ЁШЛАР БИЛАН УЧРАШУВДА ҲУҚУҚБУЗАРЛИКЛАРНИНГ ОЛДИНИ ОЛИШ МАСАЛАЛАРИ МУҲОКАМА ЭТИЛДИ

Ёшлар ўртасида жиноятчилик ва ҳуқуқбузарликларнинг олдини олиш – бугунги кундаги муҳим масалалардан бири ҳисобланади. Шу боис ёшларнинг маънавий-ахлоқий тарбиясига жиддий ёндошиш, уларнинг ҳуқуқий онгини ошириш, турли ҳуқуқбузарлик, жиноятчилик, экстремизм ва ақидапарастлик каби иллатларга берилишининг олдини олиш кабиларга алоҳида эътибор қаратилиб келинмоқда.

25 ноябрь куни туман Ички ишлар бўлими биносида ички ишлар органлари Пробация гуруҳи масъуллари томонидан шу масалаларга бағишланган учрашув ўтказилди. Йиғилишда туман Ички ишлар бўлими бошлиғининг ўринбосари Мухтор Раҳматуллаев, Ёшлар ишлари агентлиги  туман бўлими ходими Сардор Қуранбоев, туман Ички ишлар бўлими ҳуқуқбузарликлар профилактикаси бўлинмаси катта инспектори Улуғбек Қўчқоровлар иштирок этдилар.

Учрашув давомида асосан Пробация гуруҳи назорати остида жазо ўтаётган ёшларнинг бўш вақтларини мазмунли ўтказиш, уларнинг бандлигини таъминлаш, моддий томондан қўллаш ва касбга йўналтириш орқали соғлом турмуш тарзига қайтариш ҳамда улар томонидан қайта жиноят содир этилиши олдини олишга доир масалалар муҳокама этилди.

Таъкидланганидек, ҳозирги кундаги глобаллашув жараёнида мамлакатлар ўртасида ўзаро алоқалар кенгайган, ўзаро таъсирлар чегара билмаган даврда терроризм ва экстремизм барча халқлар учун бирдай таҳдид солмоқда. Бугунги мураккаб мафкуравий жараёнларни илмий-амалий жиҳатдан атрофлича таҳлил қилиш ва баҳолаш, ўсиб келаётган ёш авлод қалбига миллий тафаккурни, маънавиятни ва соғлом дунёқараш асосларини мустаҳкамлаш алоҳида аҳамият касб этади.

Учрашувда ёшларнинг бўш вақтларини мазмунли ташкил этиш, бандлигини таъминлаш борасида амалга оширилган ишлар тўғрисида маълумот берилди. “Ёшлар дафтари”га 6 753 нафар ёшлар рўйхатга олингани, кўрилган амалий чора-тадбирлар натижасида 6 599 нафар ёшлар дафтардан чиқарилгани, ҳозирда туман бўйича 44 нафар ёшлар “Ёшлар дафтари”да қолганлиги қайд этиб ўтилди.

“Ёшлар дафтари”га киритилган ёшларни қўллаб-қувватлаш мақсадида ташкил этилган махсус жамғарма ҳисобидан 1551 нафар ёшларни ижтимоий қўллаб-қувватлаш учун 1 млрд 60 млн. сўм маблағ сарфлангани, 21 нафар ёшларга бир марталик моддий ёрдам учун 20,7 млн. сўм, 189 нафар ёшларга асбоб-ускуналар ва меҳнат қуроллари харид қилиш учун 307,8 млн. сўм, 76 нафар ёшларга ҳайдовчилик гувоҳномаси учун 106,3 млн. сўм, 12 нафар ёшларга тўлов-контракт суммасининг 50 фоиз қисми 51,5 млн. сўм, 2 нафар ёшларга сафарбарлик чақирув резерифи хизмати бадали 10,5 млн. сўм ажратиб берилгани маълум қилинди. Шунингдек, “Ёшлар дафтари”дан чиқарилган ёшларнинг 858 нафари доимий ва жамоат иш ўринларига, 318 нафарига 9 млрд. 617 млн.сўм имтиёзли кредитлар, 309 нафарига субсидия, 5114 нафарига “Ҳар бир ёшга – бир гектар” тамойили асосида 1135 гектар ер майдонлари ажратилгани айтиб ўтилди.

Учрашувда маърузачилар ҳозирда мамлакатимизда олиб борилаётган ислоҳотлар ҳақида ҳамда ёшлар ва вояга етмаганлар ўртасида ҳуқуқбузарликларнинг олдини олиш чора-тадбирлари, бу борада қабул қилинган Қонун ҳужжатларининг мазмун-моҳияти тўғрисида тўхталиб, ҳуқуқий тушунчалар беришди. Шу билан бирга мунтазам равишда ҳамкорликда тарғибот тадбирлари ўтказилаётгани, вояга етмаганлар ўртасида жиноятчиликнинг олдини олиш учун ёшларнинг ҳуқуқий маданиятини ошириш,  маҳалла ва ота-оналар ўртасида доимий равишда ҳамкорлик ўрнатиш лозимлиги таъкидланди.

Тадбир якунида ҳуқуқбузарликларнинг олдини олиш учун шу каби ҳуқуқий тарғибот тадбирларини ҳамкорликда мунтазам равишда ўтказишга келишиб олинди.

Озода Худойберганова.