БУТУНЖАҲОН ОИТСГА ҚАРШИ КУРАШИШ КУНИ МУНОСАБАТИ БИЛАН ТАДБИР ЎТКАЗИЛДИ
Айни даврда бутун дунёни ташвишга солаётган муаммолардан бири аср вабоси бўлган орттирилган иммунитет танқислиги синдроми, яъни ОИТС касаллигидир. Ҳалигача давоси топилмаган ушбу касалликка чалинишнинг олдини олиш, зарарларини камайтириш мақсадида кураш олиб борилмоқда. Айниқса, бутун жаҳон ОИТСга қарши кураш куни деб белгиланган 1 декабрь санасида турли тарғибот-ташвиқот тадбирлари ташкил этилиб, касаллик ва унинг олдини олиш чоралари ҳақида аҳолига кенг тушунчалар берилмоқда.
1 декабрь куни 30-сонли мактабда бутун жаҳон ОИТСга қарши курашиш куни муносабати билан «Барча ҳаёт учун» шиори остида «Биз ОИТС га қаршимиз» номли кўрик-танлов ташкил қилинди. Танловда 30-сонли мактабнинг "Витаминка" ва 40-сонли мактабнинг "Авицена" жамоалари иштирок этди.
Мактабнинг биология фани ўқитувчилари Наргиза Мамутова ҳамда Нафиса Мамутовалар томонидан ташкил этилган тадбирда дастлаб ОИТС касаллиги ва унга қарши курашиш ҳақидаги маърузалар тингланди.
Маърузаларда ОИТС касаллигининг келиб чиқиш тарихи, этиологияси, касалликнинг дунёда тарқалганлиги, касаллик манбалари, касалликнинг юқиш йўллари, қайси ҳолатларда юқмаслиги, кимлар кўп касалланиши ва профилактикаси бўйича сўз юритилди. Шунингдек, ОИТС касаллиги миллат генофондига салбий таъсир этиб келаётгани, ижтимоий турга кирувчи бу касаллик кенг маънода нафақат иқтисодий, сиёсий зарар келтириши, оилавий, руҳий, маънавий, ахлоқий жиҳатдан салбий оқибатларга сабаб бўлиши, касалликнинг олдини олиш, даволаш, тарқалишини чеклаш ишларида ақл-заковат билан иш тутиш катта аҳамиятга эгалиги тушунтирилди.
Тадбир давомида ўқувчилар саломлашиш, кўргазмали қуроллар намойиши, тезкор савол-жавоб кўринишидаги билимлар синови, эркин мавзу, разминка, гуруҳ сардорлари беллашуви каби шартлар бўйича беллашишди. Касаллик ҳақидаги тушунчаларини намойиш этиб, берилган саволларга батафсил жавоблар беришди. Тайёрлаган кўргазмалари, плакат ва слайдларни намойиш этишди. Гуруҳ сардорлари ҳам касаллик ҳақида, унга чалинишнинг олдини олиш борасида кенг тушунчаларга эга эканликларини кўрсатиб бердилар.
Таъкидланганидек, жаҳон соғлиқни сақлаш ташкилотининг маълумотига кўра, ҳозирги кунда дунёнинг 197 мамлакатида 2000 йил охиригача 5,5 миллион одам ОИТС билан хасталанган ва улардан 15,5 миллиони вафот этган. Ҳозирги кунда эса 95 миллион атрофида ҳисобланмоқда. Ўзбекистонда ҳам ОИТС билан касалланганларнинг сони ортиб бормоқда. Касаллик омиллари – фаҳш ишлар, гиёҳвандлик, спиртли маҳсулотлар истеъмол қилиш, тиббий хизматдан нотўғри фойдаланиш, тартибсиз турмуш тарзи саналади.
Тадбирда ўқувчилар мусиқий чиқишлар ижро этиб, томошабинларни янада хушнуд этдилар. Иқтидорли ўқувчилар томонидан намойиш этилган қўшиқ ва рақслар, ОИТС касаллигининг салбий оқибатлари ҳақидаги саҳна кўринишлари барчага ниҳоятда манзур бўлди. Ўқувчилар саҳна кўринишлари орқали, турли ёт иллатларга, айниқса, гиёҳвандликка берилиш оқибатида ОИТС касаллигига чалиниш эҳтимоли мавжудлигини ифодалаб беришди.
Тадбир иштирокчилари ОИТС касаллиги ва унинг олдини олиш чоралари ҳақида кенг маълумотларга эга бўлдилар.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
