3-сонли мактаб кутубхонасида китобхонлик тарғиботига бағишланган тадбирлар ўтказилди

Мамлакатимизда ёшлар ўртасида китобхонликни ривожлантиришга қаратилаётган эътибор ва рағбат туфайли нафақат умумтаълим  мактаблари ўқувчи-ёшлари, балки мактабгача таълим ташкилотлари тарбияланувчилари орасида ҳам қизиқиш тобора ортиб, МТТларда турли эртаклар қаҳрамонлари  иштирокидаги тадбирлар ўтказилмоқда. Бу каби  тадбирлар турли саналар муносабати билан ташкиллаштирилаётгани китобхон ёшлар доирасини янада кенгайтириш имконини бермоқда.

Маълумки, ЮНЕСКО ташаббуси билан 28 октябрь Жаҳоннинг кўплаб давлатларида, шу жумладан, мамлакатимизда ҳам Халқаро кутубхоначилар куни сифатида кенг нишонланади.  Ушбу сана муносабати билан туманимиздаги умумтаълим мактаблари кутубхоналарида “Китобхонлик ҳафталиги” лойиҳаси асосидаги тарғибот-ташвиқот тадбирлари ўтказилди. Шунингдек, “Мактаб кутубхонасида саводхонликни ривожлантириш шиори остида 26 ноябрь – “Мактаб кутубхоналари куни”да “Очиқ эшиклар куни”, “Янги адабиётлар”, “Янги Ўзбекистон кутубхоналарини қандай кўз олдингизга келтирасиз?” “Ёзувчилар мамлакатига саёҳат”, “Янги китоблар тақдимоти”, “Китоб ўқинг”, “Китоб бизни бирлаштиради”, “60 дақиқалик китобхонлик” каби тадбирларда туманимиздаги умумтаълим мактаблари  кутубхоначилари ва китобхон ёшлари ҳам фаол иштирок этишди.

“Китобхонлик  ҳафталиги” лойиҳаси асосида Назархон овулидаги 3-сонли  мактаб кутубхонасида ҳам китобхонлик тарғиботига бағишланган тадбирлар ўтказилди. Хусусан, овул ҳудудидаги 10-сонли МТТ тарбияланувчиларининг мактаб кутубхонасига саёҳати ташкил этилди. Саёҳат давомида МТТ тарбияланувчиларини китобга меҳр-муҳаббат руҳида тарбиялаш мақсадида турли эртаклар қаҳрамонлари ва уларнинг бошидан кечирган саргузаштлари ҳақида кўргазмали суратлар воситасида ҳикоя қилиб берилди.

Ҳафталик давомида  мактаб кутубхонасида “Ёзувчилар мамлакатига саёҳат” тадбири ўтказилиб, қорақалпоқ халқининг севимли сатирик ёзувчиси Муродбой Низановнинг 7-синф ўқувчилари томонидан янги китоблари тақдимоти ташкиллаштирилди. Тақдимот жараёнида ёш китобхонлар М.Низановнинг ўзига хос ижодий олами билан яқиндан танишдилар.

Ҳафталик доирасида кутубхонада ташкиллаштирилган “Эртаклар оламига саёҳат” тадбирида мактабга илк қадам қўйиб, ўқиш ва ёзишни қунт билан ўрганаётан 1-синф ўқувчилари олам-олам завқ-шавқ олдилар. Уларга мактаб кутубхонасига келтирилган янги эртак китоблари ифодали ўқиб берилди. Ўз навбатида жажжи болажонлар ўқув йилининг 1-чорагида ўзлари ёдлаган шеърларини, мусиқа дарсида ўрганган ашулаларини қувониб-қувониб айтиб бердилар. Тадбир якунида эса болаларга В.Сутеевнинг “Балиқчи мушук” мультфильми намойиш этилди. Мультфильми намойиши энди ўқишни, ёзишни ўрганаётган мурғак қалблар дилида  ўз она тилларида бехато сўзлаш, фикр айтиш қобилиятини шакллантиришга қаратилгани билан аҳамиятли бўлди.

Шунингдек, “Китобхонлик ҳафталиги” лойиҳаси асосидаги 9-10-11-синфлар ўқувчилари ўртасида ташкиллаштирилган “Заковат баҳслари” доирасида амалга оширилган “Мен севган бадиий асар” мавзусидаги китобхонлар беллашувлари барчада қизиқарли таассуротлар қолдирди. Ёш китобсеварларнинг ёдлаш қобилиятини, хотирасини синовдан ўтказиш, ўзлари ўқиган китоблари хусусидаги таҳлилий фикрларини ўрганиш мақсадида ташкиллаштирилган мазкур беллашувларда мактабнинг энг яхши китобхон синфлари аниқланди. “Заковат баҳслари” якунида энг билимдон китобхон ёшларга ҳамда энг китобхон синфларга мактаб маъмурияти томонидан фахрий ёрлиқлар, эсдалик совғалари берилди.

Тозахон ҚДИРНИЯЗОВА, 3-сонли умумтаълим мактаби кутубхоначиси.