ДАВЛАТ БАЙРОҒИ ҚАБУЛ ҚИЛИНГАН КУН МУНОСАБАТИ БИЛАН МАЪНАВИЙ-МАЪРИФИЙ ТАДБИР ЎТКАЗИЛДИ
Юртимизда Ўзбекистон Республикасининг Давлат байроғи қабул қилинганлигининг 30 йиллиги кенг нишонланмоқда. Барча корхона-ташкилотлар, таълим муассасаларида ушбу сана муносабати билан тадбирлар ташкил этилмоқда.
17 ноябрь куни тумандаги 36-сонли умумий ўрта таълим мактабининг 6-“А” синфида ҳам Давлат байроғи қабул қилинганлигининг 30 йиллигига бағишлаб маданий-маърифий тадбир ўтказилди. Тарих фани ўқитувчиси Нурбек Отахонов ҳамда синф раҳбари Дилнура Бобониёзова томонидан ташкил этилган мазкур тадбирда ўқувчилар фаол иштирок этдилар. Тадбирга ташриф буюрган ўқитувчи ва ўқувчиларни 18 ноябрь – Ўзбекистон Республикаси Давлат байроғи қабул қилинган кун билан чин дилдан табрикладилар.
Тадбирда озод ва обод Ватанимиз – Ўзбекистон байроғи улуғ мақсадлар томон бошловчи буюк машъала, давлат рамзлари ҳар бир халқнинг мустақиллиги, озодлиги, тинчлиги ва барқарорлиги тимсоли эканлиги алоҳида таъкидлаб ўтилди. Давлат байроғи бугунги Ўзбекистон ҳудудида қадимда мавжуд бўлган давлатлар билан тарихан боғлиқлигини англатиши ҳамда республиканинг миллий-маданий анъаналарини ўзида мужассамлаштириши, байроқ қадим-қадимдан ҳар бир халқ учун мустақиллик, ҳурлик, тинчлик ва барқарорлик тимсоли бўлиб келганлиги, аждодларимиз ҳам юрт байроғини муқаддас билиб, уни кўз қорачиғидек асраганлиги, давлатчилигимиз тарихининг барча даврида байроқ аждодларимиз учун озодлик, куч-қудрат, жасорат, ғалаба тимсоли бўлганлиги тўғрисида сўз юритилди.
Давлат байроғи тўғрисидаги қонуни қабул қилинганининг 30 йиллигига бағишланган тадбирда ўқувчилар Ватан, байроқ, тинчлик ҳақидаги шеърларини фахру-ифтихор, чексиз ғурур билан ифодали ёд айтиб бердилар. Ўқувчилар саҳна кўринишлари, қўшиқлар ҳам ижро этишди. Дилрабо рақслари билан байрамга ташриф буюрган ўқитувчи-устозлар кўнглини хушнуд қилдилар ва тадбирга янада файз киритдилар.
Ўқувчилар тадбир давомида давлатимиз байроғи ҳақида ўз билимдонликларини намойиш этиб, 1991 йилнинг 18 ноябри «Ўзбекистон Республикасининг Давлат байроғи тўғрисида»ги қонун қабул қилинган сана сифатида тарихимизга муҳрланганини, ушбу қонуннинг 2-моддасида «Ўзбекистон Республикасининг Давлат байроғи Ўзбекистон Республикаси давлат суверенитетининг рамзидир», деб белгилаб қўйилгани хусусида сўзлаб бердилар. Шунингдек, байроқнинг кўринишини ифодалаб, бутун узунлиги бўйлаб ўтган тўқ мовий ранг, оқ ранг ва тўқ яшил рангли учта эндан таркиб топган тўғри тўртбурчак шаклидаги мато кўринишидаги байроқнинг узунлиги 250 сантиметрга, кенглиги 125 сантиметрга тенглигини гапириб ўтишди. Мовий ранг, оқ ранг ва яшил рангли энларнинг кенглиги бир хиллиги, ҳар бир эн 40 сантиметрга тенглиги, ўртасидаги оқ рангли эннинг четларидан кенглиги 2,5 сантиметр бўлган қизил ҳошиялар ўтказилганлигини тасвирлаб беришди.
Ўқувчи-ёшлар миллий байроғимизнинг давлат идора ва муассасалари, ўқув юртлари, Ўзбекистон аъзо бўлган ҳалқаро ташкилотлар, чет элдаги элчихона ва доимий ваколатхоналаримиз пештоқида ҳилпираб туриши, халқаро миқёсдаги сиёсий, маданий-маърифий тадбирларда, нуфузли спорт мусобақаларида ҳам байроғимиз Ватанимизнинг шаъни, халқимизнинг ғурурини ёрқин акс эттириши, ўз қадр-қимматини, таянчи ва суянчини англаган халқнинг миллий тимсоли бўлган байроқ ҳамиша эъзозланишини ғурур билан сўзлашди.
Кўтаринки руҳда ўтган маънавий-маърифий тадбирга ташриф буюрганлар Ватанимиз байроғи ҳақида тўлиқ маълумотлар олдилар. Ўқувчиларнинг Ўзбекистон Республикаси Давлат байроғининг тасвири, моҳияти, ундан фойдаланиш қоидалари ҳақидаги фикр-мулоҳазалари ҳам барчага манзур бўлди.
Озода Худойберганова, 36-сонли мактабнинг ижодий-маданий масалалар бўйича тарғиботчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
