49-СОНЛИ МАКТАБДА ИЖТИМОИЙ ФАНЛАР ОЙЛИГИ ДОИРАСИДА ТАДБИР ЎТКАЗИЛДИ

Аниқ фуқаролик позициясига эга, жамият ва давлат манфаатларини ҳимоя қила оладиган, халқ ҳаётидаги  ўзгаришлар, ислоҳотларда фаол қатнашадиган, замонавий билимларга эга ва кенг тафаккурли ёшларни тарбиялаб вояга етказишда умумий ўрта таълим мактабларида ўқитиладиган  ижтимоий фанлар муҳим аҳамиятга эга. Боиси, бугунгидек шиддатли жараёнлар кечаётган, дунёнинг турли  ҳудудларида уруш-низолар давом этаётган, фаровон ҳаётимизга раҳна солишга уринаётган ғайри кучлар мавжуд экан, вояга етаётган ҳар бир йигит-қизнинг  қалбига Ватан меҳрини, шу Ватан келажагига дахлдорлик ҳиссини сингдириш ўта муҳим вазифа бўлиб қолаверади. Бунда эса ижтимоий фанларнинг ўқитилиши улкан ўрин тутади.

Ўзбекистон Республикаси Халқ таълими вазирлиги кўрсатмасига кўра, йилнинг  декабрь ойи ижтимоий фанлар ойлиги, дея белгилангани ҳам бежиз эмас.

Республикамизнинг барча ҳудудларида бўлгани каби туманимиздаги умумий ўрта таълим мактабларида ҳам ойлик доирасида турли тадбирлар ўтказилиб, ўқувчи-ёшларнинг  фанга қизиқишлари ошишига, юксак ахлоқли, маънавиятли бўлиб камолга  етишларига ҳаракат қилинаяпти.

Шу йилнинг 11 декабрида 49-сонли мактабда ойлик доирасида очиқ дарс ва 8 декабрь мамлакатимиз Асосий Қонуни – Конституциямиз қабул қилинган кунга бағишланган маънавий-маърифий тадбир ўтказилди.

Очиқ-дарсда мактабнинг тарих фани ўқитувчиси Гулчеҳра Ботирова 7-синфда жаҳон тарихи фанидан режа-тақвимга мувофиқ кунлик мавзу юзасидан маъруза қилди. Шундан кейин ўқувчиларнинг дарсни қай даражада ўзлаштирганликларини назорат қилиш учун саволлар билан мурожаат қилди. Бунда ўқувчилар фаоллик билан барча саволларга жавоб беришди. Келгуси дарс учун топшириқлар берилди. Муаллим бу борада ўқувчиларни қизиқтирган саволларга ҳам жавоб берди.

Очиқ дарс мактаб директорининг ўқув ишлари бўйича ўринбосари Бахтиёр Отиёзов, ижтимоий фанлар услуббирлашмаси аъзолари томонидан кузатиб борилди ва таҳлил қилинди.

Шундан сўнг “Конституциямиз - бахтимиз пойдевори” деб номланган маънавий-маърифий ва маданий тадбир бошланди.

Тадбирни мактаб директори Шукурбой Ойимбетов очди ва йиғилганларни сана муносабати билан қизғин қутлади.

Мамлакатимизнинг Асосий Қонуни – Конституцияси, унда инсон бахт-саодати, эркин меҳнат қилиши, илм олиши ва ҳеч кимдан кам бўлмай яшаши учун белгилаб қўйилган ҳуқуқий мезонлар ҳақида маъруза қилингач, ўқувчилар Конституциямизга бағишланган шеърлар, саҳна кўринишлари ижро этдилар. Мактабнинг 6-синфи ўқувчилари ижро этган рақс байрам руҳига ўзгача кўтаринкилик бахш этди.

Шунингдек, тадбирда “Менинг Конституциям” “Менинг Президентим” мазуларида ўтказилган иншолар танлови, “Конституция менинг тақдимда” номли расмлар танлови ғолиблари ҳам аниқланиб, мактаб маъмурияти томонидан рағбатлантирилди.

Тадбир ўқувчиларнинг ижтимоий фанларга қизиқишлари ошишига хизмат қилгани билан аҳамиятли бўлди.

Ойгул РАЖАБОВА.