49-SONLI MAKTABDA IJTIMOIY FANLAR OYLIGI DOIRASIDA TADBIR OʻTKAZILDI

Aniq fuqarolik pozitsiyasiga ega, jamiyat va davlat manfaatlarini himoya qila oladigan, xalq hayotidagi  oʻzgarishlar, islohotlarda faol qatnashadigan, zamonaviy bilimlarga ega va keng tafakkurli yoshlarni tarbiyalab voyaga yetkazishda umumiy oʻrta taʼlim maktablarida oʻqitiladigan  ijtimoiy fanlar muhim ahamiyatga ega. Boisi, bugungidek shiddatli jarayonlar kechayotgan, dunyoning turli  hududlarida urush-nizolar davom etayotgan, farovon hayotimizga rahna solishga urinayotgan gʻayri kuchlar mavjud ekan, voyaga yetayotgan har bir yigit-qizning  qalbiga Vatan mehrini, shu Vatan kelajagiga daxldorlik hissini singdirish oʻta muhim vazifa boʻlib qolaveradi. Bunda esa ijtimoiy fanlarning oʻqitilishi ulkan oʻrin tutadi.

Oʻzbekiston Respublikasi Xalq taʼlimi vazirligi koʻrsatmasiga koʻra, yilning  dekabr oyi ijtimoiy fanlar oyligi, deya belgilangani ham bejiz emas.

Respublikamizning barcha hududlarida boʻlgani kabi tumanimizdagi umumiy oʻrta taʼlim maktablarida ham oylik doirasida turli tadbirlar oʻtkazilib, oʻquvchi-yoshlarning  fanga qiziqishlari oshishiga, yuksak axloqli, maʼnaviyatli boʻlib kamolga  yetishlariga harakat qilinayapti.

Shu yilning 11-dekabrida 49-sonli maktabda oylik doirasida ochiq dars va 8-dekabr mamlakatimiz Asosiy Qonuni – Konstitutsiyamiz qabul qilingan kunga bagʻishlangan maʼnaviy-maʼrifiy tadbir oʻtkazildi.

Ochiq-darsda maktabning tarix fani oʻqituvchisi Gulchehra Botirova 7-sinfda jahon tarixi fanidan reja-taqvimga muvofiq kunlik mavzu yuzasidan maʼruza qildi. Shundan keyin oʻquvchilarning darsni qay darajada oʻzlashtirganliklarini nazorat qilish uchun savollar bilan murojaat qildi. Bunda oʻquvchilar faollik bilan barcha savollarga javob berishdi. Kelgusi dars uchun topshiriqlar berildi. Muallim bu borada oʻquvchilarni qiziqtirgan savollarga ham javob berdi.

Ochiq dars maktab direktorining oʻquv ishlari boʻyicha oʻrinbosari Baxtiyor Otiyozov, ijtimoiy fanlar uslubbirlashmasi aʼzolari tomonidan kuzatib borildi va tahlil qilindi.

Shundan soʻng “Konstitutsiyamiz - baxtimiz poydevori” deb nomlangan maʼnaviy-maʼrifiy va madaniy tadbir boshlandi.

Tadbirni maktab direktori Shukurboy Oyimbetov ochdi va yigʻilganlarni sana munosabati bilan qizgʻin qutladi.

Mamlakatimizning Asosiy Qonuni – Konstitutsiyasi, unda inson baxt-saodati, erkin mehnat qilishi, ilm olishi va hech kimdan kam boʻlmay yashashi uchun belgilab qoʻyilgan huquqiy mezonlar haqida maʼruza qilingach, oʻquvchilar Konstitutsiyamizga bagʻishlangan sheʼrlar, sahna koʻrinishlari ijro etdilar. Maktabning 6-sinfi oʻquvchilari ijro etgan raqs bayram ruhiga oʻzgacha koʻtarinkilik baxsh etdi.

Shuningdek, tadbirda “Mening Konstitutsiyam” “Mening Prezidentim” mazularida oʻtkazilgan insholar tanlovi, “Konstitutsiya mening taqdimda” nomli rasmlar tanlovi gʻoliblari ham aniqlanib, maktab maʼmuriyati tomonidan ragʻbatlantirildi.

Tadbir oʻquvchilarning ijtimoiy fanlarga qiziqishlari oshishiga xizmat qilgani bilan ahamiyatli boʻldi.

Oygul RAJABOVA.