“ЁШЛАР ДАФТАРИ”ГА КИРИТИЛГАН АЁЛ-ҚИЗЛАРГА ЗАМОНАВИЙ ТИКУВ МАШИНАЛАРИ БЕРИЛДИ

Юртимизда “Ёшлар дафтари”га киритилган хотин-қизлар ва ёшларни касб-ҳунар эгаллашларига алоҳида эътибор қаратилиб, тикув машиналари, мотокультиваторлар ва пайвандлаш ускуналари тарқатилмоқда. Туманимизда ҳам  мазкур дафтарга киритилган ишсиз, кам таъминланган оилалар фарзандларига амалий ёрдам кўрсатилиб, тадбиркорликни йўлга қўйишларига, даромадга эга бўлишларига кўмак берилмоқда.

 10 ноябрь куни туман ҳокимлиги биносида 18 нафар “Ёшлар дафтари”га киритилган аёл-қизларга тадбиркорлик фаолиятини бошлашига кўмак бериш орқали бандлигини таъминлаш мақсадида бепул замонавий тикув машиналари тарқатилди. Тадбирда туман ҳокими Султонбой Йўлдашев, секторлар раҳбарлари, Ёшлар агентлиги туман бўлими масъуллари  ва бошқалар иштирок этишди.

Сертификат билан бирга тикув машиналарини топширган туман ҳокими Султонбой Йўлдашев уларнинг келгуси ишларида омад ва зафарлар тилади. Сўзи давомида шу тикув машиналари орқали якка тартибдаги тадбиркорлик фаолиятини йўлга қўйган аёл-қизларга етарлича имконият яратиб берилишини айтиб ўтди.

Бугунги кунга қадар, 49 та маҳаллаларда ўрганиш лозим бўлган 44 340 нафар ёшларнинг 43 119 нафари билан бирма-бир мулоқот қилиниб, шундан, “Ёшлар дафтари”га 6 753 нафар ёшлар киритилган эди. Кўрилган амалий чора-тадбирлар натижасида 6 599 нафар дафтардан чиқарилди. Ҳозирда туман бўйича 44 нафар ёшлар “Ёшлар дафтари”да қолмоқда.

Жумладан, “Ёшлар дафтари”дан чиқарилган ёшларнинг 858 нафари доимий ва жамоат иш ўринларига жойлаштирилди, 318 нафарига 9 млрд. 617 млн. сўм имтиёзли кредитлар берилди. “Ҳар бир ёшга – бир гектар” тамойили асосида 5114 нафар ёшларга 1135 гектар ер майдонлари,  309 нафар ёшларга субсидия ажратилди.

 “Ёшлар дафтари”га киритилган ёшларни қўллаб-қувватлаш мақсадида ташкил этилган махсус жамғармада жами 1 млрд. 352 млн. сўм маблағ шакллантирилган бўлиб, унинг 1021,1 млн. сўми маҳаллий бюджетдан, 330,9 млн. сўми ундирувларга оид ижро ҳужжатлари бўйича ажратма маблағларини ташкил этади.

Бугунги кунга қадар жамғарма маблағлари ҳисобидан 1551 нафар ёшларни ижтимоий қўллаб-қувватлаш учун 1 059,9 млн. сўм маблағ сарфланди. Хозирда жамғарма маблағлари ҳисобида 292,1 млн. сўм маблағ қолмоқда. Жумладан, 21 нафар ёшларга бир марталик моддий ёрдам ажратиш учун 20,7 млн. сўм, 189 нафар ёшларга асбоб-ускуналар ва меҳнат қуроллари харид қилиш учун 307,8 млн. сўм, 76 нафар ёшларга ҳайдовчилик гувоҳномаси учун 106,3 млн. сўм маблағ ажратиб берилди. Шунингдек, 12 нафар ёшларга тўлов-контракт суммасининг 50 фоиз қисми учун 51,5 млн. сўм сарф этилди. Ундан ташқари, 2 нафар ёшларга сафарбарлик чақирув резерви хизмати бадали учун 10,5 млн. сўм, 20 та маҳалла фуқаролар йиғинларига “Street work out” спорт майдончалари қуриш учун 150 млн. ажратилди.

Шу билан бирга 1 251 нафар ёшларнинг истеъдодини қўллаб-қувватлаш учун 413,1 млн. сўмга умумтаълим мактабларига 500 та футбол, 500 та волейбол коптоклари, 85 та футбол, 85 та волейбол учун махсус тўрлар ҳамда туман Маданият марказига 5 та овоз кучайтиргич мосламаси, 1 та сентизатор, 4 та мусиқали марказ, 20 та қашқар рубоби ва 59 та доира олиб берилди.

Тадбирда масъуллар томонидан берилган замонавий тикув машинасига эга бўлган аёл-қизлар юртимизда ёшларга қаратилаётган бундай эътибор келгусида тадбиркорлик фаолиятларини йўлга қўйишларида, ривожлантиришларида муҳим аҳамият касб этишини айтиб, ўз миннатдорликларини билдирдилар.

Ж.Давлетов, Ёшлар ишлари агентлиги туман бўлими бошлиғи.