ФАХРИЙ УСТОЗГА ЭҲТИРОМ КЎРСАТИЛДИ

Инсонпарварликнинг юксак тамойиллари асосида кекса авлод вакилларига ҳурмат ва эҳтиром кўрсатиш давлатимиз сиёсатининг асосий  йўналишларидан бири. Уларни муносиб турмуш шароитлари билан таъминлаш, тизимли асосда соғломлаштиришни ташкил этиш, уларнинг бугунгидай фаровон, бахтиёр кунларга эришиш йўлидаги фидойи хизматларини ёшларга кенг тарғиб қилишга уларни ота-боболар жасоратидан ўрнак олиб улғайишларига улкан эътибор қаратилмоқда.

1932 йилда Қангли овулида туғилган Дурдибой бобо Эрдошев ҳозир 90 ёш остонасида. У ўз ҳудудидаги 29-сонли мактабнинг 8-синфини тамомлаб дастлаб, Хўжайли шаҳридаги  Педагогика билим юртида, кейинчалик ўқитувчилик қилиш билан бирга Нукус Давлат Педагогика институтининг сиртқи бўлимида таҳсил олган. Бутан умрини овул ёшларини илмли-маърифатли қилишга бахшида қилган отахон узоқ йиллар 29-сонли, 39-сонли мактабларга раҳбарлик ҳам қилган.

Овул ёшлари, шогирдлари шу боисдан ҳам отахонни жуда ҳурмат қилишади, ҳолидан тез-тез хабар олиб туришади.

Яқинда 29-сонли мактабда ўқитувчилар жамоаси ва овул фуқаролар йиғини раисининг кексалар ва фахрийлар масалалари бўйича маслаҳатчиси Жангабой ота Ражабовлар ташаббуси билан фахрий педагог, ёшларнинг севимли устози Дурдибой ота Эрдошевнинг  90 ёшга қадам қўйиши муносабати билан “Устозга эҳтиром” деб номланган тадбир ўтказилди.

Тадбирга мактаб ўқитувчилари, ўқувчиларидан ташқари, фахрий ўқитувчилар, овул нуронийлари ҳам таклиф этилди.

Тадбирни  мактаб директори Баҳром Сафаров очди ва устоз муаллимни табаррук 90 ёшга қадам қўяётгани билан қизғин қутлади.

Шунингдек, фахрий педагогнинг босиб ўтган шарафли ҳаёт йўли ҳақида гапирди. Шуниси эътиборлики, ўша давр турмуш қийинчиликларини енгиб ўтиб, иқтисодий етишмовчиликларга қарамасдан Дурдибой Эрдошев илм олишга, моҳир педагог бўлиб етишиб, овул ёшларига ҳам маърифат, маънавият улашишдек ниятлар билан ўқиди, ишлади. Олийгоҳда сиртқи бўлимда таҳсил олиш билан бирга 1954 йилдан 1957 йилгача Тинч океани флотида ҳарбий хизмат бурчини бажарган. 40 йиллик ўқитувчилик, раҳбарлик фаолияти давомида самарали, бенуқсон ишлашга эришган.

Ана шундай табаррук инсон ўзига бағишлаб тадбир ташкил этган шогирдларининг ҳурмати-эътиборидан жуда мамнун бўлди. Шаънига айтилган қутловлар, тилаклардан кўнгли тоғдай кўтарилди.

Тадбирда намойиш этилган мактаб ўқувчилари ижросидаги концерт дастури  барчага манзур бўлди. Фахрий устозга “Нуроний” жамғармаси бошқаруви раиси, сенатор, Ўзбекистон Қаҳрамони Содиқжон Турдиев номидан ташаккурнома ва эсдалик совғалари тантанали суратда топширилди.

Ўқитувчи меҳнатининг бундай эътироф этилиши барчага кўтаринки кайфият бағишлади.

Ойгул РАЖАБОВА.