BUTUNJAHON OITSGA QARShI KURAShISh KUNI MUNOSABATI BILAN TADBIR OʻTKAZILDI

Ayni davrda butun dunyoni tashvishga solayotgan muammolardan biri asr vabosi boʻlgan orttirilgan immunitet tanqisligi sindromi, yaʼni OITS kasalligidir. Haligacha davosi topilmagan ushbu kasallikka chalinishning oldini olish, zararlarini kamaytirish maqsadida kurash olib borilmoqda. Ayniqsa, butun jahon OITSga qarshi kurash kuni deb belgilangan 1-dekabr sanasida turli targʻibot-tashviqot tadbirlari tashkil etilib, kasallik va uning oldini olish choralari haqida aholiga keng tushunchalar berilmoqda.

1-dekabr kuni 30-sonli maktabda butun jahon OITSga qarshi kurashish kuni munosabati bilan «Barcha hayot uchun» shiori ostida «Biz OITS ga qarshimiz» nomli koʻrik-tanlov tashkil qilindi. Tanlovda 30-sonli maktabning "Vitaminka" va 40-sonli maktabning "Avitsena" jamoalari ishtirok etdi.

Maktabning biologiya fani oʻqituvchilari Nargiza Mamutova hamda Nafisa Mamutovalar tomonidan tashkil etilgan tadbirda dastlab OITS kasalligi va unga qarshi kurashish haqidagi maʼruzalar tinglandi.

Maʼruzalarda OITS kasalligining kelib chiqish tarixi, etiologiyasi, kasallikning dunyoda tarqalganligi, kasallik manbalari, kasallikning yuqish yoʻllari, qaysi holatlarda yuqmasligi, kimlar koʻp kasallanishi va profilaktikasi boʻyicha soʻz yuritildi. Shuningdek, OITS kasalligi millat genofondiga salbiy taʼsir etib kelayotgani, ijtimoiy turga kiruvchi bu kasallik keng maʼnoda nafaqat iqtisodiy, siyosiy zarar keltirishi, oilaviy, ruhiy, maʼnaviy, axloqiy jihatdan salbiy oqibatlarga sabab boʻlishi, kasallikning oldini olish, davolash, tarqalishini cheklash ishlarida aql-zakovat bilan ish tutish katta ahamiyatga egaligi tushuntirildi.

Tadbir davomida oʻquvchilar salomlashish, koʻrgazmali qurollar namoyishi, tezkor savol-javob koʻrinishidagi bilimlar sinovi, erkin mavzu, razminka, guruh sardorlari bellashuvi kabi shartlar boʻyicha bellashishdi. Kasallik haqidagi tushunchalarini namoyish etib, berilgan savollarga batafsil javoblar berishdi. Tayyorlagan koʻrgazmalari, plakat va slaydlarni namoyish etishdi. Guruh sardorlari ham kasallik haqida, unga chalinishning oldini olish borasida keng tushunchalarga ega ekanliklarini koʻrsatib berdilar.

Taʼkidlanganidek, jahon sogʻliqni saqlash tashkilotining maʼlumotiga koʻra, hozirgi kunda dunyoning 197 mamlakatida 2000-yil oxirigacha 5,5 million odam OITS bilan xastalangan va ulardan 15,5 millioni vafot etgan. Hozirgi kunda esa 95 million atrofida hisoblanmoqda. Oʻzbekistonda ham OITS bilan kasallanganlarning soni ortib bormoqda. Kasallik omillari – fahsh ishlar, giyohvandlik, spirtli mahsulotlar isteʼmol qilish, tibbiy xizmatdan notoʻgʻri foydalanish, tartibsiz turmush tarzi sanaladi.

Tadbirda oʻquvchilar musiqiy chiqishlar ijro etib, tomoshabinlarni yanada xushnud etdilar. Iqtidorli oʻquvchilar tomonidan namoyish etilgan qoʻshiq va raqslar, OITS kasalligining salbiy oqibatlari haqidagi sahna koʻrinishlari barchaga nihoyatda manzur boʻldi. Oʻquvchilar sahna koʻrinishlari orqali, turli yot illatlarga, ayniqsa, giyohvandlikka berilish oqibatida OITS kasalligiga chalinish ehtimoli mavjudligini ifodalab berishdi.

Tadbir ishtirokchilari OITS kasalligi va uning oldini olish choralari haqida keng maʼlumotlarga ega boʻldilar.

O. Xudoyberganova.