalashga doir ishlar samaradorligini oshirish va faollashtirishga alohida eʼtibor qaratilmoqda. Bu boradagi taʼlim-tarbiyaviy ishlarga mamlakatimiz fuqarolarini, davlat va nodavlat notijorat tashkilotlarini hamda fuqarolik jamiyatining boshqa institutlarini yanada faol jalb etish va yoshlar ongiga vatanparvarlik, mardlik tuygʻularini singdirish maqsadida 2018-yil 23-fevralda Oʻzbekiston Respublikasi Vazirlar Mahkamasining "Yoshlarni harbiy-vatanparvarlik ruhida tarbiyalash kontseptsiyasini tasdiqlash toʻgʻrisida”gi qarori qabul qilingan edi.

 Mazkur hujjatda yoshlarni milliy gʻoya va Vatanga sadoqat ruhida tarbiyalash, ularning qalbi va ongiga Vatan himoyasi sharafli va muqaddas burch ekanini chuqur singdirish, qadimiy tariximiz va madaniyatimiz, jonajon Vatanimizning mustaqilligi va ravnaqi yoʻlida fidokorona kurashgan milliy qahramonlarimiz bilan faxrlanish, ularga munosib boʻlish tuygʻusini shakllantirish kabilar asosiy vazifalar etib belgilangan.

26-oktyabr kuni Amudaryo tumani Xalq taʼlimi boʻlimiga qarashli 36-sonli maktabda oʻtkazilgan yoshlar va harbiylar uchrashuvi  yoshlarni harbiy-vatanparvarlik ruhida tarbiyalash maqsadiga yoʻnaltirildi.

Uchrashuvda Oʻzbekiston Respublikasi Davlat xavfsizlik xizmati chegara qoʻshinlari xodimi podpolkovnik Sanjar Toshmatov, Nukus harbiy prokurori yordamchisi, leytenant Dilshod Abdullayev, Oʻzbekiston Respublikasi Davlat xavfsizlik xizmati chegara qoʻshinlari xodimi, I-darajali serjant Otabek Maxmudovlar qatnashdilar. Harbiylar maktab oʻquvchilari bilan dildan suhbat qurib, ularning maqsadlari, orzu-istaklari hamda qiziqishlari bilan tanishdilar.

Uchrashuvda harbiylar oʻquvchilarga vatanparvarlik tuygʻisining asl mohiyati haqida, har kimning Vatan oldidagi farzandlik burchi nimalardan iborat ekanligi, harbiylikning butun mashaqqatlari hamda masʼuliyatlari, mamlakatimizda harbiy xizmat sohasida faoliyat olib borayotganlarga qaratilgan eʼtibor, yaratilayotgan imkoniyatlar hamda shart-sharoitlar haqida keng turda maʼlumotlar berdilar.

Taʼkidlanganidek, vatanparvarlik insonning oʻz oilasiga, avlod-ajdodlarining or-nomusiga chuqur ehtiromi, vijdoniga, burchiga va oʻz soʻziga sodiqligidir. Agar inson bolalik chogʻidan oʻz xalqiga, uning anʼanalariga, tili va madaniyatiga muhabbat hamda hurmat ruhida tarbiya qilinsa, unda vatanparvarlik hissi yuqori boʻladi. Vatan hissi insonga Vatanidan olisda boʻlganida yaqqol seziladi.

Har bir yurtdoshimiz, qaysi sohada xizmat qilishidan qatʼi nazar, Vatan oldidagi farzanlik burchini toʻliq anglagan holda, oʻzining maʼnaviy kamoloti uchun masʼuliyatni his etishi, shaxsiy manfaatlarini shu yurt, shu xalq manfaatlari bilan uygʻunlashtirib yashashi va Vatan ravnaqi uchun munosib hissa qoʻshishga harakat qilmogʻi lozim. Prezidentimiz Shavkat Mirziyoyev “Vatanparvarlik har bir davlat hayotining maʼnaviy asosi hisoblanadi va jamiyatni har tomonlama rivojlantirish borasida eng muhim safarbar etuvchi kuch sifatida namoyon boʻladi”, degan soʻzlari bugun oʻz isbotini topmoqda.

Uchrashuvda yoshlar harbiylarga soha yuzasidan oʻzlarini qiziqtirgan savollar bilan murojaat qildilar. Harbiylar har bir savolga hayotiy misollar bilan javob berdilar. Uchrashuv yakunida oʻquvchilarga turli badiiy va ilmiy kitoblar sovgʻa qilindi.

Vahobjon Davletov, 36-sonli maktabning Fizika fani oʻqituchisi.