36-СОНЛИ МАКТАБДА «САЛОМ ЯНГИ ЙИЛ» ДЕБ НОМЛАНГАН ТАДБИР ЎТКАЗИЛДИ

Янги йил ҳамма орзиқиб кутадиган, хушкайфият билан нишонлайдиган катта байрам. Ушбу эртакнамо байрам, айниқса, болажонлар учун жуда қувончли. Шу муносабат билан ўтказилган тадбирларда унутилмас таассуротларга бой бўлган турли томошалар намойиш этилиб, совғалар улашилади.

Байрам арафасида Амударё туманидаги 36-сонли мактабда ҳам 5- ва 6-синф ўқувчилари иштирокида янги йил байрамига бағишлаб, “Салом Янги йил” деб номланган тадбир ўтказилди.

Мактабнинг 5-“В” синфи раҳбари Муҳаббат Турсунбоева ҳамда 6-“А” синфи раҳбари Дилнура Бобониёзова ташкилотчилигида ўтказилган ушбу тадбирда ўқувчилар саҳна кўринишларини, янги йил ҳақидаги қўшиқ ва шеърларни ижро этишди.

Байрамона безатилган синфхонада ташкил этилган тадбирда ўқувчилар қорбобо ва қорқиз, эртаклар ва севимли мултфильмлар қаҳрамонлари либосларида иштирок этдилар.

Янги йил байрами томошаларида турли эртак ва мультфильмлар қаҳрамонлар орқали ростгўйлик, ҳалоллик ва ҳамиша эзгуликка интилиб яшашдек инсоний фазилатлар улуғланади. Бу каби томошалар болажонлар қалбида  юксак инсоний туйғуларни мустаҳкамлайди, уларни она юртга садоқатли бўлишга ўргатади, асар қаҳрамонларидан сабоқ олиб, фақат аъло баҳоларга ўқишга, тинч ва осуда ҳаётимизнинг қадрига етишга ундайди.

Тадбирга ташриф буюрган Қорбобо дастлаб ўқитувчиларни ва барча ўқувчиларни кириб келаётган янги йил байрами билан табриклаб, эзгу тилаклар билдирди. Шунингдек, бугунги кунда ёш авлод тарбияси, таълим олиши, соғлиги, комил инсон бўлиб вояга етиши, касб-ҳунарни мустаҳкам эгаллаши ва ҳаётда ўз ўрнига эга бўлиши давлатимиз сиёсатида энг устувор вазифалардан бирига айлангани, бу борада кенг миқёсдаги ишлар амалга оширилгани хусусида тўхталди.

Ўз навбатида Президентимиз раҳнамолигида яратилаётган кенг шароит ва имкониятлар ёш авлоднинг замонавий билим ва касб-ҳунарларни пухта ўзлаштириши, илм-фан, маданият, спорт ва бошқа соҳаларда истеъдод ва салоҳиятини намоён этиши учун мустаҳкам замин бўлиб хизмат қилаётганини таъкидлади.

Шундан сўнг, ҳар иккала синф ўқувчилари янги йил байрами ҳақида қувноқ қўшиқлар ва шеърлар, дилрабо рақслар ижро этишди.

Тадбирда ўқувчиларнинг севимли эртаклари асосидаги саҳна кўринишлари ҳам намойиш қилинди. Қорбобо, Қорқиз, турли эртак ва мультфильм қаҳрамонлари роллари ўқувчилар томонидан ижро этилди. Барча томошаларни ўқувчилар катта қизиқиш ва мароқ билан кўриб, дилдан яйрадилар.

Байрам томошалари ўқувчиларга олам-олам завқ бағишлади. Улар янги йилга монанд безатилган синфхонада Қорбобо, Қорқиз ва турли эртаклар қаҳрамонлари билан бирга қўшиқ айтиб, рақс тушди. Тадбир давомида Қорбобо томонидан турли хил қизиқарли ўйинлар ўтказилиб, ўйин сўнгида ғолиб иштирокчиларга ажойиб совға-саломлар улашилди.

Бутун юртимиз бўйлаб давом этган янги йил байрами шодиёналари каби 36-сонли мактабда ўқувчиларга қувонч, байрамона кайфият, қалбига эзгулик улашиш мақсадида ўтказилган ушбу тадбир ҳам барчага бир олам қувонч ва унутилмас таассуротлар бахш этди.

О.Худойберганова, 36-сонли мактабнинг ижодий-маданий масалалар бўйича тарғиботчиси.